Azərbaycanda vaksin növbələri: “X saatı”na bir neçə gün qalıb
Sentyabrın 1-dən Azərbaycanda koronavirusa qarşı vaksinasiyadan keçməyənlər və COVID-pasportu olmayanlar üçün sərt məhdudiyyətlər qüvvəyə minəcək. Bu səbəbdən artıq bir neçə gündür ki, vaksinasiya həyata keçirən poliklinikaların və tibb müəssisələrinin qarşısında böyük növbələr düzülür.
- “Bu, Gürcüstan üçün artıq yaşam və ölüm məsələsidir” – həkimlər məhdudiyyətlərə əməl olunmasını tələb edirlər
- İri məbləğdə cərimə, yaxud həbs: Azərbaycanda vaksinasiya tələbləri sərtləşir
- “Uşağın olmayacaq, əvəzində trombun olacaq” – Ermənistanda COVID-19 vaksinasiyası haqda miflər
2021-ci ilin sentyabrından Azərbaycanda bütün qapalı məkanlara ancaq COVID-pasportu olanlar gedə biləcək. Bu elektron sənəd koronavirusa qarşı vaksinin hər iki dozasını vurdurmuş 18 yaşdan yuxarı vətəndaşlara verilir. COVID-pasportun ikinci variantı olan immunitet sertifikatını isə son altı ayda virusa yoluxub sağalanlar ala bilər. peyvənd vurduranlar üçün COVID-pasport müddətsizdir.
Yeni qaydaların qüvvəyə minməsinə bir neçə gün qalmış tibb müəssisələrinin qarşısında böyük növbələr yaranır.
“Vaksin vurdurmaq üçün elektron sistemdə saat 11-12 arası qeydiyyatdan keçmişəm. İşdən icazə alıb, poliklinikaya gəlmişəm. Burda isə qapıda mənə kağız verib deyirlər ki, növbədə 236-cıyam. Bütün günü burda dayanmalıyam. Mənə isə deyirlər ki, burada canlı növbədir. Başqa klinikaya getməli oldum, amma orda da eyni mənzərədir. İndi mən nə etməliyəm?” – sosial şəbəkələrin Azərbaycan seqmentinin istifadəçilərindən biri sual edir.
Hazırda Azərbaycanda koronavirusa qarşı dörd növ vaksindən istifadə olunur. Bütün poliklinikalarda SinoVac vaksini vurdurmaq mümkündür. SputnikV, AstraZeneca və Pfizer vurdurmaq istəyənlər bunu müəyyən klinikalarda edə bilərlər.
Tibb müəssisələrindən başqa vaksinasiya xidməti hipermarketlərdə də göstərilir. Həmçinin Bakı şəhəri üzrə xüsusi avtobuslar hərəkət edir və bu avtobuslarda koronavirusa qarşı peyvənd vurdurmaq olar.
2021-ci il avqustun 27-ə olan məlumata əsasən, Azərbaycan əhalisinin 39,3%-i vaksinin birinci dozasını alıb. Hər iki dozanı vurduranlar əhalinin 25,6%-i təşkil edir.
