ისტორიული დღე - საქართველო პირველ მატჩს ჩაატარებს ევროპის ჩემპიონატზე
საქართველო ევრო 2024-ზე
დღეს, თბილისის დროით 20:00 საათზე დორტმუნდში საქართველოს ნაკრები თურქეთის ეროვნულ ნაკრებს შეხვდება.
ეს ევრო 2024-ის F ჯგუფის პირველი მატჩია და პირველი მატჩია საქართველოს ისტორიაში ევროპის ჩემპიონატზე.
საქართველოს ნაკრები
სამენეჯერო სააგენტო Transfermarkt-ის მიხედვით, ამ დროისთვის საქართველოს ნაკრების ღირებულება 161 მლნ ევროს აღემატება.
ყველაზე ძვირად ღირებული 5 ფეხბურთელის სია ასე გამოიყურება:
საქართველოს ნაკრები:
- ხვიჩა კვარაცხელია – 80 მლნ ევრო “ნაპოლი”
- გიორგი მამარდაშვილი – 35 მლნ ევრო “ვალენსია)”
- გიორგი მიქაუტაძე – 15 მლნ ევრო “მეცი”
- ოთარ კიტეიშვილი – 5 მლნ ევრო “შტურმი”
- საბა ლობჟანიძე – 3 მლნ ევრო “ატლანტა იუნაიტედი”
ისტორიაში პირველად, საქართველოს ნაკრები საერთაშორისო ტურნირის ფინალში გავიდა. გადამწყვეტ მატჩში, რომელიც თბილისში 26 მარტს გაიმართა, ქართველებმა საბერძნეთის ნაკრები პენალტების სერიაში დაამარცხეს.
ისტორიული წარმატების ერთ-ერთ შემოქმედად მიუნხენის ბაიერნისა და საფრანგეთის ნაკრების ყოფილი ფეხბურთელი მწვრთნელი, ვილი სანიოლი ითვლება. საქართველოს ნაკრების მთავარი ვარსკვლავი და იმედი ევროპის ერთ-ერთ საუკეთესო ახალგაზრდა ფეხბურთელად აღიარებული “ნაპოლის” თავდამსხმელი ხვიჩა კვარაცხელიაა. “ნაპოლის”გულშემატკივრებმა, სადაც დიეგო მარადონა 80-იანი წლების ბოლოს თამაშობდა, ხვიჩას მეტსახელად კვარადონასაც კი შეარქვეს. 2023/24 წლების სეზონში ის ნეაპოლიტანელთა მეორე ბომბარდირი გახდა, გაიტანა 11 გოლი.
სამწუხარო ამბავი ის არის, რომ თურქეთთან მატჩს ტრავმის გამო გამოტოვებს ოთარ კიტეიშვილი, რომელიც მნიშვნელოვანი ფიგურაა ნაკრების ცენტრში.
ჩვენი მეტოქე – თურქეთი
საქართველოს მეტოქეს, მეზობელ თურქეთს დიდ ტურნირებზე მონაწილეობის დიდი გამოცდილება აქვს. თურქეთი ევროპის პირველობის ტრადიციული მონაწილეა 1996 წლიდან. „მთვარის ვარსკვლავებმა“ საუკეთესო შედეგი 2008 წელს აჩვენეს, როდესაც ნახევარფინალში გავიდნენ და გერმანიასთან 2-3 დამარცხდნენ. 2002 წელს კი თურქეთის ნაკრები მსოფლიო ჩემპიონატის ვერცხლის პრიზიორებიც კი გახდა.
ბოლო, 2021 (2020) წლის ევროპის ჩემპიონატი თურქეთის ნაკრებმა სამი წაგებით დაასრულა.
გუნდის ცენტრალური ფიგურა არის მილანის „ინტერის“ 30 წლის ნახევარმცველი ჰაკან ჩალხანოღლუ. საქართველო-თურქეთის მატჩის მასპინძელი ქალაქის, დორტმუნდის გუნდში თამაშობს კიდევ ერთი თურქი ნახევარმცველი, სალიჰ ოზჯანი. ნიდერლანდში გამორჩეული სეზონის შემდეგ, ლისაბონის „ბენფიკაში“ ასპარეზობს ნახევარმცველი ორკუნ კეკჩუ. თურქების მთავარი იმედი კი მადრიდის „რეალის“ 19 წლის ნახევარმცველი არდა გიულერია.
