«Հայաստանը վերադառնում է այն արեալ, որից դուրս էր մղվել»․ կարծիքներ «Խաղաղության խորհրդի» մասին
Հայաստանը միացել է «Խաղաղության խորհրդին»
Հայաստանը միացել է ԱՄՆ նախագահ Դոնալդ Թրամփի ստեղծած «Խաղաղության խորհրդին»՝ որպես հիմնադիր անդամ։
Նախօրեին՝ հունվարի 22-ին վարչապետ Նիկոլ Փաշինյանը Դավոսում՝ Համաշխարհային տնտեսական ֆորումի շրջանակում, մասնակցել է խորհրդի առաջին նիստին և դրա կանոնադրության ստորագրման հանդիսավոր արարողությանը։ Փաստացի խորհուրդն այլևս միջազգային կազմակերպություն է, ինչի մասին հայտարարել է նաև Սպիտակ տան մամուլի քարտուղարը։
Ի սկզբանե ասվում էր, որ «Խաղաղության խորհուրդ» նախաձեռնության նպատակը Գազայի վերականգնումը վերահսկելն է։ Ավելի ուշ նախագահ Թրամփը նշեց, որ խորհուրդը պետք է լուծի ավելի մեծ խնդիրներ՝ գլոբալ հակամարտություններ։
Կան փորձագիտական կարծիքներ, որոնց համաձայն՝ այս խորհրդի ստեղծման նպատակը ՄԱԿ-ի դերը նվազեցնելն է, քանի որ ԱՄՆ նախագահը բազմիցս քննադատել է կառույցի արդյունավետությունը։ Ինքը՝ Թրամփը, սակայն, Դավոսում կայացած նիստի ժամանակ նշել է, որ խորհուրդը «չի ձգտի փոխարինել ՄԱԿ-ին գլոբալ խնդիրների լուծման գործում»։
Քաղաքագետ Ստյոպա Սաֆարայանը կարծում է՝ պատահական չէ, որ ԱՄՆ Հայաստանին խաղացող է դարձնում Մերձավոր Արելքում ու Գազայի խնդրով ստեղծված խորհրդում։
«Հայաստանը վերադառնում է պատմական այն արեալ, որտեղից դուրս էր մղվել ու այժմ միանգամայն այլ հենասյուների վրա պետք է հենվի նրա մերձավորաևելյան քաղաքականությունը»,- հայտարարել է նա։
Այս պահին հայտնի տեղեկությունները, քաղաքական գործիչների և փորձագետների մեկնաբանությունները՝ ստորև
- «Ռազմական էսկալացիան գրեթե անհավանական է, բայց կան ռիսկի գործոններ»․ Հայաստանի ԱՀԾ զեկույցը
- «ՀՀ-ն կվերականգնի երկաթուղային կապը Ադրբեջանի և Թուրքիայի հետ՝ լինի դա ՌԴ հետ, թե առանց». կարծիքներ
- Ջեյ Դի Վենսը Երևան կգա՞․ ԱՄՆ փոխնախագահի հնարավոր այցի շուրջ քննարկումներ ՀՀ-ում
Ո՞ր երկրներն են միացել «Խաղաղության խորհրդին»
Հայաստանի վարչապետի աշխատակազմի փոխանցմամբ՝ խորհրդի կանոնադրությունը ստորագրել են Հայաստանի, ԱՄՆ-ի, Արգենտինայի, Ադրբեջանի, Բահրեյնի, Բելգիայի, Բուլղարիայի, Եգիպտոսի, Հունգարիայի, Ինդոնեզիայի, Հորդանանի, Ղազախստանի, Կոսովոյի, Մարոկկոյի, Պակիստանի, Քաթարի, Պարագվայի, Սաուդյան Արաբիայի, Թուրքիայի, ԱՄԷ-ի, Ուզբեկստանի և Իսրայելի պատվիրակությունների ղեկավարները:
Վարչապետ Նիկոլ Փաշինյանի հետ միջոցառմանը ներկա են եղել նաև ՀՀ նախագահ Վահագն Խաչատուրյանը և Արտաքին գործերի նախարար Արարատ Միրզոյանը:
