აზერბაიჯანში შეიარაღებული ძალების ასი წლისთავი აღნიშნეს
აზერბაიჯანმა შეიარაღებული ძალების დღე აღნიშნა – სამხედროების პროფესიონალური დღე. 26 ივნისი – 1998 წლიდან სახელმწიფო დღესასწაული და არასამუშაო დღეა.
ეს თარიღი იმის გამო შეირჩა, რომ 1918 წლის 26 ივნისს, აზერბაიჯანის დემოკრატიული რესპუბლიკის (პირველი რესპუბლიკა) მთავრობის დადგენილებით, ცალკეული აზერბაიჯანული კორპუსი შეიქმნა. ფაქტობრივად, ეს აზერბაიჯანის პირველი დამოუკიდებელი არმია იყო, რომელიც მანამდე რუსეთის იმპერიის შემადგენლობაში შედიოდა. ამ არმიამ რამდენიმე წელიწადს იარსება, ვიდრე აზერბაიჯანი სსრკ-ს წევრი არ გახდა. მისი რეანიმირება უკვე 1991 წელს მოხდა, როდესაც აზერბაიჯანის უზენაესმა საბჭომ ეროვნული თავდაცვის ძალების შექმნის შესახებ კანონი მიიღო.
ამრიგად, ახლანდელი 26 ივნისი – ეს არამხოლოდ დღესასწაულია, არამედ ასი წლის იუბილეც. ამის აღსანიშნავად აზალდიგის მოედანზე, დედაქალაქის ცენტრში ჩატარდა აღლუმი, რომელშიც დაახლოებით 4 ათასამდე სამხედრო, 240 ერთეული ტექნიკა და 70 საფრენი აპარატი მონაწილეობდა.
თავდაცვის სამინისტროსთვის ეს კიდევ „სიახლეების“- მაგალითად, ახლახან მიღებული შორი მოქმედების სარაკეტო-საარტილერიო სისტემისა და ამერიკული ვერტმფრენების Bell-412-ის ჩვენების საშუალებაც იყო.
ბაქოელები, უკვე რამდენიმე დღეა, ჩივიან, რომ აღლუმისთვის მზადება მათ ცხოვრებას მნიშვნელოვნად ართულებს. იმის გამო, რომ ბევრი ადგილობრივი გზა გადაკეტილი იყო, ადამიანებს ან საცობებში დგომა უწევდათ, ანდა დანიშნულების ადგილამდე ფეხით მისვლა. ერთიც და მეორეც არცთუ სასიამოვნოა, რადგან ბაქოში ნამდვილი ზაფხული დაიწყო, 35-გრადუსიანი სიცხით.
