Xocalı faciəsinin 30-cu ildönümündə Azərbaycan qurbanları anıb
Bakıda və Azərbaycanın digər şəhərlərində birinci Qarabağ müharibəsi zamanı, 1992-ci il fevralın 26-da baş vermiş Xocalı faciəsinin qurbanlarının xatirəsi anılıb. Ölkə sakinləri faciənin 30-cu ildönümünü “Ana fəryadı” abidəsi önünə yürüş etməklə, gül dəstələri və çələnglər qoymaqla yad ediblər.
- Azərbaycanlı deputatlar Yerevanda: etiraz aksiyaları fonunda “Avronest” iclası
- “Qarabağda separatçı əhval Moskvadan idarə olunur” – Bakıdan şərh
- Azərbaycan Qarabağda antiterror əməliyyatı keçirə bilər – Bakıdan şərh
Bakıda birinci Qarabağ müharibəsi zamanı, 1992-ci il fevralın 26-da Xocalıda baş verən faciənin 30-cu ildönümündə kütləvi yürüşlər baş tutub. Ölkə sakinləri faciə qurbanlarının xatirəsini həmin günün rəmzi olan “Ana fəryadı” abidəsinin qarşısına gül dəstələri və çələnglər qoymaqda anıblar.
Azərbaycan XİN-in bəyanatı
Azərbaycanın Xarici İşlər Nazirliyi Xocalı faciəsinin 30-cu ildönümü ilə bağlı bəyanat yayıb.
“Ermənistanın Azərbaycana qarşı onilliklər ərzində davam edən təcavüzü zamanı dinc əhaliyə qarşı törədilmiş ən ağır cinayətlərdən biri və Birinci Qarabağ müharibəsinin ən faciəli səhifəsi Xocalı şəhərinin dağıdılması və onun sakinlərinin soyqırımına məruz qalması olmuşdur.
Münaqişədən əvvəl Azərbaycanın Qarabağ bölgəsində yerləşən Xocalıda 7000-dən çox insan, kişilər, qadınlar, uşaqlar, ailələr yaşayırdı.
1991-ci ilin oktyabr ayından şəhər tamamilə Ermənistan silahlı qüvvələri tərəfindən mühasirəyə alındı. 1992-ci il fevralın 25-dən 26-na keçən gecə kütləvi artilleriya zərbələrinin ardınca Ermənistan silahlı qüvvələri, keçmiş SSRİ-nin əksəriyyətini ermənilər təşkil edən 366-cı moto-atıcı alayının köməyi ilə Xocalıya nəzarəti zorla ələ keçirdilər. İşğalçılar Xocalını darmadağın edərək xüsusi amansızlıqla onun dinc əhalisinin soyqırımını törətdilər.
Şəhərin 5 379 nəfər sakini zorakılıqla qovuldu. 613 nəfər, o cümlədən 63 uşaq, 106 qadın və 70 qoca vəhşicəsinə öldürüldü. 1 275 insan əsir və girov götürülərək işgəncələrə məruz qaldı, 487 nəfər müxtəlif dərəcəli bədən xəsarətləri aldı. 150 nəfərin, o cümlədən 68 qadın və 26 uşağın taleyi bu günədək məlum deyil. Ermənistan silahlı qüvvələrinin bu hərəkətləri ailələri parçaladı. 8 ailə tamamilə məhv edildi. 130 uşaq valideynlərdən birini, 25 uşaq isə valideynlərinin hər ikisini itirdi.
Xocalıda dinc əhalinin heç bir fərq qoyulmadan qətlə yetirilməsi Ermənistanda dövlət səviyyəsində həyata keçirilən azərbaycanlılara qarşı etnik nifrət və irqi ayrı-seçkilik siyasətindən irəli gəlir”, – Azərbaycanın Xarici İşlər Nazirliyinin bəyanatında deyilir.
