İranın Gürcüstandakı səfiri: "İranın düşmənlərinə dəstək cavabsız qalmayacaq"
İran səfirinin Gürcüstanda mətbuat konfransı
İran İslam Respublikasının Gürcüstandakı səfiri Seyid Əli Mocani altı aylıq fəaliyyətinə dair hesabat təqdim edərkən bildirib ki, İran artıq Gürcüstanla qonşu ərazilərin ölkənin suverenliyi və ərazi bütövlüyünə qarşı yönəlmiş hərbi əməliyyatlar üçün dayaq nöqtəsi kimi istifadə edilməsinə imkan verməyəcək.
Tbilisidə keçirilən mətbuat konfransında səfir İran və Gürcüstan arasında tarixi əlaqələr, regional təhlükəsizlik, İranın xarici siyasəti və son hərbi hadisələr barədə danışıb.
O bildirib ki, İran hökuməti ABŞ və İsrailin İrana qarşı həyata keçirdiyini düşündüyü hərbi əməliyyatlarla bağlı Gürcüstan da daxil olmaqla qonşu ölkələrə diplomatik kanallar vasitəsilə ətraflı məlumat təqdim edib.
Mocaninin sözlərinə görə, Tehran bir sıra dövlətlərə açıq şəkildə çatdırıb ki, “İranın düşmənlərinə dəstək göstərilməsi və onlar üçün fəaliyyət imkanlarının yaradılması cavabsız qalmayacaq”.
O həmçinin bəyan edib ki, İranın təhlükəsizliyinə təhdid yaradan ölkələrin ərazilərində yerləşən hərbi bazalar qanuni müdafiə çərçivəsində hədəfə çevrilə bilər.
Səfir qeyd edib ki, son altı ay ərzində İran səfirliyi həm Gürcüstan hökuməti, həm də gürcü xalqı ilə fəal qarşılıqlı əlaqədə olub. Onun sözlərinə görə, səfirliyin məqsədi gürcü cəmiyyətini müasir İranın siyasəti, baxışı və mövqeyi ilə birbaşa tanış etmək olub.
Mocani həmçinin bildirib ki, gürcü cəmiyyətində İrana qarşı həmrəylik və rəğbət nümunələri görüb. Onun sözlərinə görə, həm siyasi dairələr, həm də cəmiyyətin bir hissəsi İrana qarşı atılan addımlardan narazılığını açıq şəkildə ifadə edib.
Çıxışın əhəmiyyətli hissəsi İran-Gürcüstan tarixi münasibətlərinə həsr olunub. Səfir İranda yaşayan etnik gürcülərə, onların ölkənin siyasi, mədəni və ictimai həyatındakı roluna, eləcə də iki ölkə arasında çoxəsrlik əlaqələrə diqqət yetirib. Onun sözlərinə görə, Cənubi Qafqaz dilləri arasında gürcü dilində bu gün də ən çox fars sözləri istifadə olunur.
Regional təhlükəsizlikdən danışan səfir vurğulayıb ki, İran öz gücünə arxalanaraq hərəkət edir və onun hərbi imkanları ölkənin müstəqilliyini və ərazi bütövlüyünü qorumağa yönəlib. Eyni zamanda o bildirib ki, İran “heç vaxt qonşu ölkələrin ərazisinə qarşı təcavüz etməyib” və ölkə “imperiyaya çevrilməyə can atmır”.
Mocaninin sözlərinə görə, bugünkü İran siyasi və təhlükəsizlik sahəsində qərarları milli maraqlarına və daxili resurslarına əsaslanaraq qəbul edən dövlətdir və xarici siyasətinin əsas prinsipi kimi mehriban qonşuluq münasibətlərinin qorunmasını göstərir.
İran səfirinin Gürcüstanda mətbuat konfransı