«Խաղաղության խորհրդի» նիստը Դավոսում․ լուսանկարները՝ ՀՀ վարչապետի աշխատակազմի
Հայաստանը 1 մլրդ դոլար անդամավճար չի վճարի․ ԱԳՆ պարզաբանումը
Արևմտյան լրատվամիջոցների ձեռքի տակ էր հայտնվել «Խաղաղության խորհրդի» կանոնադրությունը։ Հղում անելով այդ փաստաթղթի վրա՝ ԶԼՄ-ները գրում էին, որ խորհրդի անդամների մանդատը 3 տարվա ժամկետով է, իսկ մշտական անդամակցության համար նրանք պետք է վճարեն 1 մլրդ դոլար անդամավճար։
Հայաստանի ԱԳՆ խոսնակ Անի Բադալյանը հանդես է եկել պարզաբանմամբ, ըստ էության, հաստատելով վերոնշյալ տեղեկությունները։ Բադալյանը, մասնավորապես՝ նշել է, որ «հրավեր ստացած երկիրը կարող է անդամակցել խորհրդին՝ առանց հստակ սահմանված անդամավճարի՝ մինչև 3 տարի ժամկետով, ինչը սահմանված կարգով ենթակա է վերանայման այդ ժամկետը լրանալուց հետո»։
«Անդամավճարը կամավոր է և վերաբերելի է կազմակերպությանը՝ դրա կանոնադրության ուժի մեջ մտնելուց հետո մեկ տարվա ընթացքում որևէ երկրի կողմից մշտական անդամակցության ցանկություն հայտնելու պարագայում»,- հայտարարել է ԱԳՆ խոսնակը։
Քաղաքական գործիչների մեկնաբանությունները
«Հանուն Հանրապետության» կուսակցության նախագահ Արման Բաբաջանյանը նկատել է՝ ՀՀ-ի մասնակցությունը խորհրդին հասունության նշան է։
«Մենք վերադառնում ենք միջազգային քաղաքականության կենտրոն որպես սուբյեկտ՝ իրավունքով, ձայնով և պատասխանատվությամբ»։
Միևնույն ժամանակ Բաբաջանյանն ընդգծել է, որ Երևանի ներգրավվածությունը «Խաղաղության խորհրդում» արժեք կունենա միայն մեկ դեպքում, եթե վերածվի «պետական, շարունակական գծի՝ հստակ արտաքին քաղաքական նպատակներով, պրոֆեսիոնալ դիվանագիտական աշխատանքով և Հայաստանի ինքնիշխան ընտրության՝ անսակարկ ու լիարժեք պաշտպանությամբ»։
ԱԺ փոխնախագահ, իշխող թիմի ներկայացուցիչ Ռուբեն Ռուբինյանի փոխանցմամբ՝ ընդդիմությունն ասում էր, թե «Փաշինյանը ՀՀ-ն դարձրել է թույլ, անկարևոր երկիր միջազգային ասպարեզում»։
«Ընդդիմությունը, ինչպես միշտ, սխալ էր»,- ֆեյսբուքյան էջում գրել է Ռուբինյանը՝ հրապարակելով լուսանկար խորհրդի կանոնադրության ստորագրումից։
Փորձագիտական կարծիքներ
Քաղաքագետ Ռուբեն Մեհրաբյանն ընդգծել է․
«ԱՄՆ նախագահ Դոնալդ Թրամփը, Եվրոպայի հետ իր տարաձայնությունները կոնֆլիկտի հասցնելով, այնուամենայնիվ, նախաձեռնել է «Խաղաղության խորհուրդ»։ Հաշվի առնելով խորհրդին անդամակցող երկրների բազմազանությունը՝ կան բոլոր հիմքերը պնդելու, որ սա կարծես թե ընկալվում է որպես ՄԱԿ-ի այլընտրանք՝ առնվազն ԱՄՆ կողմից։
Ի՞նչ կլինի այս կազմակերպության հետ, կապրենք, կտեսնենք։ Պարզ չէ՝ ինչպես է այն աշխատելու, ինչ և ինչպես է անելու, ինչ ճակատագրի կարժանանա։
