"იმედის" მფლობელის თქმით, კონსტიტუციაში ევროინტეგრაციაზე ჩანაწერი "სისულელეა"
ჩანაწერი კონსტიტუციაში ევროინტეგრაციაზე
სამთავრობო ტელეკომპანია “იმედის” მფლობელის აზრით, კონსტიტუციაში ევროინტეგრაციაზე ჩანაწერი “სისულელეა”. ამის შესახებ ირაკლი რუხაძემ 14 ივლისს “იმედის კვირაში” ისაუბრა.
მისივე თქმით, კვლევებში გამოკითხულთა მხოლოდ 2–3% ფიქრობს, რომ ევროკავშირში შესვლა ძალიან მნიშვნელოვანია. რუხაძე ამტკიცებს, რომ ოპოზიცია დასავლეთის მხარდაჭერის ამ საკითხს “აფეტიშებს”.
საქართველოს კონსტიტუციის 78-ე მუხლის თანახმად [შესწორება 2017 წელს შევიდა “ქართული ოცნების” პირობებში}, რომელიც ქვეყნის „ევროპულ და ევროატლანტიკურ სტრუქტურებში ინტეგრაციას“ შეეხება, კონსტიტუციურმა ორგანოებმა თავიანთი უფლებამოსილების ფარგლებში, უნდა მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად.
რა თქვა ირაკლი რუხაძემ
“მინდა შესვლას” – ბევრი ამბობს, მაგრამ “მნიშვნელოვანიას” ამბობს ბევრად უფრო პატარა ნაწილი. ჩვენ ახლა ავიღეთ და რაღაცნაირად გავაფეტიშეთ, გავაფეტიშებთ ყოველ შემთხვევაში. ოპოზიცია ამას აკეთებს უკვე ღიად დასავლეთის მხარდაჭერით.
მთელი ქვეყნის ყურადღება ამაზეა გადატანილი. თან ეს ხდება იმ პირობებში, რომ ეს არის აყვანილი საკლარულ დონეზე, დოგმატურ დონეზე. იმიტომ უნდა გავაკეთოთ ეს, რომ წერია კონსტიტუციაში, ჯერ რატომ წერია იმ კონსტიტუციაში, ეს საერთოდ სისულელეა, მე თუ მკითხავთ, არ უნდა ჩაგვეწერა, რა უნდა ასეთ რაღაცებს კონსტიტუციაში, რომელიც მუდმივი დოკუმენტია.
[…] როცა ევროკავშირზე ვსაუბრობთ, არ ხდება არანაირი გარჩევა, სხვა საკითხებზე საერთოდ არ ვლაპარაკობთ, თითქოს ყველაფერი მეათეხარისხოვანია ამ ერთი საკითხის გარდა, ქვეყნის მომავლისთვის. ამ არჩევნებზე შევდივართ ისე, […] თითქოს უპირობო შესვლაა, ნებისმიერ ფასად, არ ხდება გარჩევა რა მინუსებს და რა პლუსებს მოგვიტანს ევროკავშირი”
გამოხმაურება
პლატფორმა “ერთიანობის” ლიდერის გია ჯაფარიძის თქმით, ირაკლი რუხაძის განცხადება კიდევ ერთი დასტურია, რომ “ქართულ ოცნებას” არ აქვს სურვილი, საქართველო ევროკავშირში გაწევრიანდეს. ჯაფარიძის თქმით, ეს განცხადება, როგორც ჩანს, ივანიშვილისგან მოდის.
რამდენადაც ვიცით, ირაკლი რუხაძე წარმოადგენს ივანიშვილის უახლოვეს გარემოცვას, აქედან გამომდინარე მის განცხადებას ამიტომაც აქვს მნიშვნელობა. თავის დროზე, როდესაც ქართულმა ოცნებამ ეს მუხლი შეიტანა საქართველოს კონსტიტუციაში, მაშინაც ვფიქრობდი რომ ეს იყო მათი მხრიდან პოპულისტური ნაბიჯი. ერთი მხრივ, დაერწმუნებინათ საქართველოს მოქალაქეები თავიანთ თითქოს დასავლურ ორიენტაციაში, ამავდროულად ეს იყო სატყუარა, რომელიც გადაუგდეს საქართველოს საერთაშორისო პარტნიორებს.
მაშინ როდესაც, ევროპის კავშირთან გართულებულია, გაუარესებულია ურთიერთობები, მაშინ როდესაც თავად ევროპის კავშირი აცხადებს, რომ შეჩერებულია საქართველოს ევროპის კავშირში გაწევრიანების პროცესი, მაშინ როდესაც შეჩერებულია ევროპის კავშირის ფინანსური დახმარება, რაც საქართველოს უამრავ მოქალაქეს ტოვებს – სიღარიბეში, უმუშევრობაში, ეს განცხადება, როგორც ჩანს, მოდის ივანიშვილისგან და ეს განცხადება არის კიდევ ერთი დასტური იმისა, რომ ქართულ ოცნებას არ აქვს სურვილი საქართველო გაწევრიანდეს ევროპის კავშირში, ქართულ ოცნებას არ აქვს სურვილი საქართველო გაწევრიანდეს ევროატლანტიკურ სტრუქტურებში, ქართული ოცნება ყველაფერს აკეთებს იმისათვის, რომ საქართველო არ გახდეს ამ სივრცის ნაწილი, ქართული ოცნება წარმოადგენს ერთადერთ წინაღობას საქართველოს ევროპის კავშირში გაწევრიანების გზაზე”, – თქვა ჯაფარიძემ.
თბილისის მერის, კახა კალაძის თქმით, ნებისმიერ ადამიანს შეუძლია “თავისი მოსაზრება” გამოხატოს:
“ქვეყანა გახდება ევროპული ოჯახის წევრი. საქართველოში ნებისმიერ ადამიანს შეუძლია, თავისი მოსაზრება გამოხატოს, მთავარია ეს კანონის ფარგლებში მოხდეს.
თუ ვაშენებთ დემოკრატიულ სახელმწიფოს, მაშინ ყველა აზრს უნდა მივცეთ არსებობის საშუალება. თუ ისეთ ქვეყანას ვაშენებთ, როგორიც იყო სააკაშვილის მეთაურობით რადიკალების ხელისუფლებაში ყოფნის დროს, ეგეც უნდა ვიცოდეთ, მაგრამ საზოგადოებას არ უნდოდა ისეთი საქართველო, როგორიც 2012 წლამდე იყო და შესაბამისი პასუხი გასცა მათ.
ჩემი და ჩვენი გუნდის პოზიცია არის ქვეყნის ევროპული მომავალი. ამ გზაზე ვდგამთ კონკრეტულ ნაბიჯებს. თუ რაიმე ხელშესახები წარმატება გვაქვს, ქვეყნის უმრავლესობის მოსახლეობასთან ერთად, ჩვენი დამსახურებაა.” – თქვა კალაძემ.
