გვარამიას საქმის მოსამართლის სოლიდარობის ნიშნად, 5 მოსამართლე აშშ-ში არ წავიდა
5 მოსამართლე აშშ-ში არ წავიდა
ნიკა გვარამიას საქმის მოსამართლის, ლაშა ჩხიკვაძის მიმართ სოლიდარობის ნიშნად, რომელიც აშშ-ს საელჩომ კვალიფიკაციის ამაღლების პროგრამიდან ამოიღო, 5 მოსამართლე აშშ-ში არ წავიდა.
საუბარია სისხლის სამართლის ხუთ მოსამართლეზე:
- ხათუნა ხარჩილავა;
- ნინო ნაჭყებია;
- მაია ქოქიაშვილი;
- გიზო უბილავა;
- რომეო ტყეშელაშვილი.
ამ ყველაფერს წინ უძღოდა მმართველი პარტიის თავმჯდომარის, ირაკლი კობახიძის განცხადება, რომელმაც თქვა, რომ “მოსამართლისთვის ვიზიტის გაუქმება რომ ეკადრა ვინმეს, სხვა მოსამართლეებიც გააუქმებდნენ”.
“ან ის რატომ ჰგონიათ, რომ ამერიკაში წასვლა-არ წასვლის გამო, რომელიმე მოსამართლე ვინმემ გავლენის ქვეშ შეიძლება მოაქციოს? ვინმეს მართლაც რომ ეკადრა მოსამართლისთვის ვიზიტის გაუქმება, დარწმუნებული ვარ, ეს პირიქით, უკუშედეგს გამოიღებდა და ვიზიტს სხვა მოსამართლეებიც გააუქმებდნენ.
საქართველოში კარგად იციან ღირსებისა და კოლეგიალობის ფასი და დარწმუნებული ვარ, კოლეგა მოსამართლის დისკრიმინაციის ფონზე ამერიკაში წასვლას არცერთი სხვა მოსამართლე აღარ იკადრებდა.” – აღნიშნა კობახიძემ.
16 მაისს, სასამართლო დარბაზში დააპატიმრეს ქვეყნის ყველაზე პოპულარული ოპოზიციური ტელეკომპანიის, “მთავარის” გენერალური დირექტორი ნიკა გვარამია. კრიტიკული მედიის ხელმძღვანელს სამი წლით და ექვსი თვით თავისუფლების აღკვეთა მიესაჯა ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.
მას შემდეგ, რაც ჩხიკვაძემ გვარამიას პატიმრობა მიუსაჯა, მედიაში გავრცელდა ინფორმაცია, რომ ის აშშ-ის მთავრობის დაფინანსებული პროგრამით შეერთებულ შტატებში საქმეზე გამოტანილი განაჩენის გამო აღარ გაემგზავრება. აღნიშნული დაადასტურა თავად ჩხიკვაძემაც.
დამოუკიდებელი ექსპერტები, არასამთავრობო ორგანიზაციების წარმომადგენლები და პოლიტიკოსები გვარამიას დაკავებას პოლიტიკურად მოტივირებულად მიიჩნევენ.
მკაცრს შეფასებას აკეთებს აშშ-ის საელჩო – ის პროცესში “შერჩევით გამოძიებასა და სისხლისსამართლებრივი დევნის შემაშფოთებელი პრაქტიკას ხედავს, მიმართულს ამჟამინდელი მთავრობის ოპოზიციაში მყოფი პირების მიმართ”.
ხოლო საქართველოს ოთხი ოპოზიციური ტელევიზიის მენეჯერები მოუწოდებენ დასავლეთს, არ მისცეს საშუალება ოლიგარქიულ რეჟიმს საბოლოოდ მოკლას დემოკრატია ქვეყანაში.
