კომენტარი: "ოცნების“ კანონებმა ვერ იმუშავა - ვერც 5 ათას ლარიანმა ჯარიმებმა, ვერც პატიმრობამ, ვერც დაშინებებმა
ნიკა სიმონიშვილის კომენტარი
“ქართული ოცნების“ მიღებულმა კანონებმა, ფაქტობრივად, ვერ იმუშავა. ვერც 5 ათას ლარიანმა ჯარიმებმა, ვერც პატიმრობამ, ვერც დაშინებებმა და რუსთაველის გამზირზე პოლიციელები დააყენეს. ვნახეთ, რომ პატიმრობა შემაშინებელ გარემოებად კი არ იქცა, არამედ ადმინისტრაციული პატიმრობა ერთგვარ ღირსეულ ნაბიჯად იქცა, – ამის შესახებ “ახალგაზრდა იურისტთა ასოციაციის“ ყოფილმა თავმჯდომარემ, ნიკა სვიმონიშვილმა განაცხადა.
მისივე თქმით, გამოჩნდა, რომ ადამიანები პატიმრობაზე ძალაუფლებისა და ფულის გამო კი არ მიდიან, მიდიან სამშობლოს სიყვარულისთვის. ამასთან, მან კორუფციის ბრალდებით ბოლო დროს ყოფილი საჯარო მოხელეების დაკავებებთან დაკავშირებითაც ისაუბრა და აღნიშნა, რომ ის, რასაც არასამთავრობო ორგანიზაციების ნაწილი, წლების განმავლობაში, ქვეყანაში არსებულ კორუფციაზე საკუთარ ანგარიშებში წერდა, მართალი აღმოჩნდა.
ნიკა სიმონიშვილი: “ძალიან საინტერესო დინამიკა შეიმჩნევა პროტესტთან მიმართებით, განსაკუთრებით 4 ოქტომბრის შემდეგ. “ქართულ ოცნებას“ ძალიან დიდი ფსონი ჰქონდა გაკეთებული 4 ოქტომბერთან მიმართებით. 4 ოქტომბერს უნდოდათ, რომ ყველაფერი დაესრულებინათ და ის პროტესტი რაც იყო 4-ში, მასობრივი ძალადობის აქტად უნდოდათ მოენათლათ, რაც პრინციპში ვერ გამოუვიდათ, მიუხედავად იმისა, რომ ათობით ადამიანი დაიჭირეს. საზოგადოებამ ნახა, რომ ამ ადამიანების ძალიან დიდი ნაწილი დაჭერილია მხოლოდ იმის გამო, რომ პრეზიდენტის ადმინისტრაციის ეზოში გადავიდნენ, ყოველგვარი ძალადობრივი აქტის გარეშე. ეს ვერ გამოუვიდათ.
საუბრობენ: “ძალადობა, გადატრიალება“ ა.შ, მაგრამ სერიოზულობა ამ განცხადებებს, რა თქმა უნდა, აკლია. პრეზიდენტის ადმინისტრაციის ეზოში გადასვლით ამ ფაქტს, ძალადობრივად გადატრიალებად ასე მარტივად ვერ მონათლავდნენ. პრეზიდენტის ადმინისტრაციის ეზოში გადასვლით, მაშინ, როცა ძალადობრივი ქმედება არ ხდება, გადატრიალების სცენარს ვერ დადგამდი. ამის შემდეგ დაიწყეს საუბარი, რომ 5 ოქტომბრიდან ეს გაგრძელებაო, ძალადობრივი აქციის გაგრძელება იქნებაო. ესეც ვერ გამოუვიდათ. ამიტომ რა უნდა გაეკეთებინათ? – გააკეთეს ის, რომ ადმინისტრაციული პატიმრობა შემოიღეს უკვე გზის გადაკეტვისა და სახის დაფარვისთვის.
