Yumurta atəşinə tutulan deputatlar və yumruq savaşı: Ermənistanda etiraz aksiyaları davam edir
Ermənistanda Qarabağda hərbi əməliyyatların dayandırılması haqda sənədi imzalayandan sonra müxalifət tərəfindən “xain” elan edilən baş nazir Nikol Paşinyanın istefası tələbi ilə etiraz aksiyaları davam edir.
Dekabrın 28-i səhərdən parlament binasının qarşısında yüzlərlə insan baş nazirin dərhal istefası tələnbilə növbəti etiraz aksiyasına başlayıb, üstəlik deputatlarla sözlü atışma əlbəyaxa davaya keçib.
Parlament binasına doğru gücləndirilmiş polis qüvvələri cəlb olunub, onlar növbədənkənar iclasın keçirilməli olduğu Milli Məclisin girişini bağlayıblar.
Etirazçılar deputatları “Rəzil!” qışqırıqları ilə qarşılayıblar, “Mənim Addımım” iqtidar blokundan olan deputat Andranik Koçaryanın maşınını isə yumurta yağışına tutublar və onu xain adlandırıblar.
Koçaryan etirazçıların birinə qışqırıb: “Xain sənin anandır, oğlan” və cavabında söyüş eşidib.
Digər iqtidar deputatı Sisak Qabrielyanla bağlı da olay baş verib.
Etirazçılar onun avtomobilinin qarşısını kəsib və parlament ərazisinə daxil olmasını əngəlləyiblər.
Sözlü qarşıdurmadan sonra əlbbəyaxa dava başlayıb.
“Mənim Addımım” fraksiyasından olan deputat maşından çıxıb və müxalifətçilərə hücum edib.
Paşinyanın çıxışı
Öncəki gün Nikol Paşinytan Ermənistanın İctimai Telekanalına müsahibə verib. Nazirlər Kabinetinin rəhbəri müxalifətin müharibədə məğlubiyyətə uğrayan liderin seçki keçirə bilməməsi ilə bağlı bəyanatını şərh edib.
Söhbət Paşinyanın 2021-ci ildə növbədəbkənar seçki keçirməklə bağlı təklifindən gedir. Ötən həftə o, parlamentə daxil olan və olmayan qüvvələri bu məsələnin müzakirəsinə dəvət edib.
“Mən heç vaxt məsuliyyətdən yayınmayacam, amma digər tərəfdən bu müharibə haqda bütün həqiqətləri eyni dərəcədə mütləq və mümkün hesab edirəm. Axı hələ də Ermənistanın nəzarəti altında olan yaşayış məntəqələrindən küçə fənərlərinin çıxarılmasını və aparılmasını bildirən onlarla insan, o cümlədən də yüksək vəzifəli şəxslər var. Bu insanların arasında müxalifətlə əlaqəli olanlar da var”, – baş nazir bildirib.
Onun sözlərinə görə, seçkiqabağı kampaniya zamanı Ermənistanın bütün siyasi qüvvələri xalq qarşısında çıxış etməli və bu faktlarla bağlı izahat verməli olacaqlar.
Baş nazirin müsahibəsinin digər tezisləri:
- Qarabağda hərbi əməliyyatların dayandırılmasına səbəb olan üçtərəfli bəyanata daxil olan nəqliyyat dəhlizi və regiondakı yolların açılması haqda müddəalar hələ ətraflı müzakirə olunacaq və dəqiqləşdiriləcək.
- Əgər Azərbaycan Ermənistanın Meğri şəhərindən hərəkət imkanı əldə edəcəksə, Ermənistan da Naxçıvandan analoji keçid əldə etməlidir.
- Əgər kimsə Ermənistanın cənub regionu Sünikə hücum etsə, yalnız Ermənistan ordusunun yox, həm də Ermənistanın strateji müttəfiqi Rusiyanın və Ermənistanın da üzvü olduğu KTMT hərbi blokunun cavabını alacaq.
