სომხეთში კორუფციაში ეჭვმიტანილი გენერლის თავიდან დაპატიმრებას მოითხოვენ

სომხეთში პირველი ინსტანციის სასამართლომ, 25 მილიონი დრამის (55 ათასი დოლარი) გირაოს სანაცვლოდ, გენერალი მანველ გრიგორიანის გათავისუფლების გადაწყვეტილება მიიღო. ამის კვალდაკვალ გენერლის მშობლიური ქალაქის, ეჩმიაძინის ქუჩებში ასობით აღშფოთებული ადამიანი გამოვიდა. ისინი სასამართლოს გადაწყვეტილებას აპროტესტებენ და ყოფილი დეპუტატის თავიდან დაპატიმრებას მოითხოვენ.

რა ედება ბრალად გრიგორიანს?

თავიდან სომხეთის გენერალურმა პროკურორმა, გენერალ მანველ გრიგორიანის მიმართ იარაღისა და საბრძოლო მასალების უკანონოდ შეძენისა და შენახვის შესახებ ეჭვის გამო, მისთვის დეპუტატის ხელშეუხებლობის ჩამორთმევის თაობაზე შუამდგომლობა წარმოადგინა. გრიგორიანი იყო ეროვნული საკრებულოს დეპუტატი სომხეთის ჯერ კიდევ ახლახან მმართველი რესპუბლიკური პარტიიდან.

ეროვნული უშიშროების სამსახურმა გრიგორიანის საკუთარ სახლსა და აგარაკზე ჩხრეკა ჩაატარა და იარაღის დიდი რაოდენობის გარდა, აღმოაჩინა ჯარისთვის განკუთვნილი კონსერვები, პირადი ჰიგიენის საშუალებები, ქვედა საცვლები. ამ საშუალებებს 2016 წლის აპრილში ყარაბაღში სიტუაციის გამწვავების დროს მთელი მსოფლიო აგროვებდა – რიგითი მოქალაქეები, სოციალურად დაუცველებიც კი, ასევე სხვადასხვა საზოგადოებრივი და კომერციული ორგანიზაციები.

ეროვნული უშიშროების ვიდეოკადრებში სომხეთის მაცხოვრებლებმა იხილეს ასევე გრიგორიანის ავტოპარკები – ათობით მანქანით, მათ შორის რარიტეტულებით, და უძრავი ქონების საკუთრების დამადასტურებელი მრავალრიცხოვანი საბუთი.

ასევე აღმოჩნდა, რომ გენერალს აქვს ერთგვარი ზოოპარკი ვეფხვებით, დათვებით და სირაქლემებით – ამ ცხოველებს ჯარისკაცებისთვის განკუთვნილი ულუფებით კვებავდნენ.

სომხეთის პრემიერ-მინისტრმა ნიკოლ ფაშინიანმა მანველ გრიგორიანის საქმეს სომხეთის ისტორიაში ყველაზე დიდი კორუფციული მხილება უწოდა.

ეროვნული უშიშროების ვიდეოს სოციალური ქსელების მომხმარებლები მწვავედ განიხილავდნენ. ადამიანები შოკირებულები იყვნენ იმით, რაც შეიტყვეს, და ანგარიშსწორებას მოითხოვდნენ.

რატომ გაათავისუფლეს გრიგორიანი?

აღმკვეთი ღონისძიების შეცვლის მიზეზად კი მანველ გრიგორიანის ჯანმრთელობის პრობლემა იქცა. ბოლო კვირების განმავლობაში ადვოკატმა არაერთხელ თქვა, რომ მისი კლიენტი სიკვდილის პირასაა. მანველ გრიგორიანს ონკოლოგიური დაავადება აქვს.

დაცვა მიიჩნევს, რომ გრიგორიანის ციხეში დატოვებას არავითარი აზრი არ აქვს, რადგან ეს უკანასკნელი ობიექტურ გამოძიებას არანაირ წინააღმდეგობას არ გაუწევს და ქვეყნის დატოვებას არ აპირებს.

• დიდი კორუფციული მხილება სომხეთში — ცნობილი დეპუტატი სავარაუდოდ, ჯარისკაცების საკვებს იპარავდა

• კორუფციასთან ბრძოლა სომხეთში: მთავრობის პირველი ნაბიჯები

რატომ გამოვიდნენ ადამიანები ქუჩებში?

სასამართლოს გადაწყვეტილებიდან მეორე დილით ეჩმიაძინის პროტესტანტებმა ერევანი-ეჩმიაძინის და ერევანი-არმავირის გზები გადაკეტეს. ისინი იუსტიციის მინისტრთან და გენერალურ პროკურორთან შეხვედრას მოითხოვდნენ. მათ სურდათ მიეღოთ განმარტება, თუ რამ განაპირობა სასამართლოს გადაწყვეტილება.

ამის შემდეგ საპროტესტო აქციები დედაქალაქში გაგრძელდა. საბოლოოდ, პროტესტანტებმა სომხეთის გენერალურ პროკურორთან არტურ დავტიანთან შეხვედრა მოახერხეს. მან განაცხადა, რომ გენერალურმა პროკურატურამ უკვე მიიღო პირველი ინსტანციის სასამართლოს განაჩენის გასაჩივრების გადაწყვეტილება:

 „ჩვენი აზრით, მისი დაავადება ისეთი არ არის, რომ პატიმრობაში ყოფნასთან შეუთავსებელი იყოს. იმისთვის, რომ იმ დაავადებების შეუთავსებლობა დადგინდეს, რაც ბრალდებულს აწუხებს, დაინიშნა ექსპერტიზა, და ამ ექსპერტიზის დასკვნა ჯერ არ არსებობს“.

გენერალურმა პროკურორმა ასევე განაცხადა, რომ ისინი დარწმუნებულები არ არიან, რომ თავისუფლებაზე მყოფი გენერალური პროკურორი მანველ გრიგორიანი გამოძიებაზე ზეწოლას არ მოახდენს:

 „ჩვენ იმის ვარაუდის გვაქვს, რომ თავისუფლად მყოფი მანველ გრიგორიანი კანონით მოთხოვნილ სათანადო ქცევას არ გამოავლენს. ჩვენ ამ ვარაუდების საფუძველს დავასაბუთებთ“.

სოციალური ქსელების რეაქცია

სოციალური ქსელების მომხმარებლებმა მანველ გრიგორიანის გათავისუფლებაზე მთლიანობაში უარყოფითი რეაგირება მოახდინეს. აი, ორიოდე სახასიათო ჩანაწერი სოციალურ ქსელ Facebook-დან:

 „დამთავრდა, ახალი მთავრობა. რწმენა აღარ არსებობს, ყველა ფულს დასდევს“.

 „თუ გათავისუფლებას უპირებდით, მაშინ ასეთი საქვეყნო დაპატიმრება რაღაში გჭირდებოდათ?“