Paşinyan azərbaycanlı hərbçinin ekstradisiyası, Əliyevlə görüşü və Medvedevin bəyanatı haqqında
Paşinyan azərbaycanlı hərbçinin ekstradisiyası haqqında
Azərbaycanlı hərbçi Nəsimi Musayevin ekstradisiyası müzakirə olunmur, Bakı belə bir tələb irəli sürməyib. Bunu Ermənistanın baş naziri Nikol Paşinyan ənənəvi bir saatlıq brifinqində jurnalistlərə bildirib.
“Ekstradisiya nə məsələdir? Belə bir məsələ yoxdur, biz bunu müzakirə etmirik. Azərbaycan tərəfindən heç bir sorğu daxil olmayıb”, – deyə o bildirib.
Eyni zamanda, Paşinyan vurğulayıb ki, Musayev cinayət törətməsəydi, Ermənistan onu elə həmin gün geri qaytarardı.
Paşinyanın qiymətləndirməsinə görə, Ermənistan sərhədini qanunsuz keçərək Şəki kəndinin sakininə atəş açan azərbaycanlı “adi cinayət” törədib. Baş nazir bunu sərhədyanı cinayətkarlığın digər növləri ilə müqayisə edib:
“Bizdə sərhədlərarası cinayətlərin başqa halları da olur. Ermənistana daim narkotik vasitələr gətirilir və Ermənistan ərazisindən tranzitlə daşınır. Bundan apokalipsis yaratmaq lazım deyil”.
Baş nazir hesab etmir ki, Şəki kəndində baş vermiş insident Ermənistanla Azərbaycan arasında sülh prosesini təhlükə altına qoya bilər.
Paşinyan əldə olunmuş sülhü qorunmalı olan nailiyyət hesab edir. O xəbərdarlıq edib ki, sülhü bir gün ərzində məhv etmək olar, lakin indiki vəziyyətə yenidən nail olmaq üçün daha 30 il lazım gələ bilər. Buna görə də baş nazir sülh prosesinə təhlükə yarada biləcək bəyanatlarla çıxış etməyi məqsədəuyğun saymır.
2026-cı il oktyabrın 1-də Nəsimi Musayev Ermənistanın Sünik vilayətinin Şəki kəndinə qanunsuz daxil olub. Yerli sakinlər onu evlərdən birində aşkar etdikdə Musayev avtomat silahdan atəş açaraq 39 yaşlı qadını yaralayıb. Hadisə qadının üç uşağının gözü qarşısında baş verib. Qadının iki oğlu da xəsarət alıb, qızı isə hələ də psixoloji sarsıntıdan qurtula bilməyib.
Musayev atəş açdıqdan sonra qaçıb, lakin bir qədər sonra başqa bir evdə saxlanılıb. Ermənistan Prokurorluğu Cinayət Məcəlləsinin beş maddəsi üzrə cinayət təqibinə başlayıb. O, xüsusilə sərhədi qanunsuz keçməkdə, yerli sakinin sağlamlığına ağır zərər vurmaqda və mənzil toxunulmazlığını pozmaqda ittiham olunur. Məhkəmə onun barəsində iki aylıq həbs qətimkan tədbiri seçib.
Brifinq zamanı baş nazir Dmitri Medvedevin Ermənistanın “yeni Ukrayna”ya çevrilməsi ilə bağlı qalmaqallı bəyanatına, MDB sammiti çərçivəsində Əliyevlə mümkün görüşünə və itkin düşmüş şəxslər məsələsinə də toxunub.
- Ermənistan ərazisinə keçən azərbaycanlı hərbçi yerli sakinlərə atəş açıb
- Ermənistan-Azərbaycan münasibətlərində böhran: daxili və xarici amillər
- Laçındakı görüş: Azərbaycan və Ermənistan enerji sistemlərini birləşdirməyə nə qədər yaxındır?
“Rəsmi görüşlər planlaşdırılmayıb”: Putin və Əliyevlə təmaslar haqqında
Oktyabrın 8-9-da Paşinyan Türkmənistanda keçiriləcək MDB sammitində iştirak edəcək. Rusiya və Azərbaycan prezidentləri ilə mümkün görüşlərdən danışan baş nazir xatırladıb ki, Putin və Əliyevlə son görüşləri ötən ay Bişkekdə baş tutub. Bundan bir gün əvvəl isə o, Rusiya prezidenti ilə telefonla danışıb.
