საქართველოში თვითმმართველობის არჩევნების მეორე ტურია

30 ოქტომბერს საქართველოს ხუთ ქალაქსა და 15 მუნიციპალიტეტში ადგილობრივი თვითმმართველობის არჩევნების მეორე ტური იმართება. ანუ ჯამში 64-დან 20 მუნიციპალიტეტში. დანარჩენ 44 მუნიციპალიტეტში პირველივე ტურში „ქართული ოცნების“ კანდიდატებმა გაიმარჯვეს. 

საქართველოს მასშტაბით საარჩევნო უბნები გაიხსნა 08:00 საათზე. ხმის მიცემის პროცესი 20:00 საათამდე გასტანს.

პირველ ტურში, რომელიც 2 ოქტომბერს გაიმართა, ცენტრალური საარჩევნო კომისიის ინფორმაციით, ამომრჩეველთა აქტივობა 51.92 პროცენტი იყო. ეს 1 815 776 ადამიანია. 

იდეაში, თვითმართველობის არჩევნები მხოლოდ ადგილობრივ ხელისუფლებებს ცვლის და ცენტრალურ დონეზე ცვლილებებს არ განაპირობებს, თუმცა, ამ არჩევნებს ოპოზიცია “რეფერენდუმს” და “გადამწყვეტს” უწოდებენ. ოპოზიციაში ამბობენ, რომ თუკი ხელისუფლება წააგებს დიდ ქალაქებს, ეს სერიოზულად შეარყევს მის პოზიციებს და, შესაძლოა, ქვეყანაში დროზე ადრე დაინიშნოს საპარლამენტო არჩევნები.

● რას გვეუბნება საარჩევნო ციფრები – რით გამოირჩევა ყაზბეგი და რა საერთო აქვთ აბაშას და ვაკეს

● რეფერენდუმი, კოკაინი და სისხლიანი ბანერები. მთავარი, რაც უნდა ვიცოდეთ 2 ოქტომბრის არჩევნებზე საქართველოში

● მოსყიდვა, დაშინება, ამომრჩეველთა ნების კონტროლი – როგორი იყო არჩევნების დღე საქართველოში

● შიმშილობენ თუ არა ბავშვები საქართველოში და სჭირდებათ თუ არა მათ უფასო კვება სკოლაში

30 ოქტომბერს საარჩევნო უბანზე მისულ ამომრჩეველს  ბიულეტენებზე მხოლოდ ორი კანდიდატის სახელი დახვდება.

20-დან 17 მუნიციპალიტეტში არჩევანი „ქართული ოცნებისა“ და „ერთიანი ნაციონალური მოძრაობის“ კანდიდატებს შორისაა გასაკეთებელი.

ვის ირჩევენ თვითმმართველი ქალაქები

მერის არჩევნების მეორე ტური გაიმართება დედაქალაქში. პირველ ტურში “ქართული ოცნების“ კანდიდატმა, თბილისის მოქმედმა მერმა, კახა კალაძემ ხმათა 45 პროცენტი აიღო, ხოლო „ნაციონალური მოძრაობის“ კანდიდატმა ნიკა მელიამ –  34. 1 პროცენტი. მეორე ტირი სწორედ ამ ორ კანდიდატს შორის შედგება.

ბათუმში ერთმანეთს ოპოზიციის ერთიანი კანდიდატი გიორგი კირთაძე (პირველი ტურის შედეგი – 41,96%) და მმართველი „ოცნების“ კანდიდატი, არჩილ ჩიქოვანი (41, 07%) უპირისპირდებიან.

რუსთავის მერობისთვის იბრძვიან ნინო ლაცაბიძე “ქართული ოცნებიდან” (44,83 %) და დავით კირკიტაძე “ნაციონალური მოძრაობიდან” (43,54%).

ქუთაისი: ოპოზიციის კანდიდატი ხატია დეკანოიძე (43,3%), მმართველი პარტია – იოსებ ხახალეიშვილი (41,45%).

ფოთი: ფოთში ერთმანეთს ოპოზიციის კანდიდატი, თბილისის ყოფილი მერი, გიგი უგულავა (38,0%) და ფოთის საკრებულოს ყოფილი დეპუტატი “ქართული ოცნებიდან” ბექა ვაჭარაძე (46,8%) უპირისპირდებიან.

