ახალციხეში აცრის შემდეგ ექთანს ანაფილაქსიური რეაქცია განუვითარდა

ახალციხეში, “იმედის” კლინიკაში, კორონავირუსის საწინააღმდეგო ვაქცინაციიდან რამდენიმე წუთში კომაში ჩავარდა 27 წლის ქალი.

ქალი არის ექთანი ქალაქი ადიგენიდან და წინასწარი ინფორმაციით, მას ანაფილაქსიური შოკი ანუ მწვავე ალერგიული რეაქცია განუვითარდა.

ქალი მძიმე მდგომარეობაშია, იგი მართვით სუნთქვაზეა გადაყვანილი. კატასტროფის ბრიგადამ იგი თბილისში უნდა გადმოიყვანოს.

ვიდრე AstraZeneca– ს ვაქცინას გაიკეთებდა, მან ინტერვიუ მისცა ადგილობრივ მედიას, სადაც ყველას მოუწოდებდა ვაქცინაციისკენ.

იგი შეუძლოდ ვაქცინის გაკეთებიდან 15-30 წუთში გახდა. წინასწარი ინფორმაციით, მას თანმხლები დაავადებები არ ჰქონდა.

მომხდარის შემდეგ კლინიკაში სამართალდამცავების მობილიზებაა. ექთნის ახლობლებმა კლინიკაში ფანჯრები ჩაამსხვრიეს, მომხდარში ისინი კლინიკას ადანაშაულებენ.

ახლობლები ამბობენ, რომ სამი საათის განმავლობაში ისინი ცდილობდნენ მომხდარის შესახებ ინფორმაციის მიღებას, მაგრამ ექიმები მათ ინფორმაციას არ აწვდიან.

პირველი კომენტარები უკვე გაკეთდა თბილისში.

დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის განცხადებით, ვაქცინაციის პროცესში პირველი სერიოზული გვერდითი რეაქცია დაფიქსირდა.

მისი განმარტებით, ყველაზე სერიოზული გვერდითი რეაქციაა ანაფილაქსიური რეაქცია, რომელიც ინექციიდან 15-30 წუთში ან ცოტა მოგვიანებით ფიქსირდება.

„ვაქცინაცია და ნებისმიერი წამალი არ გახლავთ დაზღვეული გვერდითი მოქმედებებისგან. ვაქცინებზე, ზოგადად, არსებობს მსუბუქი გვერდითი მოქმედებები და არსებობს სერიოზული გვერდითი მოქმედებები. ყველაზე სერიოზული გვერდითი მოქმედება, რომელიც ვითარდება სწრაფად ვაქცინის ან წამლის შეყვანის შემდეგ, ეს არის ანაფილაქსიური რეაქცია, რომელიც ვითარდება ინექციიდან 15-20- 30 წუთში, თუმცა შეიძლება იყოს მოგვიანებითი რეაქცია”, – განაცხადა გამყრელიძემ.

ჯანდაცვის სამინისტროს რეგულირების სააგენტომ ახალციხეში, „იმედის“ კლინიკაში მომხდარ შემთხვევაზე გამოძიება დაიწყო.

ამის შესახებ საქართველოს ჯანდაცვის მინისტრის მოადგილემ ბრიფინგზე ახალციხეში მომხდარი შემთხვევის შეფასებისას განაცხადა.

შემთხვევას ფეისბუკზე გამოეხმაურა მისისიპის მონტგომერის ფედერალური კლინიკის ანესთეზიოლოგია-რეანიმაციისა და ქირურგიის დეპარტამენტების ხელმძღვანელი და მისისიპის უნივერსიტეტის ანესთეზიოლოგიის კათედრის პროფესორი ზურაბ გურული.

გურული წერს:

1. ანაფილაქსური შოკი არის აბსოლუტურად ყველა სახის ვაქცინის შესაძლო, იშვიათი გვერდითი ეფექტი და მისი განვითარება არ ნიშნავს ვაქცინის უხარისხობას.
2. ანაფილაქსური შოკის სტანდარტული მკურნალობის მთავარ კომპონენტს წარმოადგენს ადრენალინი.
3. არსებობს ასევე იშვიათი შემთხვევები, როდესაც ანაფილაქსური რეაქცია არ ემორჩილება ადრენალინით მკურნალობას. მაშინ მართვითი სუნთქვა და სხვა მედიკამენტებია საჭირო, მათ შორის სტეროიდები.
4. გართულებული და ადრენალინის მიმართ რეზისტენტული ანაფილაქსური რეაქცია რთული სამართავია, მაგრამ აბსოლუტურად უმეტეს შემთხვევაში დადებითად სრულდება და არ ახლავს ფატალური შედეგი.
5. დარწმუნებული ვარ, რომ ქართველ რეანიმატოლოგთა გამოცდილი გუნდი წარმატებით გაუმკლავდება ამ გამოწვევას.6. წარმოუდგენელი უზნეობაა (სამედიცინო საზოგადოების წარმომადგენლებისაგან კი არაპროფესიონალიზმი) ამ სამწუხარო შემთხვევის შესახებ ნიშნის მოგებით საუბარი, რადგან ასეთი იშვიათი გვერდითი ეფექტის თავიდან აცილება პრაქტიკულად შეუძლებელია მასიური ვაქცინაციების დროს.
7. სრული მხარდაჭერა და საუკეთესო სურვილები პაციენტსა და მის ოჯახს.

____________________________________________________________________________

● ანაფილაქსია არის ორგანიზმის  მწვავე, სისტემური რეაქცია სხვადასხვა სახის ალერგენის მიმართ. ანაფილაქსიური შოკი ძირითად შემთხვევებში ვითარდება ძალიან სწრაფად, ალერგენის ორგანიზმში მოხვედრიდან რამდენიმე წუთში, თუმცა იშვიათ შემთხვევებში შესაძლოა რამდენიმე საათის შემდეგაც განვითარდეს. მისი განვითარება არ არის დამოკიდებული ალერგენის დოზაზე და უმნიშვნელო რაოდენობამაც კი შესაძლოა გამოიწვიოს ანაფილაქსიური შოკი. ანაფილაქსიური რეაქცია შეიძლება განვითარდეს როგორც მედიკამენტებზე, მათ შორის ანტიბიოტიკებზე, ისე საკვებზე.

● საქართველოში ვაქცინაციის პროცესი 15 მარტს დაიწყო. პირველ რიგში ხდება სამედიცინო პერსონალის აცრა ბრიტანული AstraZeneca– თი.

__________________________________________

● საპატრიარქო არ ჩაერთვება ვაქცინაციის პროპაგანდაში – ჯანდაცვის მინისტრი პატრიარქს შეხვდა
● საქართველომ AstraZeneca-ს ვაქცინის პირველი პარტია მიიღო
● პაატა იმნაძე ერთ-ერთი პირველი იყო მათგან, ვინც კამერების წინ საჯაროდ აიცრა