Facebook–ի նախկին աշխատակիցը գրել է ընդդիմադիրների վրա Ադրբեջանի իշխանությունների հարձակումների մասին

Facebook սոցցանցի նախկին աշխատակից Սոֆի Չժանը պնդում է, որ Ադրբեջանի իշխանությունը բոտերի էժանագին և պարզ ցանցերի միջոցով հարձակվում է ընդդիմադիրների վրա։ Նրա կարծիքով՝ նույն մեթոդներով են աշխատում նաև Ռուսաստանում, Չինաստանում և Իրանում։

Հոդվածում, որը հրապարակվել է The New York Times–ում, հեղինակ Շիրա Ֆրենկելը նշում է, որ ԱՄՆ–ում սոցցանցի ղեկավարները հայտարարել են կեղծ էջերի դեմ պայքարի մասին։ Մյուս երկրներում նույն թեման Ֆեյսբուքի մենեջմենթի ուշադրությունից դուրս է մնում, հայտարարում է Սոֆի Չժանը։

• Ի՞նչն է անհանգստացնում Վրաստանի բնակչությանը խորհրդարանական ընտրություններից մեկ ու կես ամիս առաջ․ հարցում

• Ինչո՞ւ են Ադրբեջանում բանկեր փակվում 

«Facebook–ում անցկացրած երեք տարում ես հայտնաբերեցի այլ երկրների կառավարությունների կողմից՝ սեփական քաղաքացիներին մոլորության մեջ գցելու համար մեր հարթակը հսկայական մասշտաբներով օգտագործելու աղաղակող փորձեր», — գրել է Սոֆի Չժանը։

Աշխատակցուհին Ֆեյսբուքում աշխատանքից ազատվել է 2020 թ–ի օգոստոսին և լքել ընկերությունը սեպտեմբերի սկզբին։ Չժանը ենթադրում է․ այդ որոշման պատճառներից մեկն այն է, որ ինքն անտեսել է իր առօրյա աշխատանքային պարտականությունները՝ կենտրոնանալով կեղծ էջերի քաղաքական գործունեության վրա։

Ի պատասխան Սոֆի Չժանի պնդմանը՝ Ֆեյսբուքը հայտարարել է, որ այնտեղ պարբերաբար հեռացվել են ազդեցության համակարգված արշավները, և անվտանգության ուղղությամբ մեծ թիմ է աշխատել։

«Ոչ արժանահավատ համակարգված վարքի դեմ աշխատանքը մեր առաջնահերթությունն է, սակայն մենք լուծում ենք նաև սփամի և կեղծ փոխազդեցության խնդիրները։ Մենք մանրամասն ուսումնասիրում ենք յուրաքանչյուր խնդիր, այդ թվում՝ այնպիսիք, որոնք բարձրացնում է տիկին Չժանը, նախքան միջոցներ ձեռնարկելն ու որպես ընկերություն դա հանրային կերպով հայտարարելըը», — ասում է Լիզ Բուրժուան՝ Facebook–ի մամուլի քարտուղարը։

Այս նորությունը սոցցանցերի ադրբեջանական տիրույթում ամենաքննարկվողն է դարձել։ Մի քանի բնորոշ մեկնաբանություն․

«Ի՞նչ բոտեր։ Գաղտնաբառերն են գտնում, էջեր են կոտրում։ Եվ ի՞նչ, գիտեք, թե այդ մասին չգիտի Ֆեյսբուքի ղեկավարությո՞ւնը»։

«Նորմալ է։ Ոչ մի ընկերություն խնդիրներ չի ուզում երկրի ղեկավարության հետ»։

«Բոտեր ունի նաև ընդդիմությունը, ո՞վ է դրանց դեմ պայքարելու»։