ვნახეთ, რომ ადამიანების ნაწილი დაიჭირეს მხოლოდ სახის დაფარვის გამო, პირბადის ტარების გამო შეუფარდეს ადამიანებს ადმინისტრაციული პატიმრობა, რაც, რა თქმა უნდა, ვირუსების სეზონზე საზოგადოებაში პოპულარობასა და აღიარებს ვერ მოიპოვებდა. იგივე გზის გადაკეტვასთან დაკავშირებით ვნახეთ, რომ პატიმრობა შემაშინებელ გარემოებად კი არ იქცა ადამიანებისთვის, არამედ ადმინისტრაციული პატიმრობა ერთგვარ ღირსეულ ნაბიჯად იქცა პროტესტის მონაწილეებისთვის. ეს მათთვის იყო ღირსების დაცვის საკითხი, პრესტიჟულ ნაბიჯად იქცა. ანუ ადამიანებს იზოლატორისა და ციხის კი არ ეშინოდათ, არამედ პირიქით, შეგნებულად დგამდნენ ამ ნაბიჯს. აქ მიხვდნენ, რომ მხოლოდ ამ დაჭერებით ვერ გადიოდნენ იოლად.
“ქართულ ოცნებაში“ მიხვდნენ იმასაც, რომ იქცეოდნენ იმად, რასაც სხვებს აძახებდნენ. წინა ხელისუფლების რეჟიმივით მოქცევა არ უნდოდათ, რომ ბევრი ადამიანი დაეჭირათ, რადგან საბოლოდ მიხვდნენ, რომ თვითონაც არ უდებენ ტოლს წინა ხელისუფლებას რეპრესიულ ნაწილში. ამიტომ გააკეთეს რა – ასობით პოლიციელი გამოყავთ უკვე და ღობეს ავლებენ რუსთაველის გამზირზე საპროტესტო ნაწილს, რადგან უბრალოდ ადამიანები აღარ გადავიდნენ რუსთაველის გამზირზე.
მიხვდნენ მათი კანონი აღარ მუშაობდა, ვერც იმუშავებდა. “ქართული ოცნების“ მანამდე მიღებულმა კანონებმა, ფაქტობრივად, ვერ იმუშავა. ვერც 5 ათას ლარიანმა ჯარიმებმა, ვერც პატიმრობამ, ვერც დაშინებებმა და რუსთაველის გამზირზე პოლიციელები დააყენეს. სურთ, რომ ცოცხალი ღობე შემოარტყან რუსთაველის გამზირზე პროტესტს. “ქართულ ოცნებას“ არ უნდა, რომ პროტესტი ბევრ ადამიანს მისწვდეს.
აქამდე აქტივისტებისა და პოლიციელების ურთიერთობის ფორმა იყო დისტანცირებული. სამინისტროში ე.წ. ტვინის გამორეცხვისა და ფიქრების გამორეცხვის პროცესი მიდის. ამ ადამიანებს ეუბნებიან, რომ იქ არიან ქვეყნის მოღალატეები, უნდათ ქვეყანაში ომი დაიწყოს და ა.შ. “ქართული ოცნების“ ეს პროპაგანდისტული მეთოდები ძალიან აქტიურად მუშაობს, რომ მაქსიმალურად შეაზიზღონ ჩვენი თავი, ვინც იქ ვდგავართ.
მას შემდეგ რაც ახლო კონტაქტში შევედით ერთმანეთთან, უფრო მეტად ხედავენ ის ადამიანებიც, პოლიციელები, საბადრაგო სამსახურის თანამშრომლებიც, რომ ეს ადამიანები არიან ძალიან კარგი, სამშობლოზე შეყვარებული ადამიანები. ერთი ჩემი მეგობარი მიყვებოდა, რომ მეუბნებიანო, თითქოს დღეში 50 ლარის გამო დგახართო. მისი ჯარიმები კი 50 ათას ცდება. იქ, რომ 50 ლარი რიგდებოდეს, მგონი “ქართული ოცნების“ წარმომადგენლებს ვერავინ დაასწრებდა იქ მისვლას.
ხედავენ ადამიანები, რომ იქ ფულის გულისთვის არავინ დგას. პოლიციელმა, იზოლატორის თანამშრომლებმა ეს ძალიან კარგად დაინახეს, რომ ადამიანები არაფრის გამო მიდიან პატიმრობაზე. ეს არის უფრო დიდი ღირებულება, ვიდრე ფული ან ძალაუფლება, ეს არის სამშობლოს სიყვარული. პროტესტის გამო აკეთებენ ამას.
“ქართულ ოცნებას“ არ აწყობს, რომ შიგნით სისტემაში ვინმე ხედავდეს, თურმე ადამიანები გამყიდველები და მოღალატეები კი არა, რეალურად არიან იმ იდეით განმსჭვალული, რომ სამშობლოსთვის კარგს აკეთებენ.“
