Բաքվում 14-ամյա աղջկա վրա են հարձակվել հիշատակի ակցիա կազմակերպելու համար

Բաքվում ինքնասպան եղած դպրոցականի հիշատակի ակցիա կազմակերպած աղջիկը հարձակման է ենթարկվել։ Ապրիլի 17-ի երեկոյան 14-ամյա Սանայ Գահրամանլիի վրա Թուրալ Գարաև անունով մի տղամարդ է հարձակվել, սկսել նրան ու նրա ծնողներին հայհոյել և ձեռքերին հարվածել։ Ամեն ինչից զատ նա պահանջել է նաև, որ նրանք բոլորը ներողություն խնդրեն Մեհրիբան Ալիևայից [առաջին տիկինն ու Ադրբեջանի փոխնախագահը]։

Աղջիկը հասցրել է հարձակումը հեռախոսով տեսանկարահանել։ Այս տեսանյութն արագ տարածվել է սոցցանցերում։ Հարձակվողը ձերբակալված է, նա մեղադրվում է մանր խուլիգանության համար։

Ի՞նչ ակցիայի մասին է խոսքը

Ապրիլի 13-ին Սանայը № 162 դպրոցի մոտ ծաղիկներ բերելու ակցիա է նախաձեռնել։ Այստեղ էր սովորում նրա հասակակից Էլինա Հաջիևան, որն ապրիլի 4-ին դպրոցի պատուհանից ցած է նետվել՝ չդիմանալով մյուս աշակերտների հալածանքներին և ուսուցիչների կոպիտ վերաբերմունքին։ Էլինան մահացել էր հիվանդանոցում երկու օր անց։

Այս դեպքը հասարակությունում հսկայական ռեզոնանս է առաջացրել, քանի որ ակնհայտ էր բժիշկների և դպրոցի աշխատակիցների անփութությունը։

• Մանրամասներ՝ Էլինա Հաջիևայի և ապրիլի 13-ի ակցիայի մասին

Ի հիշատակ Էլինայի երկու ակցիա էր կազմակերպվել։ Առաջինը կայացել էր ապրիլի 12-ին, դրան հիմնականում ներկա էին դպրոցականների ծնողները, և այն խաղաղ էր անցել։

Երկրորդ ակցիան կազմակերպվել էր Սանայ Գահրամանլիի կողմից ապրիլի 13-ին, և դրան մասնակցում էր հիմնականում ակտիվ երիտասարդությունը։ Այս անգամ ոստիկանությունը խանգարել է ակցիայի մասնակիցներին ծաղիկներ դնել դպրոցի մոտ և կոպտորեն հեռացրել է նրանց դպրոցի տարածքից։

Հենց այդ ակցիայի հետ են Սանայի ծնողներն ու ծանոթները կապում հարձակումը։ Նրա մոր խոսքով՝, Գարաևը մի քանի օր հետևել է աղջկան, հետո՝ հարձակվել։

Ո՞վ է Թուրալ Գարաևն ու ինչու է այս դեպքը հատկանշական

Աղջկա վրա հարձակված Թուրալ Գարաևը հայտնի է որպես «Ենի Ազերբայջան» իշխող կուսակցության ակտիվիստ և իշխանությունների մոլի կողմնակից։ Սա նրա առաջին նման արարքը չէ։ Սոցցանցերի օգտատերերը պատմում են, որ նա նախկինում էլ է հարձակվել քաղաքացիական ակտիվիստների և ուրիշ «այլախոհների» վրա։

Սանայը Ֆուադ Գահրամանլիի՝ Ժողովրդական ճակատ ընդդիմադիր կուսակցության փոխնախագահի դուստրն է։ Սանայի ծնողները համոզված են, որ աղջկա վրա հարձակումը կազմակերպել են իշխանությունները։ Նրանց հետ համամիտ են սոցցանցերի շատ օգտատերեր։ Հարձակումը կապում են վերջերս խղճի նախկին գերի Գիաս Իբրահիմովին՝ ոստիկանությունում ասված խոսքերի հետ։ Նրան զգուշացրել էին, որ եթե նա շարունակի քննադատել կառավարությանը, նրանից կարող է «վրեժ լուծել» նախագահի կամ իշխանությունների կողմնակիցներից մեկը, և «ոստիկանությունը չի կարողանա նրան պաշտպանել»։

• Ինչո՞ւ էին Գիաս Իբրահիմովին ոստիկանություն կանչում

Հասարակության մեկ այլ վարկածի համաձայն՝ իշխանությունները չեն վարձել հարձակվողին, և Թուրալ Գարաևը գործել է սեփական նախաձեռնությամբ, քանի որ իրոք մեծապես սատարում և պաշտպանում է կառավարությանը։