"Yaddaşında itkilər, zəiflik var, oturub-durmaqda da çətinlik çəkir" - Tofiq Yaqublunun vəkili
Aclıq aksiyasına görə siyasətçinin səhhəti kritikləşir
Azərbaycan müxalifətinin tanınmış simalarından biri, 35 gündür aclıq aksiyası edən Tofiq Yaqublunun bu gün onunla görüşən vəkili deyir ki, siyasətçinin səhhəti kritikdir.
1 aprel 2025-ci ildən etibarən ölüm aclığına başladığını elan edən Tofiq Yaqublu, bu addımı ona qarşı çıxarılan 9 illik azadlıqdan məhrumetmə hökmünə etiraz olaraq atdığını deyir.
Tofiq Yaqublu Müsavat Partiyası və Milli Şuranın aparıcı fiqurlarından biridir. 1992-1993-cü illərdə Binəqədi Rayon İcra Hakimiyyətində rəhbər vəzifəsində çalışıb. 1998, 2013, 2020 və 2023-cü illərdə siyasi motivli ittihamlarla cinayət məsuliyyətinə cəlb edilib. 2011, 2019 və 2022-ci illərdə isə inzibati qaydada həbs olunub. Beynəlxalq təşkilatlar tərəfindən siyasi məhbus kimi tanınır.
Vəkili Nemət Kərimli Ədliyyə Nazirliyinin müalicə müəssisəsində Yaqublu ilə görüşüb. O bildirir ki, siyasətçi əvvəlkindən daha ağır hərəkət edir:
“Oturub-durmaqda da çətinlik çəkir. Bildirdi ki, artıq yata bilmir… Bədənin ağrılarından şikayət edir. Yaddaşında itkilər, zəiflik var. Görüş çox qısa, təxminən 15 dəqiqə çəkdi, çünki Tofiq bəy otura bilmirdi və uzanmaq istəyirdi. Məhkəmə prosesini müzakirə etdik”.
Aclıq aksiyasına başlayanda Yaqublunun çəkisi 95.6 kq açıqlanmışdı, mayın 4-ə olan çəkisi isə 77.8 kq kimi açıqlanıb.
Siyasətçinin qızı Nigar Həzi bildirib ki, artıq atası ölür və mayın 4-də baş tutan görüş zamanı Yaqublu ailəsi ilə vidalaşıb.
“Atamın yanına doktor Adil Qeybullanı buraxmırlar, artıq 26 apreldən bəri icazə verilmir. Dövlət qurumları isə nə zənglərimizə, nə dəki, mesajlarımıza cavab verir. Bu susqunluğun bir adı var, Prezident Administrasiyasından Yaqublunun öldürülməsi tapşırığının verilməsi”.
Sabah, mayın 6-da Bakı Apellyasiya Məhkəməsində Yaqublunun hökmündən verilmiş şikayətinə baxılacaq.
Tofiq Yaqublu haqda
Tofiq Yaqublu birinci dəfə 1998-ci il prezident seçkilərindən əvvəl, 12 sentyabr 1998-ci ildə Fəvvavələr meydanında baş tutan müxalifətin mitinqində həbs edilib. İstintaq müddətində həbsdə saxlanılıb, sonda Nizami Rayon Məhkəməsinin qərarı ilə 2 il müddətinə şərti azadlıqdan məhrumetmə cəzası alıb. Yaqublu bu ittihamın saxta olduğunu, siyasi sifarişlə həbs olunduğunu bildirmişdi.
Daha sonra o, 2013-cü ilin fevralında İsmayıllı rayonunda baş vermiş etirazlar əsas göstərilərək Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri əsas göstərilərək həbs edilib.
Yaqublu Şəki Ağır Cinayətlər Məhkəməsinin 17 mart 2014-cü il tarixli qərarı ilə 5 il müddətinə azadlıqdan məhrum edilib.
Beynəlxalq ictimaiyyət, ABŞ və Avropa İttifaqı tərəfindən həbsi sərt tənqid edilib.
Həbsdə olduğu müddətdə qızı Nərgiz Yaqublu vəfat edib.
2016-cı ilin martından əfv sərəncamı ilə azadlığa buraxılıb.
2020-ci ilin martından isə siyasətçi Cinayət Məcəlləsinin 221-ci (xuliqanlıq) maddəsi əsas göstərilərək həbs edilib. Hüquq müdafiəçilərinin əsassız və qurama adlandırdığı cinayət işinin istintaqının sonunda Tofiq Yaqublu Nizami Rayon Məhkəməsinin qərarı ilə 4 il 3 ay müddətinə azadlıqdan məhrum edilib.
Sentyabrın 2-dən etibarən ölüm aclığına başlayan Yaqublu qərarın elan edilməsindən 16 gün sonra, sentyabrın 18-də ev dustaqlığına buraxılıb.
Hazırda Tofiq Yaqublu 2025-ci ilin aprelin 1-dən etibarən başlatdığı aclıq aksiyasını davam etdirir. O, bu aksiyanı ölüm aclığı kimi elan edib.
Aclıq aksiyasına görə siyasətçinin səhhəti geriləyir