“Format elədir ki, Rusiya və Azərbaycan prezidentləri ilə təmaslar, şübhəsiz, olacaq. Bu gün və sabah eyni məkanda olacağıq. Rəsmi görüş planlaşdırılmayıb. Əgər birdən belə bir zərurətin olduğu aydınlaşarsa, görüş baş tuta bilər”, – deyə o bildirib.
“Ermənistan artıq belə bir təhlükə ilə üzləşib”: Medvedevə cavab
Ermənistanda Rusiya Təhlükəsizlik Şurası sədrinin müavini Dmitri Medvedevin bəyanatı müzakirə olunmaqda davam edir. O bildirib ki, Ermənistan rəhbərliyi ölkənin inkişaf istiqamətini dəyişmək qərarına gəlib və bu, heç bir yaxşı nəticə verməyəcək.
“Ermənistanın başına gələ biləcək ən dəhşətli hadisə onun yeni Ukraynaya çevrilməsidir”, – deyə Medvedev bildirib.
Jurnalistlər Paşinyandan Ermənistanın belə bir təhlükə ilə üzləşib-üzləşməyəcəyini soruşublar. O isə belə cavab verib:
“Ermənistan artıq 2022-ci ilin sentyabrında (Azərbaycan Silahlı Qüvvələrinin Ermənistanın suveren ərazisinə müdaxiləsi zamanı) KTMT-nin öz öhdəliklərini yerinə yetirmədiyi vaxt oxşar təhlükə və vəziyyətlə üzləşib”.
Kollektiv Təhlükəsizlik Müqaviləsi Təşkilatı Rusiyanın rəhbərliyi altında fəaliyyət göstərən hərbi blokdur. Ermənistan KTMT-nin üzvüdür. Təşkilatın nizamnaməsinə əsasən, müttəfiqlər Ermənistana hərbi yardım göstərməli idilər, lakin bu, baş verməyib.
Ermənistanın baş naziri Medvedevin niyə bu cür bəyanatlar verdiyini və təhdidlər səsləndirdiyini izah edə bilməyib:
“Eyni məntiqlə başqa biri də deyə bilərdi: ‘Rusiyanın müxtəlif ərazilərində partlayış səslərinin eşidildiyini nəzərə alaraq, biz Ermənistanın ‘yeni Rusiya’ya çevrilməsini istəmirik’. Bu, uğursuz yanaşmadır”.
O əmin edib ki, Ermənistan başqa bir ölkəyə çevrilməyəcək, əksinə, daha da müstəqil dövlət olacaq.
“Azərbaycandakı bəzi dairələr bu məsələdən siyasi məqsədlər üçün istifadə edirlər”: itkin düşmüş şəxslər haqqında
Azərbaycan vaxtaşırı Ermənistandan itkin düşmüş azərbaycanlıların taleyi, eləcə də onların dəfn olunduğu yerlər barədə məlumat verməsini tələb edir. Prezident İlham Əliyev Bakıda itkin düşmüş şəxslərə həsr olunmuş beynəlxalq konfransda bu tələbi bir daha səsləndirib.
Ermənistanın baş naziri hesab edir ki, itkin düşmüş şəxslərin taleyinin aydınlaşdırılması üçün qarşılıqlı səylər göstərilməlidir:
“Biz əməkdaşlığa hazır olduğumuzu bildirmişik. Başqa məsələdir ki, Azərbaycandakı bəzi dairələr bu məsələdən siyasi məqsədlər üçün, yəni düşmənçilik ritorikasını gücləndirmək və digər məqsədlərlə istifadə edirlər”.
Baş nazirin təqdim etdiyi məlumatlara görə, 1990-cı illərdən bu günədək baş vermiş müharibələr nəticəsində Ermənistanda təxminən 1000 nəfərin harada olduğu məlum deyil.
Paşinyan bildirib ki, “olduğu yer məlum deyil” ifadəsinin özü həmin şəxslər haqqında məlumatın son dərəcə az olduğunu göstərir:
“Azərbaycandakı bəzi dairələr bəzən elə təəssürat yaratmağa çalışırlar ki, guya biz bu insanların harada olduğunu bilirik, lakin məlumatı bölüşmək istəmirik. Amma bu, belə deyil”.
Paşinyan hesab edir ki, bu məsələ əməkdaşlıq yolu ilə həll edilməli və mövzuya birdəfəlik nöqtə qoyulmalıdır. Onun sözlərinə görə, Bişkekdə Azərbaycan prezidenti ilə görüşündə iki ölkənin müvafiq komissiyalarının birgə səylərinin fəallaşdırılması məsələsini də müzakirə ediblər.
Paşinyan azərbaycanlı hərbçinin ekstradisiyası haqqında
