აშშ-ის თავდაცვის მდივანი: რუსეთი უნდა სცემდეს პატივს 2008 წლის ხელშეკრულებას
საქართველოში ოფიციალური ვიზიტით მყოფმა აშშ-ის თავდაცვის მდივანმა, ლოიდ ოსტინმა 3+3 პლატფორმის შესახებ ბრიფინგზე ისაუბრა და ჟურნალისტის კითხვაზე, დააზიანებს თუ არა ამ ფორმატში რაიმე ფორმით მონაწილეობა საქართველოს ევროატლანტიკური ინტეგრაციის პროცესს, ასე უპასუხა:
“რუსეთი, რომელსაც ოკუპირებული აქვს საქართველოს 20%, უნდა სცემდეს პატივს 2008 წლის ცეცხლის შეწყვეტის ხელშეკრულებით გათვალისწინებულ შეთანხმებას, ვიდრე რაიმე ახალ პლატფორმაზე ისაუბრებს.”
3+3 ფორმატის იდეა 2020 წლის მთიანი ყარაბაღის კონფლიქტის შემდეგ, თურქეთის პრეზიდენტმა, რეჯეფ თაიფ ერდოღანმა წამოაყენა.
ფორმატი გულისხმობს ექვსი ერის პლატფორმის შექმნას, რომელშიც მონაწილეობა თურქეთის, აზერბაიჯანის, სომხეთის, საქართველოს, რუსეთისა და ირანის ხელისუფლებებმა უნდა მიიღონ, რათა – როგორც ერდოღანი ამბობს – რეგიონში მშვიდობა დამყარდეს.
აქამდე, ქართული მხარე უარს ამბობდა 6 ერის პლატფორმაში მონაწილეობაზე. თუმცა ერდოღანმა ეს ინიციატივა კიდევ ერთხელ გაიმეორა 2021 წლის ივნისში, აზერბაიჯანში ვიზიტის დროს.თურქეთის პრეზიდენტმა მაშინ განაცხადა, რომ კავკასიის რეგიონში მშვიდობის დამყარება რეგიონული კოოპერაციითაა შესაძლებელი და ეს მთელი მსოფლიოსთვის სასიკეთო იქნება.
“არა მხოლოდ აზერბაიჯანი, არამედ რეგიონის ყველა ქვეყანა, სომხეთის ჩათვლით, ასევე მთელი მსოფლიო, მოგებული დარჩება კავკასიაში მშვიდობისა და სიწყნარის არსებობით”, – თქვა ერდოღანმა.
9 ოქტომბერს, საქართველოს საგარეო საქმეთა მინისტრმა, დავით ზალკალიანმა საზოგადოებრივი მაუწყებლის ეთერში განაცხადა, რომ საქართველომ რაღაც ფორმით უნდა მიიღოს მონაწილეობა 3+3 ფორმატში.
თუმცა იმავე დღეს, საგარეო საქმეთა სამინისტრომ უარყო მინისტრის სიტყვები და განაცხადა, რომ დავით ზალკალიანის კომენტარი არასწორად იქნა ინტერპრეტირებული.
უწყების განცხადებაში ნათქვამია, რომ მინისტრს საზოგადოებრივი მაუწყებლის ეთერში ინტერვიუს დროს არ უთქვამს, რომ საქართველო აღნიშნულ ფორმატში უნდა იყოს წარმოდგენილი.
ამასთან ერთად, ლოიდ ოსტინმა საქართველოს თავდაცვის მინისტრთან, ჯუანშერ ბურჭულაძესთან ერთად, საქართველოს თავდაცვისა და შეკავების გაძლიერების ინიციატივას მოაწერა ხელი.
თავდაცვის მდივნის თქმით, ეს ინიციატივა საქართველოს შეიარაღებული ძალების გაძლიერებას, საქართველოს და აშშ-სთან პარტნიორობის გამყარებას ემსახურება.
“ეს აღნიშნავს ამაღელვებელ ახალ ფაზას ჩვენს ორმხრივ უსაფრთხოების თანამშრომლობაში ჩვენს ქვეყნებს შორის, ჩვენ ნამდვილად გამოვიყენებთ ბაზად საქართველოს თავდაცვის მზადყოფნის პროგრამას, ხელს შევუწყობთ საქართველოს ურთიერთთავსებადობას ნატოსთან, საქართველოს თავდაცვის სამინისტროს და საქართველოს შეიარაღებული ძალების მოდერნიზებით და განვითარებით. ეს ინიციატივა დააწინაურებს და ხელს შეუწყობს ჩვენს საზიარო უსაფრთხოების ინტერესებს და კვლავ გაამყარებს მომავალში ჩვენს პარტნიორობას” – თქვა თავდაცვის მდივანმა.
