სამხრეთ კავკასიის მთავარი ამბები. ყოველდღიურად განახლებადი

● რუსთავის N17 პენიტენციურ დაწესებულებაში მსჯავრდებული იაკობ გულედანი გარდაცვლილი იპოვეს. პენიტენციური სამსახურის ცნობით, 2 ოქტომბერს იგი თანამესაკნემ საპირფარეშოში ჩამომხრჩვალი ნახა. უწყებამ ქვემო ქართლის პროკურატურას მიმართა და გამოძიება დაიწყო.

გარდაცვლილის ოჯახი სუიციდის ვერსიას ეჭვქვეშ აყენებს. მისი მამიდა ამბობს, რომ გულედანი თავს არ მოიკლავდა და, მისი ინფორმაციით, სხეულზე შესაძლოა ძალადობის კვალიც ყოფილიყო. პენიტენციური სამსახურის ცნობით, მსჯავრდებული დაწესებულებაში 2023 წლიდან იმყოფებოდა და სასჯელი 2028 წელს უნდა დასრულებულიყო.

● პრემიერ-მინისტრმა ირაკლი კობახიძემ განაცხადა, რომ მსჯავრდებულ გიორგი დავითაძის ბრალდება N6 პენიტენციურ დაწესებულებაში მასზე სექსუალური ძალადობის შესახებ ტყუილია და ეს, მისი თქმით, ვიდეოჩანაწერებით დასტურდება. სპეციალური პენიტენციური სამსახურიც უარყოფს ძალადობას.

დავითაძემ თბილისის სააპელაციო სასამართლოში განაცხადა, რომ მასზე ბადრაგის ათმა თანამშრომელმა დეესკალაციის ოთახში სექსუალურად იძალადა. მისი მტკიცებით, მომხდარი სათვალთვალო კამერებმა გადაიღო.

● 4 მუნიციპალიტეტში ჩატარებულ შუალედურ არჩევნებში 1 136 ამომრჩეველმა მიიღო მონაწილეობა, რაც ამომრჩეველთა 51.6%-ია. ცესკოს წინასწარი მონაცემებით, წალკაში N41 კანდიდატმა ნანული ხინიკაძემ ხმების 96.74%, ხოლო ვანში N41 კანდიდატმა ვაჟა ხელაძემ 87.16% მიიღო. ტრადიციულ უბნებზე ხმების დათვლა გრძელდებოდა.

● მოსკოვში ბიზნესმენ მამუკა წერეთლის ყოფილი მეუღლის, ელენა წერეთლისა და მისი 19 წლის ქალიშვილის დანაწევრებული ცხედრები იპოვეს. რუსული მედიისა და მოსკოვის პროკურატურის ინფორმაციით, მკვლელობის საქმეზე საქართველოს მოქალაქე, 1979 წელს დაბადებული თეიმურაზ გოგიაშვილი დააკავეს.
გამოძიების ინფორმაციით, ქალის სხეულის ფრაგმენტები მოსკოვის ერთ-ერთ ბინაში, მისი ქალიშვილის ცხედარი კი ეჭვმიტანილის ავტოფარეხში აღმოაჩინეს. სასამართლო გოგიაშვილისთვის პატიმრობის შეფარდების საკითხზე იმსჯელებს.

●  „თბილისობის“ ფარგლებში 2026 წლის თბილისის საპატიო მოქალაქეები დააჯილდოვეს. დედაქალაქის მერმა კახა კალაძემ ქალაქის სიმბოლური გასაღები 32 ადამიანს გადასცა.

საპატიო მოქალაქეებს შორის არიან ექიმები, მეცნიერები, ხელოვანები, ჟურნალისტები და სპორტსმენები, მათ შორის ნინო სალუქვაძე, ლერი ხაბელოვი, ვლადიმერ პაპავა, ივანე კუზანოვი, ავთანდილ დემეტრაშვილი და კირა ანდრონიკაშვილი.