გარდა ამ დიდი ქალაქებისა, არჩევნების მეორე ტურია ასევე შემდეგ თვითმმართველი თემებში:

• თელავი;
• თიანეთი;
• ქარელი;
• ხაშური;
• ცაგერი;
• ბაღდათი;
• წყალტუბო;
• ოზურგეთი;
• სენაკი;
• მარტვილი;
• ხობი;
• ზუგდიდი;
• წალენჯიხა;
• ჩხოროწყუ;
• ხელვაჩაური

როგორ შეიცვალა ვითარება პირველი ტურის შემდეგ:

სიახლე იმაშია, რომ პირველი ტურის შემდეგ ოპოზიციამ გაერთიანება შეძლო და ახლა “ოცნების” კანდიდატის წინააღმდეგ ერთიანი ფრონტით, მეხუთე ნომრის (ერთიანი ნაციონალური მოძრაობის ნომერი) ქვეშ გამოდის. ოპოზიციამ ასევე თბილისის მთავრობის კოალიციური კაბინეტი შექმნა, რაც იმას ნიშნავს, რომ “ნაციონალური მოძრაობის” კანდიდატის, ნიკა მელიას გამარჯვების შემთხვევაში, ისტორიაში პირველად თბილისს კოალიციური მთავრობა ეყოლება – მერები, ვიცე-მერები და სხვადასხვა საქალაქო სამსახურების ხელმძღვანელები არა ერთი პარტიის, არამედ სხვადასხვა პარტიების წარმომადგენლები იქნებიან.

ოპოზიციურ ერთობაში არ მონაწილეობს ყოფილი პრემიერის, გიორგი გახარიას პარტია, რომელიც 2 ოქტომბერს მესამე ადგილზე გავიდა. გახარიამ თქვა, რომ მეორე ტურში არავის უჭერს მხარს, შესაბამისად თავის მომხრეებს არც ერთი კანდიდატის მხარდაჭერისკენ არ მოუწოდა. 

ხელისუფლების წინასაარჩევნო ტაქტიკა კვლავ ისეთივე იყო, როგორც აქამდე ყველა სხვა არჩევნების დროს, ოღონდ ამჯერად კიდევ უფრო რადიკალური: მთავარი გზავნილი საკუთარ ამომრჩეველთან კვლავ “ნაციონალური მოძროაბის” დამთავრება” იყო. ხელისუფლების მიერ კონტროლირებად მედიაში გადიოდა ენმ-ის ხელისუფლებაში ყოფნის დროს დაზარალებული ადამიანების ისტორიები, ციხის ძველი კადრები. აგრესიული იყო თავად პოლიტიკოსების, პირველი პირების რიტორიკა.

ოპოზიციამ მთელი აქცენტი კოალიციურ ერთობაზე გააკეთა. მათ საარჩევნო კლიპებში სხვადასხვა პარტიების ლიდერები ერთად ჩნდებოდნენ. იყო კონკრეტული დაპირებებიც – უფასო სადილი თბილისელი სკოლის მოსწავლეებისთვის, ასლარიანი დანამატი თბილისელი პენსიონერებისთვის.

“ნაციონალური მოძრაობისთვის” ასევე მთელი წინასაარჩევნო პერიოდის განმავლობაში ნომერ პირველი საკითხი ექს-პრეზიდენტის, მიხეილ სააკაშვილის გათავისუფლების საკითხი იყო, რომელიც უკვე თვეზე მეტია პატიმრობაშია და შიმშილობს.

ოპოზიციამ, კერძოდ კი, “ნაციონალურმა მოძრაობამ” მიხეილ სააკაშვილის მხარდასაჭერად თბილისში მასშტაბური აქცია გამართა. როგორც პოლიტიკური დამკვირვებლები და ჟურნალისტები ამბობდნენ, ეს იყო ყველაზე მასშტაბური აქცია “ქართული ოცნების” მმართველობის პერიოდში. ასევე, მასშტაბური ოპოზიციური აქციები იყო ბათუმში, ქუთაისში, ზუგდიდში და სხვა ქალაქებში.

● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი

● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?

● უკრაინული მიშა

“ნაციონალური მოძრაობის” დიდი აქციის შემდეგ, საკუთარი მხარდამჭერებს აქციაზე დაუძახა ხელისუფლებამაც. “ქართული ოცნების” აქცია თავისუფლების მოედანზე ასევე მასშტაბური აღმოჩნდა.