გერმანიამ საქართველოდან ელჩი კონსულტაციებისთვის გაიწვია
გერმანიამ საქართველოდან ელჩი გაიწვია
“ქართული ოცნების” თავდასხმების გამო გერმანიამ საქართველოდან ელჩი კონსულტაციებისთვის გაიწვია.
როგორც გერმანიის საგარეო საქმეთა სამინისტრომ განაცხადა, ფიშერი ბერლინში დაბრუნდა საქართველოს ხელისუფლების მხრიდან ევროკავშირის და პირადად მის მიმართ “სიძულვილის კამპანიის“ გამო.
“რამდენიმე თვის განმავლობაში საქართველოს ხელმძღვანელობა ევროკავშირის, გერმანიისა და ასევე გერმანიის ელჩ ფიშერის წინააღმდეგ აგიტაციას აწარმოებდა. ამ მიზეზით, საგარეო საქმეთა მინისტრმა გადაწყვიტა ელჩი ფიშერი შემდეგი ნაბიჯების განსახილველად კონსულტაციებისთვის გაიწვიოს.
ხვალ ევროკავშირის საგარეო საქმეთა საბჭო საქართველოს საკითხს განიხილავს.” – ნათქვამია სამინისტროს განცხადებაში.
● ელჩის გაწვევა გერმანიისა და საქართველოს მთავრობებს შორის გამწვავებული დაძაბულობის ამჟამინდელი კულმინაციაა. სექტემბრის შუა პერიოდში ირაკლი კობახიძემ და შალვა პაპუაშვილმა ფიშერი გააკრიტიკეს ქვეყნის შიდა საქმეებში ჩარევის გამო და ღიად გაახმოვანეს მისი გაძევების სურვილიც.
● საქართველოში გერმანიის ელჩი, პეტერ ფიშერი საქართველოს საგარეო საქმეთა სამინისტროში 24 სექტემბერს დაიბარეს. უწყებაში შესვლამდე პიტერ ფიშერმა თქვა, რომ ეს უჩვეულო შემთხვევაა “მეგობრულ სახელმწიფოებს შორის” ურთიერთობაში.
● “ქართული ოცნების” პარლამენტის თავმჯდომარემ, შალვა პაპუაშვილმა 8 სექტემბერს სოციალურ ქსელში დაწერა, რომ გერმანიის ელჩისგან მხარდაჭერილი “ტიტუშკები“ თავს დაესხნენ “ქართული ოცნების“ თბილისის შტაბს.
● ამის შემდეგ, საქართველოში გერმანიის ელჩმა, პეტერ ფიშერმა სოციალურ პლატფორმა X-ზე დაწერა, რომ ევროპის საკითხებში გერმანიის სახელმწიფო მინისტრმა მის მიმართ, როგორც ელჩის მიმართ, გერმანიის მთავრობის სრული მხარდაჭერა გამოხატა.
● 10 სექტემბერს გერმანიის საგარეო საქმეთა სამინისტრომ განცხადება გაავრცელა, რომელშიც კატეგორიულად გმობს პარლამენტის თავმჯდომარის, შალვა პაპუაშვილის “უსაფუძვლო ბრალდებებს” და მოუწოდებს საქართველოს ხელისუფლებას, შეწყვიტოს ცრუ ნარატივების გავრცელება და შეცვალოს ამჟამინდელი პოლიტიკური კურსი.
● 24 სექტემბერს საქართველოში არსებულმა 27 საელჩომ ქვეყანაში დიპლომატიური მისიის როლისა და საქმიანობის შესახებ არსებულ ბრალდებებთან დაკავშირებით განცხადება გაავრცელა, რომელშიც ვკითხულობთ, რომ მსგავსი ბრალდებები ძირს უთხრის “ჩვენი დიპლომატიური მისიების მიერ მათი მოვალეობების შესრულების” შესაძლებლობას. განცხადებაში ასევე ხაზგასმულია, რომ დიპლომატების შეხვედრა როგორც მთავრობასთან, ისე ოპოზიციისა და სამოქალაქო საზოგადოების წარმომადგენლებთან, სრულიად შეესაბამება ვენის კონვენციას.
