"26 მაისს მოდით ჩვენთან და არა იმ აღლუმზე" - ნამახვანჰესის მოწინააღმდეგეებმა რუსთაველი გადაკეტეს
ნამახვანჰესის მშენებლობის მოწინააღმდეგეებმა რესპუბლიკის მოედნიდან მსვლელობით ჯერ „მშრალი ხიდისკენ“ გადაინაცვლეს, სადაც გზა გადაკეტეს, შემდეგ კი თავისუფლების მოედნისკენ გაემართნენ და მომავალი გეგმების შესახებ ისაუბრეს. მათი თქმით, ისინი რუსთაველის გამზირს გადაკეტავენ და მანამ არ დაიშლებიან, სანამ მათ მოთხოვნებს ხელისუფლება არ დააკმაყოფილებს.
ნამახვანჰესის მშენებლობის მოწინააღმდეგეებმა გუშინ რესპუბლიკის მოედანზე კარვები გაშალეს და განაცხადეს, რომ ისინი კარვებში ღამის გათენებას აპირებენ. აქციის მონაწილეების თქმით, ისინი უკან არ დაიხევენ.
“რიონის მცველები” ითხოვენ:
● შეჩერდეს ნამახვანჰესის მშენებლობა, კომპანია ENKA-მ დატოვოს რიონის ხეობა;
● გაუქმდეს ნამოხვანის ჰესების კასკადზე 2015 წელს გაცემული სამშენებლო ნებართვა და ყველა სხვა მასზე დაფუძნებული დოკუმენტი;
● გამოცხადდეს მორატორიუმი ენერგოსექტორში;
● თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა;
● დადგეს ყველა იმ პირის პასუხისმგებლობის საკითხი, ვინც ჩართულია ამ პროექტში – აღიძრას სისხლის სამართლის საქმე, არა მარტო ნათია თურნავას მიმართ, არამედ ყველა იმ პირთან დაკავშირებით, ვინც ხელს აწერს კონკრეტულ დოკუმენტაციებს.
აქციის ორგანიზატორის, ვარლამ გოლეთიანის თქმით, პარლამენტის თავმჯდომარის, კახა კუჭავას აპარატიდან აქტივისტებთან შეხვედრასთან და მის ფორმატთან დაკავშირებით კომუნიკაციაზე აღარ გამოსულან, ამიტომ ისინი გადადიან მოქმედების სხვა გეგმაზე. დილის საათებში ვარლამ გოლეთიანი ამბობდა, რომ მათ პარლამენტის თავმჯდომარისგან შეხვედრის შემოთავაზება მიიღეს.
თავად პარლამენტის თავმჯდომარის, კახა კუჭავას განმარტებით, აქტივისტების მიერ შეთავაზებული შეხვედრის ფორმატი არ არის კონსტრუქციულობის ჩარჩოში. კუჭავა ამბობს, რომ შეუძლებელია ეს საკითხები ასეულობით ადამიანთან ერთად იყოს განხილული.
_____________________________________
● “არა ნამახვანჰესს!” რატომ აპროტესტებენ საქართველოში დიდი ჰესების მშენებლობას
● “მოვახდენთ დედაქალაქის პარალიზებას” – თბილისში ნამახვანჰესის წინააღმდეგ საპროტესტო აქცია გაიმართა
______________________________________
მსვლელობას წინ უძღოდა ინციდენტი, რომელიც რადიკალური, ჰომოფობიური ჯგუფის წევრებსა და სამოქალაქო აქტივისტ, სალომე ბარკერს შორის მოხდა. ლგბტქ+ სამკლაურის გამო სამოქალაქო სალომე ბარკერი აქციიდან გააგდეს.
სალომე ბარკერის თქმით, რადიკალური ჯგუფის ლიდერის, გურამ ფალავანდიშვილის შვილმა, ალექსანდრე ფალავანდიშვილმა მას უთხრა, რომ სიმბოლიკა მოეხსნა, რაზეც მან უარი თქვა, რასაც მათი მხრიდან შეურაცხმყოფელი შეძახილები მოჰყვა.
“ძალიან მრცხვენია. მე აქ მხარდასაჭერად მოვედი და არაფერი მსგავსი არ მინდოდა, რაც ახლა აქ მოხდა. მოკითხონ იმ ადამიანებს, ვინც იქ ჰყავთ მხარდამჭერებად. აგრესიული ხალხია და რადგან აგრესიულები არიან, გამოვერიდე”, – თქვა სალომე ბარკერმა.
„26 მაისს აღლუმის ნაცვლად მოდით ჩვენთან“ – ვარლამ გოლეთიანი
“როგორც გონიერი საზოგადოება ვცდილობთ არ გადავიდეთ დესტრუქციაში და მშვიდობით მივიყვანოთ ეს ბრძოლა ბოლომდე. არ დავანებებთ ხელისუფლებას რომ იმ ვექტორზე წაგვიყვანოს რომელიც აწყობს თავად, ეს არის გზა ძალადობისკენ და პარტიული დღისწესრიგისკენ, რომელიც ჩაახშობს ამ ჯანსაღ და ნამდვილ მოძრაობას.
ჩვენ დავიძვრებით თავისფლების მოადენაზე. მინდა გითხრათ, რომ 26 მაისი არის ჩვენი დღე, მოვუწოდებთ ყველას 26 მაისს არ მივიდნენ იმ აღლუმზე, არამედ მოვიდნენ ჩვენთან და ვთქვათ რომ ეს ქვეყანა გვეკუთვნის ჩვენ“, – განაცხადა ვარლამ გოლეთიანმა.
