LGBT fəalları Tbilisidə parad keçirməyə, ultra sağlar isə onu dağıtmağa hazırlaşır
18-23 iyunda Tbilisidə LGBT-prayd həftəsi keçirmək planlaşdırılıb. Tədbirin təşəbbüskarı “Tbilisi-prayd” təşkilatıdır. Hazırlıq işləri artıq başlayıb, təqribi proqram da artıq məlumdur.
Amma çoxları bu xəbəri narazılıqla qarşılayıb – ultra-sağçılar Tbilisidə kimsəyə gey-paray keçirməyə imkan verməyəcəklərini vəd ediblər.
______________
“Biz gizlənmək niyyətində deyilik, çünki belə yaşamaq artıq dözülməzdir”
Prayd təşkilatçılarının yazdıqlarına görə, iyunun 18-dən 23-ə qədər Tbilisidə dörd tədbir planlaşdırılıb:
1) Sosial teatr Frans Kafkanın “Çevrilmə” əsərini təqdim edəcək.
2) Gürcüstanda LGBT birliyinin vəziyyətinə və hakimiyyətin bu sahədə siyasətinə həsr olunmuş beynəlxalq konfrans.
3) 23 iyunda “Ləyaqət marşı” keçiriləcək və bu, “bayram və karnaval forması daşımayacaq, çünki biz hazırda bayram hayında deyilik”, – təşkilatın bəyanatında deyilir.
4) Həftənin bağlanışı olan qapalı prayd-parti.
Tədbirin təşkilatçısı, LGBT fəalı Giorgi Tabaqari bildirib ki, onlar tədbirin keçirilməsi ilə bağlı riskləri çox gözəl anlayırlar:
“Bizim tədbirlərimiz sülh və bərabərliyə çağırışa istiqamətlənib. Bu, cəmiyyəti qıcıqlandırmaq və ya qəzəbləndirmək cəhdi deyil”.
“Prayd Tbilisi” təşkilatçıları prayd zamanı təhlükəsizliyə görə bütün məsuliyyəti hüquq-mühafizə orqanlarının və hakimiyyətin üzərinə qoyur:
“Təhlükəsizliyə görə dövlət, DİN və digər orqanlar məsuliyyət daşıyır. Öz tərəfimizdən biz insanlarda cari tədbirlər haqda məlumat olsun deyə hər şeyi edirik”, – Giorgi Tabaqari “Tabula” nəşrinə müsahibəsində bildirib.
Praydın xüsusi Facebook səhifəsində deyilir:
“Biz – lesbiyanlar, geylər, biseksuallar, transgenderlər, interseksuallar və kvirlər. Biz ailələrimizdə, məktəblərdə, küçədə və işdə zorakılığa dözürük. Bizə evdə hücum edir, ailələrdən qovurlar. Bizi öldürürlər!”
Bəyanatda deyilir ki, aksiya iştirakçıları “belə yaşamaq artıq mümkünsüz olduğu üçün daha gizlənmək istəməyən” “dinc insanlardır”.
Ultra-millətçilərin cavabı: “əxlaqsızlıq təbliğatına imkan verməyəcəyik”
Prayda hazırlıqlar haqda məlumat yayılandan dərhal sonra ultra-sağçılar bəyanatla çıxış edib və dildiriblər ki, Gürcüstanda “gey-parad” keçirilıməsinə imkan verməyəcəklər.
•“Gürcü marşı” miqrantlara və NATO-ya qarşı
•“Gürcü marşı”nın nəzarətsiz immiqrasiyaya qarşı etirazı. Fotoreportaj
“Gürcü marşı” təşkilatının lideri Sandro Breqadze LGBT fəallarına müraciət edərək onları “gey təbliğatından” çəkinməyə çağırıb.
“Biz dəfələrlə Gürcüstan hakimiyyətini, Soros fondunu, gey təşkilatlarını provokasiyadan və əxlaqsızlığın təbliğatından çəkinməyə çağırmışıq ki, onlar gürcü cəmiyyətinə öz əxlaqsız ideya və ideallarını sırımasınlar”, – Sandro Breqadze Facebook səhifəsində yazıb.
2014-2016-cı illərdə Gürcüstan hökumətinin üzvü olan Breqadze (diaspora məsələləri üzrə nazir müavini vəzifəsində çalışıb) həmçinin polisi və DİN-i də təhdid edib.
Onun sözlərinə görə, əgər polis parad iştirakçılarını müdafiə etsə, “əcdadları satqınların haqqından gəldiyi kimi” “marş” iştirakçıları da onların haqqından gələcək.
DİN-dən Azadlıq Radiosuna bildirilib ki, prayd təşkilatçıları rəsmi məktubla quruma müraciət etməyib, Breqadzenin bəyanatını isə daha sonra şərh edəcəklərinə söz veriblər.
17 may təcrübəsi
Gürcüstanda LGBT birliyinin küçə aksiyası keçirməklə bağlı istənilən cəhdi həmişə ultra-millətçilərin və kilsənin təşkil etdiyi əks-aksiyalarla rastlaşır.
“Qadın Təşəbbüslərinin Dəstəklənməsi” (WISG) təşkilatı xüsusi video yayıb. Videoda Gürcüstanda anti-LGBT çıxışlarının hansı yoldan keçdiyi və maraqlı tərəflərin – dövlət, kilsə və ekstremist qruplaşmalar – bu mövzudan necə yararlandığı görünür.
Eka Aqdqomelaşvili belə nəçticəyə gəlir ki, Gürcüstanda “anti-gey parad” LGBT birliyinin çıxışlarından daha tez-tez təkrarlanır.
Anti-LGBT və LGBT qrupları arasında ən böyük toqquşma 2013-cü il mayın 17-də baş verib.
•17 may Tbisilidə – homofobiya ilə mübarizə, Ailə Günü və homofobiyaya qarşı aksiyada zorakılıq
Həmin gün on minlərlə insan Beynəlxalq Homofobiya ilə Mübarizə Gününü qeyd etmək üçün əllərində şar və plakatlarla Tbilisinin mərkəzində toplaşıb. Amma tezliklə pravoslav fəallar, keşişlər və ultra-sağçılar aksiya iştirakçılarına hücum edib, onlara qarşı fiziki və sözlü zor tətbiq edərək qovublar.
Keşişlərdən biri əlində kətillə fəalları qovub.
Polis LGBT fəallarını avtobuslara mindirib ki, aqressiv kütlədən qorusun. Amma millətçilər avtobusları daşlayıb, bir neçə fəal yaralanıb.
Bu hadisələrdən bir il sonra – 2014-cü il mayın əvvəlində Gürcüstan Pravoslav Kilsəsinin katolikos-patriarxı İkinci İliya mayın 17-ni “Ailə Müqəddəsliyinin Mühafizəsi Günü” elan edib.
Bundan sonra hər il mayın 17-də Rustaveli prospektində pravoslav dindarların xaçlı yürüşü təşkil olunur.
