ამერიკის ელჩი: ყურადღებით ვაკვირდებით საარჩევნო პროცესს

ამერიკის ელჩი საქართველოში, კელი დეგნანი ამბობს, რომ აშშ ყურადღებით აკვირდება დღევანდელ არჩევნებს. მისივე განმარტებით, ეს არჩევნები საქართველოსთვის ძალიან მნიშვნელოვანია და ეს არის შესაძლებლობა, ამომრჩევლებმა საკუთარი ხმა დააფიქსირონ.

ჟურნალისტებთან საუბარში ელჩმა აღნიშნა ისიც, რომ თავისუფალი და სამართლიანი არჩევნები დემოკრატიის ფუნდამენტია.

“ეს არის ძალიან მნიშვნელოვანი დღე საქართველოსთვის და მოხარული ვარ, რომ მასში ჩართული ვარ, როგორც დამკვირვებელი. სასიამოვნოა, რომ ამინდის მიუხედავად ამომრჩევლები იჩენენ პასუხისმგებლობას და მოდიან უბნებზე. ეს არის შესაძლებლობა, რომ მათი ხმა გაგონილი იყოს. ეს არის საშუალება, თუ როგორ ხდიან მოქალაქეები ანგარიშვალდებულს მათ ლიდერებს, როგორ განსაზღვრავენ პრიორიტეტებს. თავისუფალი და სამართლიანი არჩევნები ფუნდამენტურია ნამდვილი დემოკრატიისთვის”, – ამბობს დეგნანი.

მისივე შეფასებით, საქართველოს სჭირდება მეტი პოლიტიკური სტაბილურობა და არა – პოლარიზაცია:

“გვინდა, რომ ადამიანები იყვნენ არჩევნებზე. საქართველოს სჭირდება მეტი პოლიტიკური სტაბილიზაცია და არა პოლარიზაცია. ამ ქვეყანას სჭირდება, რომ მოაგვაროს სამუშაო ადგილების პრობლემა, მაღალი ფასები, კოვიდი, განათლება, გზები. იმედი გვაქვს, რომ არჩევნების შემდეგ პოლიტიკური ლიდერები დაუბრუნდებიან მუშაობას იმ საკითხებზე, რაც ქართული საზოგადოებისთვისაა პრიორიტეტული.”

კელი დეგნანმა ისაუბრა მესამე პრეზიდენტის, სააკაშვილის დაკავებაზეც. ელჩის თქმით, სააკაშვილის საქმე იქნება საქართველოს სასამართლო სისტემის ტესტი. მან ხაზი გაუსვა იმას, რომ აშშ დააკვირდება ამ საქმის მსვლელობას, რათა ის კანონმდებლობისა და საერთაოშორისო ვალდებულებების შესაბამისად წარიმართოს.

● “არაფრის არ შეგეშინდეთ, ხვალ მიდით არჩევნებზე”. დაკავებამდე სააკაშვილმა ვიდეოს ჩაწერა მოასწრო
● სახალხო დამცველის წინასაარჩევნო ანგარიში: მტრული გარემო მედიის მიმართ, დაშინება და მოსყიდვა
● სააკაშვილის დაკავების გამო კიევში საქართველოს ელჩი დაიბარეს

სააკაშვილს საქართველოს პრეზიდენტის პოსტი ათი წლის განმავლობაში, ორი ვადით ეკავა. 2013 წელს, მას შემდეგ, რაც მისმა პარტიამ “ნაციონალური მოძრაობამ” არჩევნები წააგო და მისი მეორე საპრეზიდენტო ვადა დასრულდა, სააკაშვილმა დატოვა ქვეყანა და მას შემდეგ სამშობლოში აღარ დაბრუნებულა.

ამ წლების განმავლობაში ის ცხოვრობდა ევროპასა და შეერთებულ შტატებში, შემდეგ კი დასახლდა უკრაინაში, სადაც ჯერ ექს-პრეზიდენტ პოროშენკოს გუნდის წევრი და ოდესის გუბერნატორი იყო, შემდეგ კი პოროშენკოს ოპოზიციაში გადავიდა.

ბოლო წლებში იგი პრეზიდენტ ვოლოდიმირ ზელენსკის რეფორმების კომიტეტს ხელმძღვანელობდა. სააკაშვილი ამჟამად არ არის საქართველოს მოქალაქე – მოქალაქეობა მან ავტომატურად დაკარგა მას შემდეგ, რაც ექვსი წლის წინ უკრაინის მოქალაქეობა მიიღო. სააკაშვილის წინააღმდეგ რამდენიმე სისხლის სამართლის საქმეა აღძრული.

სააკაშვილს უფლებამოსილების გადამეტებაში, საბიუჯეტო სახსრების გაფლანგვაში, 2007 წლის ნოემბერში ოპოზიციის აქციის დარბევასა და ტელეკომპანია “იმედში” შეჭრაში ადანაშაულებენ. სააკაშვილია ასევე დეპუტატ ვალერი გელაშვილის ცემისა და სანდრო გირგვლიანის მკვლელობის საქმეების ფიგურანტი.

სააკაშვილი უკვე არის მსჯავრდებული ორ ეპიზოდზე. მას 6 წლით აქვს ერთ-ერთ საქმეზე აღკვეთილი თავისუფლება. საქართველოს ხელისუფლების წარმომადგენლები მუდმივად აღნიშნავდნენ, რომ ძებნილ ექსპრეზიდენტს დააპატიმრებდნენ სამშობლოში დაბრუნებისთანავე.

საქართველოში ჩამოსვლის შესახებ საუბრისას თავად სააკაშვილმაც ხაზი გაუსვა, რომ არ ეშინია დაკავების.

2 ოქტომბერს საქართველოში ადგილობრივი თვითმმართველობის ორგანოებს ირჩევენ, თუმცა ოპოზიცია ამ არჩევნებს რეფერენდუმს უწოდებს, სადაც უნდა გადაწყდეს გაიმართება თუ არა ქვეყანაში რიგგარეშე საპარლამენტო არჩევნები და დასრულდება თუ არა ქვეყანაში “ქართული ოცნების” ერთპიროვნული, ცხრაწლიანი მმართველობა.