Ակնհայտ է մի բան, որ միջազգային աշխարհակարգը, որ կար 1945 թվականից հետո, այլևս չկա։ Նորի սաղմերն են։
Եվ այստեղ Հայաստանի դիրքը մեկն է։ Ինչպես Կանադայի վարչապետն էր ասում [Մարկ Քարնին]՝ պետք է լինել սեղանի շուրջ, այլ ոչ թե ճաշացանկում»։
Քաղաքագետ Ստյոպա Սաֆարյանը նկատել է․
«Խաղաղության խորհրդին» Հայաստանի ինստիտուցիոնալ մասնակցությունն աննախադեպ իրադարձություն է։
Իհարկե, տարածված լուսանկարներում նախագահ Թրամփի ու վարչապետ Փաշինյանի «մարմնի լեզուն» ահագին ինֆորմացիա է տալիս հայ-ամերիկյան աննախադեպ զարգացող համագործակցության մասին։ Բայց վիզուալ ուղերձներից անդին կա ավելի մեծ խորք՝ ի դեմս օգոստոսի 8-ի վաշինգտոնյան երկկողմ ու եռակողմ համաձայնությունների ու դրա շարունակության՝ TRIPP-ի շուրջ համաձայնությունների։
Այս ամենի ամբողջ պլատֆորմն ու խորքը Հայաստանի «Խաղաղության խաչմերուկն» է՝ որպես այլևս հայ-ամերիկայն ռազմավարական նախագիծ, որի շուրջ առանձին համագործակցության հուշագիր ստորագրվեց օգոստոսի 8-ին։ Այն արմատապես վերաձևում է մինչ խոշոր դերակատարների առաջարկված Հյուսիս-Հարավ (ըստ 2015թ․ Ռուսաստան-Ադրբեջան-Իրան-Հնդկաստան համաձայնությունների) և Արևմուտք-Արևելք (ըստ Չինաստանի «Մեկ գոտի՝ մեկ ճանապարհ» ծրագրի կամ Թուրքիա-Վրաստան-Ադրբեջան-Ղազախստան պայմանավորվածությունների՝ Միջին միջանցքով) տրանսպորտային միջանցքները, որոնց նախկին խաչմերուկը կամ հանգույցը Կովկասում Ադրբեջանն էր, իսկ այսուհետ՝ Հայաստանը։
Բացարձակ չհամեմատելով Թուրքիայի աշխարհաքաղաքական տեղադիրքը (մի քանի մայրցամաքների հանգույց) կամ անգամ Ադրբեջանինը (Կենտրոնական ասիայի հետ կապի հարցում), ոչ միայն տարածված լուսանկարները, այլ ստորագրված փաստաթղթերն են ընդգծում Հայաստանի կարևորությունը ԱՄՆ-ի համար ու նախագահ Թրամփը միայն մեր քրիստոնեական գեղեցիկ աչքերը չէ, որ գնահատում է։
Մեր հանգույցում հատվում են նաև Պարսից Ծոց (արաբական աշխարհ)- Սև ծով միջանցքը ու պատահական չէ, որ ԱՄՆ Հայաստանին խաղացող է դարձնում Մերձավոր Արելքում ու Գազայի խնդրով ստեղծվող Խաղաղության խորհրդում։ Իսկ խորհրդում են նաև այդ տարածաշրջանի երկրները։
Այո, Հայաստանը վերադառնում է պատմական այն արեալ, որտեղից դուրս էր մղվել ու այժմ միանգամայն այլ հենասյուների վրա պետք է հենվի նրա մերձավորաևելյան քաղաքականությունը։ Աշխարհը այլ հնարավորություններ է բացում այդ վերադարձի համար՝ շուկաներում մասնակցություն, անվտանգային զարգացումներում ձայնի իրավունք և այլն»։
Հետևեք մեզ — Facebook | Youtube
Հայաստանը միացել է «Խաղաղության խորհրդին»
