მხიარული ლემურები. სცენები თბილისის ზოოპარკიდან. ვიდეო  

 ლემურები თბილისის ზოოპარკში

თბილისი ზოოპარკის ვიდეობლოგის ამ სერიაში ლემურების ყოველდღიურ ცხოვრებას ნახავთ.

კატისებრი ლემურების საყვარელი საქმიანობა მზეზე ნებივრობაა. ყოველ დილით  თითქოს რიტუალს ასრულებენ, სხდებიან  პირდაპირ, მუცლით მზისკენ და ხელებს შლიან, თითქოს მზის სხივებს ეხუტებიან. ამ ქცევას „მზის მედიტაციასაც“ უწოდებენ.

როგორ ცხოვრობს თბილისის ზოოპარკი: ყველა ვიდეო

ძალიან უყვართ  ბოსტნეული,  სალათის  ფოთლები. არც ხილზე ამბობენ უარს.  თბილისის ზოოპარკის ბინადარი ლემურები ძალიან სოციალურები არიან და  არც ადამიანებს  ერიდებიან. მომვლელებთან ახლო ურთიერთობაც კი აქვთ. უყვართ მათ მხრებზე მოკალათება და საკვების პირდაპირ ხელიდან ჭამა.   

ლემურები ჯგუფურად ცხოვრობენ. ოჯახში მდედრები დომინირებენ. სწორედ ისინი ხელმძღვანელობენ ჯგუფებს და  მათ ეკუთვნით როგორც საჭმლის, ისე პარტნიორის არჩევის უპირატესობა.კატისებრი ლემურების ბუნებაში ნახვა მხოლოდ კუნძულ მადაგასკარზე შეგიძლიათ.  მათ სხვა სახეობის ლემურებისგან გრძელი, რგოლებით მოხატული კუდი განასხვავებს. 

თბილისის ზოოპარკს არსებობის თითქმის ასწლიანი ისტორია აქვს.  ის 1927 წლის 10 თებერვალს, კავკასიის ცხოველთა საკლიმატიზაციო საზოგადოების ბაზაზე დაარსდა. საზოგადოება XX საუკუნის დასაწყისიდან ინახავდა ველურ ცხოველებს, თუმცა ზოოპარკის სტატუსი არ ჰქონდა.

თავდაპირველად ზოოპარკი მდინარე ვერეს ხეობაში, 70 ჰექტარზე იყო გაშენებული. წლების განმავლობაში დედაქალაქის განვითარებამ, მოგვიანებით კი 2015 წლის 13 ივნისის წყალდიდობამ, ძველი ზოოპარკის ტერიტორია მნიშვნელოვნად შეამცირა. დღესდღეობით მას 5 ჰექტარი უკავია. ზოოპარკს 1500-მდე  ბინადარი ჰყავს.  ყველა ცხოველს საკუთარი ისტორია აქვს.

ბლოგების ამ სერიით თბილისის ზოოპარკის ბინადრებს გაგაცნობთ. მოგიყვებით როგორია მათი ერთი, რუტინული დღე, როგორ ურთიერთობენ სხვა ცხოველებთან და ადამიანებთან, როგორი იცვლება მათი ქცევები ამინდის და სეზონების მიხედვით. აქ ბევრ საინტერესო ამბავს გაიგებთ.