აფხაზეთში სპეცსამსახურებმა ოპოზიციონერები “სასაუბროდ” დაიბარეს

ოპოზიციური ორგანიზაციის ორი ლიდერი აფხაზეთის სახელმწიფო უშიშროების სამსახურში გამოიძახეს. “გასაუბრების” მიზეზი ოპოზიციის მხრიდან პრეზიდენტის კრიტიკა გახდა.

უშიშროებამ სასაუბროდ სახალხო ერთობის ფორუმის  (ყოფილი პრეზიდენტის რაულ ხაძიმბას პარტია) ორი ლიდერი – პარტიის თავმჯდომარე ასლან ბარციცი და ორგანიზაციის პოლიტიკური საბჭოს წევრი, პრეზიდენტის ადმინისტრაციის ყოფილი უფროსი დაურ არშბა, დაიბარა.

• მოსაზრება: ენერგოკრიზისი აფხაზეთში ვერ გადაიჭრება, სანამ ქსელში კერძო ბიზნესს არ დაუშვებენ
• „შუქი ისევ არ არის!“ – აფხაზეთში ოპოზიცია მთავრობის გადადგომას და მაინინგის საკითხზე გამოძიებას ითხოვს
• მოსაზრება: აფხაზეთს ენერგოსისტემის რუსეთისთვის გადაცემა ან უშუქოდ ცხოვრება მოუწევს

საუბრის დროს გაირკვა, რომ სპეცსამსახურს პარტიის განცხადება არ მოეწონა, სადაც მათ პრეზიდენტი გააკრიტიკეს მდინარე ენგურზე ორი ვარდნილჰესის უცხოელ ინვესტორებზე შესაძლო გადაცემის გამო. “ვარდნილჰესები” ენგურჰესის კომპლექსის ნაწილია, რომელიც  აფხაზეთის ელექტროენერგიის მთავარი წყაროა.

თავად განცხადება და ციტატა პრეზიდენტის ენერგეტიკული გეგმების კრიტიკის შესახებ საკმაოდ სტანდარტული იყო და დიდად არ განსხვავდებოდა ოპოზიციის სხვა განცხადებებისგან:

”წელიწადნახევარიანმა მმართველობამ ნათლად აჩვენა ხალხს, რომ რეფორმების ნაცვლად, ქვეყანას და ხალხს ჯიუტად თავს ახვევენ თეზისს, რომ მხოლოდ უცხოელი ინვესტორები გამოასწორებენ ყველაფერს და აფხაზეთის მოქალაქეებს მხოლოდ დამკვირვებლების როლი ეგრებათ ქვეყნის ეროვნული სიმდიდრის ძარცვის პროცესში.

ბჟანიას მიერ ენერგოდეფიციტის, როგორც ქვეყნის ენერგეტიკული ობიექტების გადაცემის მთავარი არგუმენტის მითითება, კრიტიკას ვერ უძლებს, ვინაიდან მან თავად შექმნა ენერგოკრიზისი კრიპტოვალუტის მოპოვების ლეგალიზაციის საჯაროდ მხარდაჭერით. და მისი არაერთი  თათბირი კრიპტოფერმების უკანონო საქმიანობასთან ბრძოლის შესახებ, სადაც ამ პროცესებში მონაწილე ჩინოვნიკებს ემუქრებოდნენ, უშედეგოდ სრულდებოდა”.

ასლან ბარციცმა საუბარი სახელმწიფო უშიშროების სამსახურში არა დაკითხვა, არამედ გასაუბრება უწოდა.

მიუხედავად ამისა, მას მიაჩნია, რომ მოხდა ზეწოლის მცდელობა მაღალი თანამდებობის პირების მხრიდან, რომლებმაც  ოპოზიციას “შეხედულების შეცვლა დაჟინებით შესთავაზეს “.

ფორუმის ლიდერები არ გამორიცხავენ, რომ საუბრის ინიციატივა აფხაზეთის უმაღლესი ხელმძღვანელობის მხრიდან მოდიოდა.

ენერგეტიკული კრიზისი – პოლიტიკური დაპირისპირების  მიზეზი

აფხაზეთი ენერგოკრიზისს გასული წლის შემოდგომიდან განიცდის. გენერაციის 40%, რომელსაც აფხაზეთი ენგურჰესიდან იღებს, მკვეთრად გაზრდილი მოხმარების გამო საკმარისი აღარ არის.

ენერგიის დაზოგვის მიზნით, ელექტროენერგიის გათიშვის ორსაათიანი გრაფიკი მთელ აფხაზეთში ივნისიდან მოქმედებს. საკურორტო სეზონის დასრულებასთან ერთად, ენერგეტიკოსების განცხადებით, ეს გათიშვები 6 საათამდე გაიზრდება.

ენერგიის მოხმარების უკიდურესად დაბალი ტარიფების მიუხედავად (1 კვტ / სთ-ის ფასი 40 კაპიკია კერძო პირებისთვის და 80 კაპიკი იურიდიული პირებისთვის, რაც 0.5 ცენტი და 1 ცენტია აშშ დოლარებში), მომხმარებლები მოწოდებული ელექტროენერგიის საფასურის არაუმეტეს 30%-ს  იხდიან.

პრეზიდენტის გეგმები უმოქმედო ვარდნილჰესების რუსი ინვესტორებისთვის გადაცემის თაიობაზე, ენერგოკრიზისის პირობებშიც, ძალიან არაპოპულარული ღონისძიებაა. აფხაზეთში დიდი ობიექტების პრივატიზებას ყოველთვის პოლიტიკური რეზონანსი ჰქონდა. მით უმეტეს, რომ ჰიდროელექტროსადგურები სტრატეგიულ ობიექტებად ითვლება.

მოუგვარებელი ენერგოკრიზისი უკვე გახდა ოპოზიციის მიერ შემოდგომისთვის გამოცხადებული მასობრივი პროტესტის საბაბი.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო