ფაშინიანის მიმართვა: რა თქვა და რას ელოდნენ მისგან
მთიან ყარაბაღში, საბრძოლო მოქმედებების მეშვიდე დღეს, სომხეთის პრემიერ-მინისტრი ნიკოლ ფაშინიანი პირდაპირ ეთერში გამოვიდა. JAMnews-ისთვის მიცემულ კომენტარში, სომეხმა ექსპერტმა თქვა, რომ ნიკოლ ფაშინიანის გზავნილებს სომხეთში ელოდებოდნენ – მაგრამ მან მთავარ მოლოდინებს არ უპასუხა.
ნიკოლ ფაშინიანი გამოსვლის შესახებ ადრევე იყო ცნობილი და ადამიანები მას ელოდნენ – პრემიერ-მინისტრის რეიტინგი, მცირედი ცვალებადობით, კვლავინდებურად უპრეცედენტოდ მაღალია მას შემდეგ, რაც 2018 წელს, როგორც „ხავერდოვანი რევოლუციის“ ლიდერი, ხელისუფლებაში მოვიდა.
მან ისაუბრა მთიან ყარაბაღში, აზერბაიჯანის შეიარაღებულ ძალებთან კონტაქტის ხაზზე არსებული ვითარების შესახებ, ასევე, დანაკარგებზე, როგორც საკუთარზე, ისე მოწინააღმდეგის.
მისი სიტყვის ძირითადი აქცენტი იყო უეჭველი გამარჯვება და სომხეთში, მთიან ყარაბაღსა და მსოფლიოს სხვადასხვა ქვეყნებში მცხოვრები სომეხი მოსახლეობის სულის ამაღლება.
რაზე ილაპარაკა ფაშინიანმა
მთავარი თეზისები:
• აზერბაიჯანისა და თურქეთის აგრესიის მასშტაბები უპრეცედენტოა. სპეციალისტების შეფასებით, ასეთი 21-ე საუკუნეში ჯერ არ ყოფილა.
• უკვე ერთი კვირაა, სომეხი ხალხი აგრესორის წინააღმდეგ იბრძვის.
• ასობით ტანკი, საბრძოლო ტექნიკა, რაკეტა, თვითმფრინავი და უპილოტო საფრენი აპარატი ესხმის თავს ყარაბაღელთა პოსტებს.
• საბრძოლო მოქმედებებში მონაწილეობს თურქეთი. თურქი მეთაურობა ჩართულია ბრძოლების წარმართვაში. კონფლიქტში მონაწილეობენ ახლო აღმოსავლეთიდან ჩამოყვანილი დაქირავებული მებრძოლებიც.
• დაიღუპა ბევრი სამხედრო და მშვიდობიანი მოსახლე.
• ამასთან, აზერბაიჯანის არმიამ ამ დრომდე ვერ შეძლო მის წინაშე დასახული ვერც ერთი ამოცანის გადაწყვეტა.
• აზერბაიჯანმა, რამდენიმე ათასი სამხედრო მოსამსახურე დაკარგა. ფრონტის ხაზზე, ყველგან მათი ცხედრებია.
• ზოგიერთი მიმართულებით, ჩვენი ჯარების მდგომარეობა მძიმეა, მაგრამ არმია გმირულად იბრძვის.
• აგრესორი მოვიდა არა მხოლოდ ტერიტორიისთვის, მისი მიზანია ხალხის განადგურება, სომხების გენოციდის გაგრძელება.
• რამდენიმე წუთის წინ, ყარაბაღის თავდაცვის არმია შეტევაზე გადავიდა.
• სომხეთისა და ყარაბაღის თითოეულმა მცხოვრებმა თავი გამარჯვებას უნდა მიუძღვნას.
„თითოეული ჩვენგანი მზად უნდა იყოს, რომ ამ გამარჯვების წინა ხაზზე აღმოჩნდება. გამარჯვება და მხოლოდ გამარჯვება – ეს არის ის, რასაც საბოლოოდ ჩვენ ველით!“, – ამ სიტყვებით დაასრულა გამოსვლა სომხეთის პრემიერ-მინისტრმა, ნიკოლ ფაშინიანმა.
კომენტარი
პოლიტიკური მიმომხილველის, ნაირა აირუმიანის JAMnews-ისთვის მიცემული ინტერვიუ:
„არცახში, სასტიკი ბრძოლები უკვე ერთი კვირაა გრძელდება და იგრძნობა გარკვეული დაღლილობა საბრძოლო მოქმედებების ძალიან მაღალი ტემპისა და მასშტაბებისგან.
ჩანდა, რომ დღეს დიპლომატიური ძალისხმევა გარკვეულ შეთანხმებამდე მიგვიყვანდა და საკითხი მხოლოდ ის იყო, რა პირობებში.
ყველა ელოდა კარგ ამბებს. გაისმა პრემიერ-მინისტრ, ნიკოლ ფაშინიანის გზავნილი – რომელმაც ვერ უპასუხა ძირითად მოლოდინებს.
ზოგი სომხეთის მიერ ყარაბაღის დამოუკიდებლობის აღიარებას ელოდა, სხვები ზავის დადებას, ვიღაცებს აზერბაიჯანისა და თურქეთის ტერორისტული შეტევების წინააღმდეგ საერთაშორისო კონსენსუსის იმედი ჰქონდათ.
მაგრამ გაისმა მხოლოდ მოწოდება ომში გამარჯვებისკენ, რამაც კიდევ უფრო დიდი გაურკვევლობა შესძინა პოლიტიკურ პერსპექტივას.
ყველას ესმის, რომ ეს უკიდურესად სერიოზული საკითხია – გეოპოლიტიკური წრეების, ზესახელმწიფოების, რეგიონული აქტორების ჩართულობით, რომლებიც ახლა, ალბათ, მომავალი შეთანხმების პირობებს აზუსტებენ.
მაგრამ მთელი ტვირთის ტარება მეომარ ხალხებს უწევს, პატარა ყარაბაღისა და სომხეთის, რომლებიც იძულებულები არიან თავი დაიცვან და მოიგერიონ მასირებული თავდასხმები.
საკვანძო სახელმწიფოებმა აღიარეს ყარაბაღში დაქირავებული ტერორისტების გამოყენება, რომლებიც თურქეთმა და აზერბაიჯანმა ჩამოიყვანეს. თუმცა, მხოლოდ დამგმობი განცხადებები, ეფექტური სანქციების გარეშე.
ფაქტობრივად, მსოფლიოს წამყვან სახელმწიფოებში ჯერჯერობით ვერ შედგა კონსენსუსი მომავალი ზავის პირობებზე.
ეს კი ნიშნავს, რომ ისევ გაისვრიან, დაიღუპებიან ადამიანები, დაინგრევა სახლები და ინფრასტრუქტურა. სანამ არ მოხერხდება შეთანხმება“.
