Ադրբեջանում նախկին նախարարը մեղադրվում է մեկ միլիարդ եվրոյի յուրացման մեջ

Ադրբեջանի աշխատանքի և սոցիալական պաշտպանության նախարարի պաշտոնից հեռացված Սալիմ Մուսլիմովին ձերբակալել են հատուկ ծառայությունների աշխատակիցները։ Նշվել է, որ նա մեղադրվում է հսկայական գումարի յուրացման մեջ։ Լրատվամիջոցները հրապարակել են այն օբյեկտների ցանկը, որոնք պատկանում են նախկին նախարարին։

• Սկանդալ Վրաստանում․ դպրոցականերին ստիպել են քաղաքապետարանի զուգարանները մաքրել։ Հետաքննություն է ընթանում
• Հեղինակային իրավո՞ւնք, թե՞ անիրավություն Ադրբեջանում
• Մոսկվա՞, թե՞ Բրյուսել։ Ինչո՞ւ են Հյաստանի վարչապետին արևմտամետ քաղաքական գործիչ համարում

2018 թ-ին պաշտոնանկ արված Սալիմ Մուսլիմովի ձերբակալության մասին նորությունը հաստատել է ինչպես նրա ընտանիքը, այնպես էլ իրավապահ մարմինները։

Մուսլիմովը մեղադրվում է կոռուպցիայի համար, նշում է sfera.az պարբերականը։ Նախարարի պաշտոնը զբաղեցնելու տարիներին նա յուրացրել է ավելի քան երկու միլիարդ մանաթ [մոտ 1 մլրդ եվրո]։

Տեղական լրատվամիջոցները նաև հրապարակում են Բաքվի տարածքում նրա էլիտար տարբեր օբյեկտների ցանկը, որոնց սեփականատերն են նախկին նախարարն ու նրա որդիները։

Նշվում է, որ ORİON PALACE շքեղ պալատի սեփականատերը հենց Սալիմ Մուսլիմովն է։

Նրան է պատկանում նաև ORİON CONSTRUCTİON ընկերությունը, որը զբաղվում է բնակելի շենքերի և այլ օբյեկտների շինարարությամբ։

Իսկ ORİON CARS ընկերությունը, որը պատկանում է նախկին նախարարին, Ադրբեջանի մայրաքաղաքի տարբեր հատվածներում ավտոսրահներ է վարձակալում լյուքս դասի ավտոմեքենաների վաճառքի համար։

Եվս մեկ ընկերություն՝ ORİON CREATİVE SOLUTİONS-ը, նախկինում գրանցված է եղել Մուսլիմովի որդու՝ Թուրգայ Մուսլիմլիի անունով։ Սակայն հետո ըներությունը վերագրանցվել է նրա մյուս որդու՝ Ասիմ Մուսլիմլիի անունով։

Սալիմ Մուսլիմովը Աղսուինի շրջանում 60 հեկտար մակերեսով պլանտացիաներ ունի։ Այնտեղ սխտոր է աճեցվում։ Այդ շրջանում էլ հենց տեղակայված է նախկին նախարարի ամառանոցը։

Նշվում է, որ բոլոր նշված ընկերությունների իրավաբանական հասցեները համընկնում են նախկին նախարարի որդի Թուրգայ Մուսլիմլիի տան հասցեի հետ։ Նա Էդինբուրգի համալսարանն է ավարտել, որից հետո սկսել է բիզնեսով զբաղվել։