● საგარეო საქმეთა სამინისტრო: მიუღებელია მოსკოვის განცხადებები საოკუპაციო ხაზის დელიმიტაციაზე
● მოლაპარაკებების პირობები: აფხაზეთში კონფლიქტისადმი მიდგომა შეცვალეს
● რუსეთი ოკუპირებული რეგიონების “საზღვრების” დელიმიტაციის ინიციატივით გამოდის
ოსტინის განმარტებით, ურთიერთგაგების მემორანდუმი, ხაზს უსვამს აშშ-ის თავდაცვის დეპარტამენტის გრძელვადიან პოლიტიკას, დაეხმაროს საქართველოს, რათა დაიცვას საკუთარი თავი, შეაკავოს აგრესია და წინ წაიწიოს ევროატლანტიკური ინტეგრაციის გზაზე:
“საქართველოს მთავრობამ უნდა შეასრულოს მისი ნაწილი დატვირთვისა, რომ გამოიყენოს აშშ-ის მხარდაჭერა და გააძლიეროს საქართველოს დემოკრატია, გაატაროს რეფორმები, რომლებიც აუცილებელია საქართველოს დასავლეთთან მჭიდროდ დაკავშირებისთვის”.
აშშ-ის თავდაცვის მდივანმა ხელმოწერილი ინიციატივის შესახებ საკუთარ ტვიტერზეც დაწერა, მისი თქმით ეს ინიციატივა ხაზს უსვამს აშშ-ის ძალისხმევას საქართველოს გაძლიერებისთვის.
ოსტინმა ბრიფინგზე ისაუბრა კავკასიის რეგიონზეც და განაცხადა, რომ ესაა მნიშვნელოვანი რეგიონი, სადაც აშშ-ს და საქართველოს საერთო ინტერესი აქვთ.
“გვაქვს საზიარო ღირებულებები, ვხედავთ მთელ რიგ შესაძლებლობებს უსაფრთხოების სფეროში თანამშრომლობის გასაგრძელებლად. კვლავ, აქ ვარ იმისთვის, რათა ვაღიარო ის დიდი ღირებულება, რომელსაც ჩვენ ვანიჭებთ ჩვენს პარტნიორობას.
რაც შეეხება საქართველოს წვლილს, ორივე, ერაყისა და ავღანეთის ოპერაციებში. მე ხაზს გავუსვამ კვლავ კრიტიკულ როლს, რომელიც საქართველომ შეასრულა ჩვენთან ერთად, მხარ და მხარ. მე ვმსახურობდი ერაყშიც და ავღანეთშიც. შემიძლია, უშუალო გამოცდილებით გითხრათ, რომ შესანიშნავი სამხედროები ჰყავს საქართველოს. მოგეხსენებათ, ეს ორი ომი არ განსაზღვრავს ჩვენს ურთიერთობას. ჩვენ გვაქვს საზიარო ინტერესები, რომელზეც მუშაობას გავაგრძელებთ. კვლავ, მსურს, დავარწმუნო საქართველო, სამყარო ამ შესანიშნავი ურთიერთობების არსებობაში, რომელიც გვაქვს”, – განაცხადა აშშ-ის თავდაცვის მდივანმა.
აშშ-ის თავდაცვის მდივანი ლოიდ ოსტინი საქართველოში დღეს ჩამოვიდა. ის 21-22 ოქტომბრის NATO-ს მინისტერიალამდე შეხვედრებს გამართავს საქართველოში, რუმინეთსა და უკრაინაში.
თბილისში შეხვედრების მთავარი მიზანია თავდაცვის სფეროში თანამშრომლობისთვის ხელშეწყობა, რადგან წელს აშშ-ის არმიის სამწლიანი საწვრთნელი პროგრამის ვადა იწურება.
დღესვე ცნობილი გახდა, რომ მოსკოვი NATO-ში რუსეთის წარმომადგენლობას ხურავს. რუსეთის საგარეო საქმეთა მინისტრის, სერგეი ლავროვის თქმით, წარმომადგენლობა მუშაობას 1-ლი ნოემბრიდან შეაჩერებს. 1-ლი ნოემბრიდან ასევე შეჩერდება ნატოს სამხედრო კავშირის წარმომადგენლობის მუშაობა მოსკოვში.
როგორც ლავროვი ამბობს, მოსკოვთან კონტაქტისთვის ალიანსმა უნდა მიმართოს რუსეთის საელჩოს ბელგიაში.
”რუსეთი აღარ მოაჩვენებს თავს, თითქოს უახლოეს მომავალში შესაძლებელია ნატო-სთან ურთიერთობის შეცვლა რამე ფორმით”, – აცხადებს სერგეი ლავროვი.