ფოტო: თბილისობა/ თბილისის მერია

● ილჰამ ალიევის სოციალურ ქსელებში გამოქვეყნდა ვიდეო, რომელიც მმართველი პარტია „ენი აზერბაიჯანის“ VIII ყრილობაზე, 2 ოქტომბერს მის გამოსვლას ეძღვნება. ვიდეოში მთავარი აქცენტი მშვიდობასა და სამართლიანობაზე კეთდება. ალიევი ასევე საუბრობს 2020 წლის 44-დღიან ომზე და ამბობს: „პოლიტიკაში ემოციების ადგილი არ არის. ემოციებს რომ ავყოლოდით, დღეს, ალბათ, მესამე ტრიუმფალურ თაღს ერევნის ცენტრში ავაგებდით“.

● შაბათ-კვირას ბაქოში გაიმართა კონფერენცია „შუშის დეკლარაციიდან თურქული სახელმწიფოების ორგანიზაციამდე“, რომელშიც თურქეთის, უზბეკეთისა და ჩრდილოეთ კვიპროსის წარმომადგენლები მონაწილეობდნენ. ფორუმის მიზანი თურქული სამყაროს საერთო ისტორიულ და კულტურულ ღირებულებებზე მსჯელობა იყო.

● ბაქოს სურახანის რაიონის დასახლება ბაჰარში მშენებარე კერძო საცხოვრებელი სახლი ჩამოინგრა. ერთი ადამიანი დაიღუპა, ერთი კი დაშავდა. დაწყებულია გამოძიება.

● ბაქოში ევროკავშირსა და აზერბაიჯანს შორის პარტნიორობის 30 წლისთავისადმი მიძღვნილი კულინარიული ფესტივალი Taste of Europe გაიმართა. ღონისძიება აზერბაიჯანში ევროკავშირის წარმომადგენლობამ მოაწყო და მასში ევროკავშირის წევრი ქვეყნების საელჩოები მონაწილეობდნენ.

● აზერბაიჯანელი ძიუდოისტი აჰმედ იუსიფოვი ბაქოში მიმდინარე მსოფლიო ჩემპიონატის გამარჯვებული გახდა. 60 კგ წონით კატეგორიაში მან ფინალში ყაზახი შერზოდ დავლატოვი დაამარცხა.

● აზერბაიჯანის საფეხბურთო ნაკრებმა UEFA-ს ერთა ლიგის მიმდინარე სეზონში პირველი გამარჯვება მოიპოვა. ბაქოში ლიტვასთან მატჩი 1:0 დასრულდა. სამი თამაშის შემდეგ აზერბაიჯანს ხუთი ქულა აქვს და ჯგუფში პირველ ადგილზეა.

● ნიკოლ ფაშინიანმა განაცხადა, რომ სომხეთი კვლავ აპირებს ევრაზიული ეკონომიკური კავშირის ფარგლებში ურთიერთსასარგებლო თანამშრომლობის გაგრძელებას. EAEU-ს მთავრობათაშორისი საბჭოს ონლაინ სხდომაზე მან ამავე დროს კვლავ გაამახვილა ყურადღება რუსეთის მიერ სომხური პროდუქციის იმპორტის შეზღუდვაზე. ფაშინიანის თქმით, მოლაპარაკებებში მნიშვნელოვანი პროგრესი არ არის, თუმცა კონსტრუქციული დიალოგი უნდა გაგრძელდეს.

● იმავე სხდომაზე ბელარუსის პრეზიდენტმა ალექსანდრ ლუკაშენკომ სომხეთს მოუწოდა, არ დატოვოს EAEU-ს საერთო ბაზარი. „არსად არავინ გველოდება, დამიჯერეთ, როგორც ძველ პრეზიდენტს, თითქმის 30 წელია ვმუშაობ“, – განაცხადა მან.

●  სომხეთის საგარეო საქმეთა მინისტრი არარატ მირზოიანი დღეს ირანს ეწვევა.

