«Bütün xalqın alçaldılması». Çeçenistan hakimiyyətinə qarşı çıxanı özünə kamera qarşısında işgəncə verməyə məcbur etdilər
Çeçenistan (Şimali Qafqazda, Rusiyanın tərkibində olan respublika) sakinlərini gənc oğlanın çılpaq şəkildə özünə işgəncə verdiyi video qəzəbləndirib, videoda o, Çeçenistan hakimiyyətini tənqid edən Telegram kanalı ilə əməkdaşlığa görə cəzalandırılaraq, butulkaya oturmağa məcbur edilir. 1ADAT kanalının müəllifləri bildirir ki, bu şəxsi güc qurumları əməkdaşları oğurlayaraq, açıq şəkildə alçaldıblar.
«Kavkazski uzel» nəşri xəbər verir ki, internetdə yayılan və uzunluğu bir dəqiqədən bir az çox olan videoda çılpaq soyunan gənc oğlan adını və soyadını səsləndirir. O 1ADAT kanalının administratoru olduğunu deyir, həmin kanalı “çirkin qrup” və “boş bir şey” adlandırır. Sonra gənc oğlan özü özünü və ailəsini söyür və butulkanın üstünə oturur.
Videodakı adam kanalın administratoru olmayıb, o, sadəcə bir müddət çatda moderatorluq edib, – kanal nümayəndələri deyir. “Sentyabrın 5-də o, administratorların zənglərinə cavab verməyib, dünən isə [sentyabrın 7-də] bu ümumi çata bu videonu göndəriblər. Biz indi onun harada olduğunu bilmirik”, – Rusiyanın “MBX media” nəşri kanal nümayəndələrinin sözlərindən sitat gətirir.
• Avropada Çeçenistan başçısı Kadırovu tənqid edənləri kim öldürür?
• Çeçenistan prezidenti gürcü jurnalisti haqqında: o, dizi üstə çöküb, üzr istəməlidir
Kanalda dərc olunan və müstəqil medialara ünvanlanan müraciətdə bildirilir ki, moderator güc qurumları tərəfindən “aşkar edilib” və xəbər verib ki, onun evinə iki nəfər qara formalı hüquq-mühafizə orqanı əməkdaşı gəlib.
1ADAT kanalı Çeçenistan sakinlərinin oğurlanması və saxlanması, yüksək rütbəli məmurların dəbdəbəli həyatı haqqında məlumatlar dərc edir. Telegram-da kanalın təxminən 8,2 min, Instagram-da 22 min, Youtube-da 1,29 min abunəçisi var.
«Çeçenistan Respublikasının istənilən sakini bizə müraciət edə bilər. Biz anonim şəkildə dərc edəcəyik, iddiaçı yardım istəyərsə, ona hüquq müdafiəsi təşkilatları və jurnalistlərlə kömək edərik», – kanalın 22 iyun tarixli yazısında deyilir. Kanal haqqında informasiya blokunda müəlliflər 1ADAT kanalını “diktaturaya qarşı xalq hərəkatı” adlandırırlar.
Çeçenistanda insan hüquqları üzrə müvəkkilin aparatında bildiriblər ki, insident haqqında məlumatlıdırlar, amma zərərçəkənin özü və qohunmları onlara müraciət etməyib. “Öz növbəsində müvəkkilin əməkdaşları videoda baş verənlərin yolverilməzliyi ilə bağlı insidentin araşdırılması ilə məşğul olmağa hazırdırlar”, – “Кавказ.Реалии” saytının məlumatına görə, çeçen ombudsmeninin nümayəndəsi bildirib.
Çeçenistanda narazılıq
Videonun dərci sosial şəbəkə istifadəçilərinin qəzəbinə səbəb olub – çoxları bunun çeçenləri biabır etdiyini hesab edir.
«Bunları göstərməyə ehtiyac yoxdur! Bizi camaat arasında biabır edən bu filmlərdən bezdik»,
«Xalqımızı dünyaya belə göstərirlər»,
«Bunu edənlər ikrah, nifrət və qəzəbdən başqa ayrı bir hiss oyatmır və oyada da bilməz. Bu, həqiqətən bütün xalqın alçaldılmasıdır», – istifadəçilər yazır.
«Heç kimin insanla bu cür davranmağa haqqı yoxdur, nə etməyindən və nə deməyindən asılı olmayaraq. Axı bu, ömürlük rüsvayçılıqdlr, həm də tək həmin oğlan, onun ata və anası üçün deyil, həm də bütün qohumları, yaxınları, bütün nəsli üçün. Bu cür şeylər bizdə bağışlanmayıb və bağışlanmır, əvvəl-axır onlar buna görə cavab verəcəklər», – Çeçenistan sakini Sahib “Kavkazski uzel”ə bildirib.
Hansısa şəkildə Çeçenistan hakimiyyəti və şəxsən prezident Ramzan Kadırovla münaqişəyə girən adamların açıq şəkildə üzr istəməsinin nümayişi respublikada adi haldır. Son zamanlar Çeçenistanın güc qurumları fəal şəkildə internetdə anonim müxalif kanalların və publiklərin müəlliflərini və abunəçilərini axtarıb tapmağa və cəzalandırmağa çalışırlar.
