დაღუპულთა ცხედრების ჩამოსვენების შემდეგ, ბაქოში არეულობები დაიწყო
15 ივლისის ღამეს, რამდენიმე ათასი ადამიანი შეიჭრა ბაქოში, პარლამენტის შენობაში, მაგრამ იქიდან ცრემლსადენი გაზის გამოყენებით გამოაძევეს. პროტესტის მონაწილეები სომხეთთან ომის დაწყებას მოითხოვდნენ, სომხეთ-აზერბაიჯანის საზღვარზე უკვე მესამე დღის განმავლობაში მიმდინარე საბრძოლო შეტაკებების გამო, რომელსაც მინიმუმ 16 ადამიანის სიცოცხლე ემსხვერპლა.
![](https://jam-news.net/app/uploads/2020/07/108227434_2601831053409911_2939300521349537710_n-1024x683.jpg)
ყველაფერი იმით დაიწყო, რომ 14 ივლისის საღამოს, ბაქოს ბევრი მცხოვრები გამოვიდა ქუჩაში, რათა მონაწილეობა მიეღო სამგლოვიარო პროცესიაში – ქალაქში ჩამოასვენეს სამხედრო მოსამსახურეების ცხედრები, რომლებიც სომხეთ-აზერბაიჯანის საზღვარზე, 12 ივლისიდან მიმდინარე საარტილერიო და სნაიპერული სროლების შედეგად დაიღუპნენ.
ამ სტატიის გამოქვეყნების მომენტში, ოფიციალურად გამოცხადებულია აზერბაიჯანის მხრიდან დაღუპული 12 ადამიანის შესახებ. ბაქოში, შეჰიდთა ხეივანში დასაკრძალად ჩამოასვენეს გენერალ-მაიორი ფოლად გაშიმოვისა და პოლკოვნიკ ილგარ მირზოევის ნეშტები.
View this post on InstagramA post shared by Mikroskop Media (@mikroskopmedia) on
სტიქიურად დაიწყო მსვლელობა, რომელშიც ათასობით ადამიანი მონაწილეობდა – მიუხედავად იმისა, რომ კორონავირუსის პანდემიის გამო, ბაქოში მკაცრი საკარანტინო რეჟიმი მოქმედებს და ერთად შეკრების უფლება, მაქსიმუმ ხუთ ადამიანს აქვს.
მარშმა ქალაქის ცენტრში ჩაიარა, პრეზიდენტის ადმინისტრაციის შენობასთან, ადამიანები სკანდირებდნენ ლოზუნგებს – „ან ყარაბაღი ან სიკვდილი“, „კარანტინის დასრულება, ომის დაწყება“, „უმაღლესო მთავარსარდალო, მოგვეცი იარაღი!“.
•აზერბაიჯანი-აზერბაიჯანი-სომხეთი, ურთიერთობა ყარაბაღის კონფლიქტის ფონზე
• კომენტარი: სჯობს, დამაჯერებლად იცრუო
15 ივლისს, დაახლოებით, დილის 4 საათისთვის, არეულობა დაიწყო, რომლის დროსაც, ამოატრიალეს პოლიციის ავტომობილები. შემდეგ, დემონსტრანტები პარლამენტის შენობაში შეიჭრნენ ყვირილით – „მობილიზაცია!“.
პოლიციას მომიტინგეებისთვის პარლამენტში შესვლაში ხელი არ შეუშლია.
პარლამენტის შენობასთან ბევრი პოლიციელი იყო, მაგრამ მათ არანაირი ზომა არ მიუღიათ პარლამენტის შენობის დასაცავად.
![](https://jam-news.net/app/uploads/2020/07/110243930_10220803217702278_5533532125291220727_n.jpg)
მხოლოდ გარკვეული დროის შემდეგ შევიდა პოლიცია პროტესტის მონაწილეების კვალდაკვალ შენობაში და ისინი ძალის გამოყენებით გამოაძევა. სტიქიური მიტინგის დაშლისას, პარლამენტის წინ არსებულ მოედანზე გამოიყენეს წყლის ჭავლის მანქანები.
აქციის რამდენიმე მონაწილე დააკავეს, მათი ზუსტი რიცხვი ჯერჯერობით უცნობია.