●  მირზოიანის ირანში ვიზიტის შესახებ განცხადების გამოქვეყნებისას სომხეთის საგარეო საქმეთა სამინისტროს პრესმდივანმა ირანის ძველი, 1979 წლის რევოლუციამდე მოქმედი დროშა გამოიყენა. პრორუსული ოპოზიციური პარტია „ძლიერი სომხეთის“ დეპუტატმა არეგა ოვსეპიანმა მომხდარი გააკრიტიკა და განაცხადა, რომ მსგავსი დეტალები სომხეთ-ირანის ურთიერთობებზე უარყოფითად მოქმედებს.

●  რუსეთის უშიშროების საბჭოს თავმჯდომარის მოადგილე დმიტრი მედვედევმა განაცხადა, რომ „სომხეთი შეიძლება მეორე უკრაინად იქცეს“. მისი თქმით, სომხეთის ამჟამინდელი ხელისუფლების მიერ არჩეული პოლიტიკური კურსი „კარგ შედეგამდე არ მიიყვანს“.

●  მედვედევმა ირანულ სახელმწიფო მედიასთან ასევე განაცხადა, რომ ზოგიერთი ქვეყანა სამხრეთ კავკასიის დაყოფასა და რუსეთ-სომხეთის ურთიერთობების გაუარესებას ცდილობს. მისი თქმით, წარსულში დასავლეთი საქართველოს NATO-ში გაწევრიანებას სთავაზობდა, ახლა კი „რუსეთისა და სომხეთის ურთიერთობებს ამოწმებენ სიმტკიცეზე“.

●  საქართველოს პრემიერ-მინისტრი ირაკლი კობახიძე არ მიიჩნევს, რომ აზერბაიჯანიდან სომხეთის გავლით დაგეგმილი TRIPP, ე.წ. „ტრამპის მარშრუტი“, საქართველოს გავლით არსებულ საერთაშორისო სატრანზიტო მარშრუტებს მნიშვნელოვან პრობლემებს შეუქმნის. მისი თქმით, 2020 წლიდან შუა დერეფანში ტვირთბრუნვა შვიდჯერ გაიზარდა და მარშრუტების დივერსიფიკაციის ობიექტური საჭიროება არსებობს.

●  ირაკლი კობახიძემ ასევე განაცხადა, რომ საქართველომ აზერბაიჯანთან და სომხეთთან საზღვრების დელიმიტაციისა და დემარკაციის მიმართულებით მუშაობა უნდა გააგრძელოს. მისი თქმით, პროცესი ორივე ქვეყანასთან მეგობრულ რეჟიმში გაგრძელდება.

●  პრორუსული ოპოზიციური პარტია „ძლიერი სომხეთის“ საპარლამენტო ფრაქციის ხელმძღვანელი ნარეკ კარაპეტიანი აცხადებს, რომ სტრასბურგში მედიკამენტების ხარისხისა და ჯანდაცვის ევროპული დირექტორატის, EDQM-ის ხელმძღვანელებს შეხვდა. მისი თქმით, პარტია ამზადებს პროგრამას, რომლის მიზანიც სომხეთში მედიკამენტების ფასების საქართველოში არსებულ დონემდე შემცირებაა.

●  ყოველთა სომეხთა კათოლიკოსი თეთრი სახლის რწმენის საკითხთა ოფისის უფროს მრჩეველს შეხვდა. შეხვედრის დეტალები არ გავრცელებულა.

●  სიუნიქის მცხოვრები ქალის სიცოცხლეს, რომელსაც სომხეთის ტერიტორიაზე უკანონოდ გადასულმა აზერბაიჯანელმა სამხედრომ ესროლა, საფრთხე არ ემუქრება. ჯანდაცვის მინისტრ ანაჰიტ ავანესიანის ინფორმაციით, მისი მდგომარეობა სტაბილურია და ექიმების მეთვალყურეობის ქვეშ რჩება.

მთავარი მოვლენების მიმოხილვა საქართველოში, აზერბაიჯანსა და სომხეთში – 28 სექტემბერი- 2 ოქტომბერი, 2026