„არასდროს შევეკვრებით რუსულ ძალას" - ახალგაზრდების ფიცი და მასშტაბური აქცია რუსული კანონის წინააღმდეგ
აქცია რუსული კანონის წინააღმდეგ
„არა რუსულ კანონს!“ – რუსული კანონის გასაპროტესტებლად პარალმენტის წინ, ახალგაზრდების ორგანიზებით, მოქალაქეები 19 აპრილსაც შეიკრიბნენ. რუსთაველის გამზირი გადაიკეტა.
ისმოდა სასტვენების ხმა. “სად მივდივართ? ევროპაში” ! – სკანდირებდნენ ახალგაზრდები.
ახალგაზრდები ხელისუფლებას მოუწოდებდნენ, გაიწვიოს რუსული კანონი.
მოგვიანებით, აქციის მონაწილეებმა მსვლელობით ჯერ იუსტიციის სახლთან, შემდეგ კი გმირთა მოედანთან გადაინაცვლეს.
მტკვრის მარჯვენა სანაპიროზე მიმავალ ახალგაზრდებს მანქანები გაბმული საყვირებით ხვდებოდნენ.
გმირთა მოედანზე, საქართველოს ტერიტორიული მთლიანობისთვის დაღუპულ გმირთა მემორიალთან ახალგაზრდებმა ფიცი დადეს და საქართველოს ჰიმნი იმღერეს:
„ჩვენ, საქართველოს მოქალაქეები, ქართველი პატრიოტები შევიკრიბეთ აქ, გმირთა მოედანზე, რათა პატივი მივაგოთ მათ ხსოვნას და დავდოთ ფიცი მათი სულების წინაშე. ვფიცავ, რომ არასდროს დავთმობთ მათი სიცოცხლის ფასად მოპოვებულ თავისუფლებას! ვფიცავ, რომ არასდროს შევურიგდებით ძალას, რომელიც ჩვენი ქვეყნის, ჩვენი ქვეყნის მტრისთვის, რუსეთისთვის დათმობას ცდილობს. ვიდგებით ერთმანეთის მხარდამხარ და დავიცავთ საქართველოს სახელმწიფოებრიობას, ჩვენს ენას, ჩვენს მამულს და ერთობას!
ვფიცავ, ვფიცავ, ვფიცავ!
გაუმარჯოს დამოუკიდებელ და ერთიან საქართველოს!“ – ერთად წაიკითხეს ეს ფიცი ახალგაზრდებმა.
ამის შემდეგ, აქციის მონაწილეები ისევ პარლამენტთან დაბრუნდნენ.
მორიგი საპროტესტო აქცია ახალგაზრდებმა პარლამენტთან ხვალ, 20 აპრილს, 7 საათზე დააანონსეს.
„სტუდენტებო გამოდით, ლექტორებო გამოდით, ყველა გამოდით გარეთ, ეს ქვეყანა ჩვენია“,- განაცხადა აქციის ერთ-ერთმა მონაწილემ, რომელმაც შეკრებილებს ხვალინდელი აქციის ანონსი გააცნო.
„ჩვენ, ყველა ერთად, ვინც ვიაზრებთ, რომ აქ დგომით ჩვენ ვიბრძვით საქართველოს კეთილდღეობისთვის, ვართ ისტორიის სწორ მხარეს. თუ არ გაიწვევს ამ მახინჯ კანონს [მთავრობა], ჩვენ აქ ვიქნებით ყოველ დღე, ჩვენი ბრძოლა გრძალდება მანამ, სანამ რუსლი გავლენა ამ ქვეყანაში აღარ აირსებებს“,- თქვა აქციის კიდევ ერთმა მონაწილემ.
ახალგაზრდები ამბობენ, რომ პროტესტი გაგრძელდება იქამდე, ვიდრე მთავრობა რუსულ კანონს არ გაიწვევს.
● საქართველოს კანონი „უცხოური გავლენის გამჭვირვალობის შესახებ“, რომელსაც მოიხსენიებენ როგორც რუსული კანონი, ან, აგენტების კანონი, მმართველმა პარტიამ პირველად ერთი წლის წინ, 2023 წლის მარტში დააინიციირა. გასულ წელს პარფლამენტმა ის პირველი მოსმენით მიიღო, მაგრამ, მოგვიანებით მოქალაქეების მასობრივი პროტესტისა და დასავლეთის მწვავე კრიტიკის გამო უკან გაიწვია.
● 2024 წლის 3 აპრილს ცნობილი გახდა, რომ „ქართული ოცნება“ ამ კანონს კიდევ ერთხელ აინიციირებს. კანონპროექტის განხილვა პარლამენტში 15 აპრილს დაიწყო პარლამენტთან მოქალაქეების პროტესტის ფონზე.