საქართველოს დამოუკიდებლობის დღის აღსანიშნავი ღონისძიების გამო, 22 მაისიდან თავისუფლების მოედანი გადაკეტილია.
თავისუფლების მოედნიდან აქციამ რუსთაველის მეტროსთან გადაინაცვლა, სადაც მათ გზა გადაკეტეს. ვარლამ გოლეთიანმა მოუწოდა საქართველოს ყველა მოქალაქეს, შეუერთდეს ამ აქციას:
“მივიღეთ გადაწყვეტილება, რომ დავიძრათ რესპუბლიკის მოედანზე და რუსთაველის ქუჩა გადავკეტოთ დღეს და არ გაიხსნება, ვიდრე არ შესრულდება ჩვენი მოთხოვნები.”
ვარლამ გოლეთიანმა სიტყვით გამოსვლისას ასევე განაცხადა, რომ ხვალ ისინი აჩვენებენ გაცილებით მეტ ძალას.
“ჩვენ ხვალ, 16:00 საათზე ვაჩვენებთ გაცილებით უფრო მეტ ძალას, ვიდრე ვართ დღეს. გაცილებით მეტნი ვიქნებით, თუნდაც ამ მოედანზე. დავიძვრებით მსვლელობით და გადავკეტავთ მნიშვნელოვან ადგილებს. ლოკაციას დღეს სპეციალურად არ ვასახელებთ და მოვაწყობთ პიკეტირებას. ეს პროცესი გაგრძელდება იქამდე, ვიდრე არ დაკმაყოფილდება ქართველი ხალხის მოთხოვნა“, – განაცხადა გოლეთიანმა.
_____________________________________
● მათი ხეობა. როგორ იცავენ ადგილობრივები საკუთარ სახლებს ნამახვანჰესის დიდი პროექტისგან. VIDEO
● „ორ ადამიანს დავიტოვებ, ჭამა-სმა ჩემზე იყოს“. თბილისი ნამახვანჰესის წინააღმდეგ მასშტაბური აქციისთვის ემზადება
● პოლიციამ სოფელ გუმათთან რკინის ბარიკადები აღმართა. რა ხდება რიონის ხეობაში
___________________________________
“ნამახვანიჰესი” – ასე ჰქვია პროექტს, რომლის განხორციელების შემთხვევაში იგი დამოუკიდებლობის გამოცხადების შემდეგ ქვეყნის ისტორიაში უდიდესი ენერგეტიკული პროექტი იქნება. პროექტს თურქეთის უმსხვილესი სამშენებლო კომპანია ENKA ახორციელებს და მისი ღირებულება 800 მილიონი აშშ დოლარია.
თუმცა, გარემოსდამცველებს და ადგილობრივ მოსახლეობას პროექტთან დაკავშირებით ბევრი კითხვა აქვთ. ისინი შიშობენ, რომ მასშტაბური ჰესი საფრთხეს შეუქმნის პატარა ხეობას, შექმნის სეისმურ საფრთხეს, შეცვლის მიკროკლიმატს, დააზიანებს უნიკალურ ვაზის ჯიშებსა და ღვინის წარმოებას.
ხელისუფლება კი, რომელიც აღნიშნული პროექტის მთავარი ლობისტია, ირწმუნება, რომ საფრთხეები გაზვიადებულია და ახალი ჰიდროელექტროსადგურების მშენებლობის გარეშე საქართველოს რამდენიმე წელიწადში სერიოზული პრობლემები ელის ენერგეტიკული უსაფრთხოების კუთხით.
ხუთ თვეზე მეტია, მდინარე რიონის ხეობაში არ წყდება პროტესტი ნამახვანის ჰესის პროექტის წინააღმდეგ.
2020 წლის ოქტომბრის ბოლოს, ადგილობრივმა მაცხოვრებლებმა და სამოქალაქო აქტივისტებმა წყალტუბოს მუნიციპალიტეტის სოფელ ჯონეთში კარვები გაშალეს. მათ ENKA– ს მოსთხოვეს დაუყოვნებლივ შეეჩერებინა სამუშაოები და ხეობიდან ტექნიკა გაეყვანა.
ელენე ასათიანის ეს ფილმი რიონის ხეობის მცველებზეა, თუ როგორ დაუკავშირეს მათ საკუთარი ცხოვრება ხეობის პროტესტს ჰესის წინააღმდეგ:
3 აპრილს პოლიციამ ნამახვანისკენ მიმავალი გზა ორივე მხრიდან ჩაკეტა და ადგილობრივები ტერიტორიაზე არ შეუშვა, რასაც მასობრივი პროტესტი მოჰყვა.
მაშინ ხეობაში კომპანია ENKA– ს ახალი დირექტორი მერან ლომინაძე პოლიციის თანხლებით ჩავიდა. აქტივისტები მას შეძახილებით – “მონა” და “წადი” დახვდნენ.
ამის შემდეგ აქცია ჯერ წყალტუბოში, შემდეგ კი ქუთაისში გაიმართა. სწორედ მაშინ გადაწყდა მასშტაბური აქციის თბილისში გამართვა. საპროტესტო აქცია გუშინ, 23 მაისს დაიწყო. პროტესტის ერთ-ერთმა ორგანიზატორმა, ვარლამ გოლეთიანმა ხელისუფლებას მოთხოვნების დასაკმაყოფილებლად დრო 24 მაისს 12:00 საათამდე
