Միացյալ Նահանգների նախագահը շնորհավորել է Նիկոլ Փաշինյանին Հայատանի վարչապետի պաշտոնում նշանակվելու առթիվ։ Իր շնորհավորական ուղերձում Բայդենը խոսել է Լեռնային Ղարաբաղի հակամարտության խաղաղ կարգավորման մասին, անդրադարձել է նաև հայ ռազմագերիների ազատ արձակման հարցին։
«ԱՄՆ-ն ուրախ էր աջակցել Ադրբեջանից հայ ռազմագերիներին ազատ արձակելու ջանքերին, և մենք շարունակելու ենք կոչ անել անվտանգ վերադարձնել բոլոր գերիներին: Հուսով ենք, որ այս հարցում Վրաստանի աջակցությամբ մեր ունեցած առաջընթացը կարևոր հիմք կհանդիսանա հետագա տարածաշրջանային համագործակցության համար՝ ի հավելումն Մինսկի խմբի համանախագահների կողմից նախաձեռնված քննարկումների», — նշել է Ջո Բայդենը։
Միացյալ Նահանգների ղեկավարն ընդգծել է, որ ԱՄՆ-ն հանձնառու է աջակցել կողմերին բանակցելու համապարփակ, խաղաղ կարգավորման շուրջ՝ ԵԱՀԿ Մինսկի խմբի հովանու ներքո։ Նա հորդորել է Հայաստանին ու Ադրբեջանին հնարավորինս շուտ ներգրավվել առարկայական բանակցություններում։
Բայդենը գնահատել է վերջին երեք տարիներին հակակոռուպցիոն պայքարում Հայաստանի գրանցած առաջընթացը և ուղերձն ամփոփել երկկողմ հարաբերությունների սերտացման ակնկալիքով։