● 16 აპრილს მშვიდობიანი აქციის დასაშლელად სამართალდამცველებმა წიწაკის სპრეი გამოიყენეს და ფიზიკურად გაუსწორდნენ აქციის მონაწილეებს. ნაცემი და დაშავებულია აქციის ათობით მონაწილე.
● ქვეყანაში აკრედიტებულმა ელჩებმა, ბევრმა დასავლელმა პოლიტიკოსმა, ევროკავშირის ლიდერებმა და აშშ-ს სახელმწიფო დეპარტამენტის წარმომადგენლებმა, მკვეთრად გააკრიტიკეს კანონპროექტი. ისინი პარლამენტს მოუწოდებენ მოუსმინოს ხალხს და გაიწვიოს კანონპროექტი. დასავლეთი საქართველოს ღიად აფრთხილებს, რომ ამ კანონის მიღება მნიშვნელოვან დაბრკოლებებს შეუქმნის ქვეყნის ევროპასთან ინტეგრაციას.
● მიუხედავად შიდა და გარე უპრეცედენტო წინააღმდეგობისა, 17 აპრილს, 83 ხმით, 0-ის წინააღმდეგ, პარლამენტმა პლენარულ სხდომაზე აგენტების კანონი პირველი მოსმენით მაინც მიიღო. ოპოზიციურმა დეპუტატებმა კენჭისყრაში მონაწილეობა არ მიიღეს. ზოგიერთმა სხდომა პროტესტის ნიშნად დატოვა, ნაწილი კი იძულებით გააძევეს სხდომათა დარბაზიდან განხილვის დროს.
● საქართველოს ხელისუფლება ამტკიცებს, რომ უკან არ დაიხევს და კანონს მაინც მიიღებს. მისი მთავარი არგუმენტია, რომ „ქართული არასამთავრობო ორგანიზაციები მოქმედებენ გაუმჭვირვალედ, რაც საფრთხეს უქმნის ქვეყნის უსაფრთხოებას“.
თუმცა, დამოუკიდებელი ექსპერტები, ოპოზიცია და სამოქალაქო საზოგადოება ამ არგუმენტს არ ეთანხმება. მათ მიაჩნიათ, რომ მმართველი პარტია „ქართული ოცნება“ ცდილობს გაახანგრძლივოს ხელისუფლებაში ყოფნა და ემზადება ქვეყანაში 2024 წლის ოქტომბრის საპარლამენტო არჩევნების წინ ალტერნატიული ხმების ჩასახშობად.
რატომ არის ეს კანონპროექტი საზიანო და რატომ არ აქვს არაფერი საერთო ამერიკულ და ევროპულ ვერსიებთან:
მთავრობის წარმომადგენლები გამუდმებით იმეორებენ, რომ „უცხოური გავლენის გამჭვირვალობის შესახებ“ კანონის კრიტიკოსებს არ აქვთ კონკრეტული არგუმენტებს იმის შესახებ, თუ რატომ არის ეს კანონი რუსული.
თუმცა, ეს ასე არ არის, რასაც ადასტურებს არაერთი მასალა, რომელიც ერთ წელზე მეტია ქართულ მედიაში ვრცელდება.
ჟურნალისტები ვრცლად და კონკრეტული არგუმენტებით ხსნიან ამ კანონის დამაზიანებელ შინაარსს.
● JAMnews-ის ანალიზი: რატომ არის კანონი საზიანო და არ აქვს საერთო ამერიკულ და ევროპულ ვერსიებთან (რუსულ, ქართულ და ინგლისურ ენებზე).
● რადიო თავისუფლება დეტალურად ხსნის ამ კანონპროექტის საშიშროებას (ქართულ ენაზე).
● რა არის “ოცნების” კანონში რუსული? გამოცემა „პუბლიკის“ დეტალური ანალიზი (ქართულ ენაზე).
● კანონპროექტის ახსნა მუხლების მიხედვით ვიდეოში, რომელიც მომზადებულია „პროექტი 64“ გუნდის მიერ (ქართულ ენაზე).
● ასევე, გთავაზობთ JAMnews-ის ტექსტს სხვა ქვეყნებში მიღებული ამ კანონით უკვე გამოწვეული კატასტროფების შესახებ (რუსულ, ქართულ და ინგლისურ ენებზე).
● რატომ არის რუსული კანონი სახიფათო? 5 კითხვა-პასუხი “ნეტგაზეთის” ტექსტში (ქართულ ენაზე).
● და, ასევე, მარტივი განმარტებები on.ge-ზე
აქცია რუსული კანონის წინააღმდეგ