სამენეჯერო სააგენტო Transfermarkt-ის მიხედვით, ამ დროისთვის თურქეთის ნაკრების ფასი 324 მლნ ევროზე მეტია. ყველაზე ძვირად ღირებული 5 ფეხბურთელის სია ასე გამოიყურება:
თურქეთის ნაკრები:
- ჰაკან ჩალჰანოღლუ – 45 მლნ ევრო “მილანის ინტერი”
- ქენან ილდიზი – 30 მლნ ევრო “იუვენტუსი”
- არდა გიულერი – 30 მლნ ევრო “რეალი”
- ორკუნ კეკჩუ – 27 მლნ ევრო „ბენფიკა“
- ფერდი ქედიოღლუ – 21 მლნ ევრო
ჩვენს ნაკრებს მეზობლებთან ურთიერთშეხვედრებში უარყოფითი ბალანსი აქვს: 1 მოგება, 1 ფრე, 2 წაგება.
გულშემატკივარი
სავარაუდოა, რომ „სიგნალ იდუნა პარკ” არენაზე თურქი გულშემატკივრის სიჭარბე იქნება, რადგან გერმანიაში მძლავრი თურქული დიასპორაა, მით უმეტრეს, დორტმუნდში.
თუმცა, “ჯვაროსნების” გასამხნევებლად გერმანიაში ათსობით ქართველი გულშემატკივარი ჩავიდა. აქტიურობენ ევროპაში მცხოვრები ემიგრანტებიც. UEFA-მ საქართველოსთვის 10 ათასი ბილეთი გამოყო, რომელთა ფასებიც 30-დან 400 ევრომდე მერყეობდა და ყველა ბილეთი, საიტზე განთავსებიდან 3 საათში გაიყიდა.
გარდა რეგულარული და დამატებითი ავიარეისებისა, გერმანიაში თამაშებისთვის სრულდება სპეცრეისებიც. ამ რეისების ხარჯებს საქართველოს მთავრობა ბიუჯეტიდან ფარავს.
როგორც BMG წერს, ჩემპიონატისთვის თბილისსა და ქუთაისიდან 17 ჩარტერული რეისი დორტმუნდის, ჰამბურგის, კიოლნისა და დიუსელდორფის მიმართულებით სრულდება. აღნიშნულ რეისებზე 5 220 ბილეთი გაიყიდა.
ევრო – 2024-ზე სუბსიდირებულ ჩარტერულ ფრენებს ასრულებენ: Eurowings, Wizz Air, Hi Sky და Georgian Wings. ყველა სუბსიდირებული რეისი საქართველოს ეროვნული ნაკრების მატჩების განრიგზეა მორგებული. სუბსიდირებული, ცალმხრივი ავიაბილეთის ღირებულებაა 195 ევრო. შესაბამისად, ორმხრივი ავიაბილეთის ღირებულება 390 ევროს შეადგენს.
გერმანიის გარდა, ეროვნულ ნაკრებს თბილისსა და საქართველოს სხვა ქალაქებში რამდენიმე ლოკაციაზე ღია ცის ქვეშ უგულშემატკივრებენ.
საქართველოს ნაკრების ევროპული თავგადასავალი კი, 22 ივნისს – შაბათს ჩეხეთთან და 26 ივნისს პორტუგალიასთან გაგრძელდება.
პოლიტიკური კონტექსტი
საქართველო ისტორიულ ტურნირში მონაწილეობს ფართომასშტაბიანი პოლიტიკური კრიზისისა და მრავალათასიანი პროტესტების ფონზე „უცხოური გავლენის აგენტების“ კანონის წინააღმდეგ.
მიუხედავად დაპირისპირებისა და პოლარიზაციისა, როცა საქმე ფეხბურთს ეხება, ქართველ გულშემატკივარს დიდი ეროვნული ერთობის დემონსტრირება შეუძლია და ამის კარგიი მაგალითი სწორედ 26 მარტი იყო, როდესაც ისტორიულ გამარჯვებას ყველა ერთად ზეიმობდა.
