Վրաստան․ զբոսաշրջությունը հետաձգվում է․ միջազգային չվերթները չեն վերականգնվի մինչև օգոստոս
Դեպի Վրաստան միջազգային կանոնավոր չվերթները չեն վերականգնվի մինչև հուլիսի վերջ։
Երկրի կառավարությունը պլանավորում էր վերսկսել ավիահաղորդակցությունը մյուս երկրների հետ և սկսել զբոսաշրջիկներ ընդունել հուլիսի 1–ից։ Սակայն պլանները փոխվեցին։
Հուլիսի 1–ից զբոսաշրջիկներ Վրաստան չեն գա։
Չեն կարող գալ նաև Վրաստանի քաղաքացիները, որոնք արտասահմանում են ապրում, այդ թվում՝ ուսանողները։
Այն պահից, երբ Վրաստանի կառավարությունը հայտարարել է հուլիսի մեկից սահմանները բացելու մասին, նրանցից շատերը հուլիսի համար տոմս են գնել, սակայն չվերթները չեղարկվել են։
Զբոսաշրջության ոլորտում զբաղված մարդիկ անորոշության մեջ են․ նրանք պատրաստվում էին հյուրեր ընդունել հուլիսի 1–ից և ծախսեր էին արել՝ սեզոնին նախապատրաստվելու համար։ Սակայն այժմ պարզ է, որ հյուրեր չեն լինելու, համենայն դեպս, մինչև օգոստոս։
Դեռևս հայտնի չէ, թե երբ են վերագործարկվելու միջազգային չվերթներն ու երբ են սահմանները բացվելու օտարերկրյա զբոսաշրջիկների համար։
Էկոնոմիկայի նախարար Նաթիա Տուրնավան ասում է, որ պետությունը սպասում է, թե ինչ դիրքորոշում կձևավորի Եվրամիությունը սահմանների բացման վերաբերյալ, իսկ հետո արդեն որոշումներ կկայացնի։
«Ըստ ամենայնի, մենք ստիպված ենք երկարաձգել կանոնավոր չվերթների սահմանափակումը մինչև հուլիսի վերջ։ Չարտերային չվերթներ դեռևս իրականացվում են, և մենք կշարունակենք առողջապահության և արտաքին գործերի նախարարությունների հետ համաձայնեցման այդ պրակտիկան։ Ինչ վերաբերում է զբոսաշրջությանն, ապա մենք սպասում ենք Եվրամիության որոշմանն ու հետևում տարբեր երկրների համաճարակային իրավիճակին, որը շատ փոփոխական է», — ասել է Տուրնավան։
- Դիմակներ, պատնեշներ, բարձր գներ։ Ի՞նչ տեսք է ունենալու զբոսաշրջությունը Վրաստանում կորոնավիրուսից հետո
- Կորոնավիրուսի բռնկում Հայաստանում․ եզրակացություններ Վրաստանի համար
Ըստ նրա՝ պետության առաջնահերթությունը մարդկանց առողջությունն է, այդ պատճառով էլ այն «զգուշությամբ է վերաբերվելու զբոսաշրջիկների հարցին»․
«Մի քանի ուղղություն է լինելու։ Գործնական ուղևորությունների և ուսանողների համար առանձին կանոններ են մշակվելու։ Այդ կարգավորումներն ուղղված են լինելու առողջության պաշտպանությանը, սակայն ավելի պարզեցված տեսքով։ Մենք սպասում ենք նաև Եվրամիության որոշմանը, որը դեռ վերջերս է բացել սահմաններն անդամ երկրների միջև տեղաշարժի համար, և այս օրերին որոշում կկայացնի այլ երկրների վերաբերյալ, որոնք անդամ չեն, այդ թվում՝ Վրաստանի», — ասել է էկոնոմիկայի նախարարը
