Մոսկվայի դատարանն ուկրաինացի լրագրողին 12 տարվա ազատազրկման է դատապարտել լրտեսության համար
Նովայա գազետայի նյութը
Մոսկվայի քաղաքային դատարանը 12 տարվա ազատազրկման է դատապարտել ուկրաինական «Ուկրինֆորմ» տեղեկատվական գործակալության լրագրող Ռոման Սուշչենկոյին: Նա պատիժը կկրի խիստ ռեժիմի գաղութում:
Մեղադրող կողմը պնդում էր, որ Ռոման Սուշչենկոն Ուկրաինայի ռազմական հետախուզության գլխավոր վարչության կադրային աշխատակից է և Ռուսաստան է ժամանել Ռուսաստանի զինված ուժերի և Ռոսգվարդիայի մասին գաղտնի տեղեկություններ հավաքելու համար:
Լրագրողն իր մեղքը չի ճանաչում:
Մինչ այդ «Ուկրինֆորմ» գործակալությունը բազմիցս հայտարարել է, որ Սուշչենկոն 2002թ-ից իր աշխատակիցն է, իսկ 2010թ-ից աշխատում է Ֆրանսիայում որպես գործակալության սեփական թղթակից: Լրագրողը Մոսկվա է ժամանել անձնական գործով, քանի որ արձակուրդում էր, նշել են գործակալությունում:
Սուշչենկոյի գործը «գաղտնի» կնիքով էր, դրա վերաբերյալ դատական նիստերն անցկացվում էին փակ ռեժիմով:
Ռոման Սուշչենկոն ձերբակալվել է Մոսկվայում Ռուսաստանի Անվտանգության դաշնային ծառայության կողմից 2016թ-ի հոկտեմբերի 3-ին: Նրա դեմ քրեական գործ է հարուցվել «լրտեսության» մեղադրանքով, որում խոսք է գնում արտասահմանյան պետությանը փոխանցելու նպատակով պետական գաղտնիք հանդիսացող տվյալներ հավաքագրելու մասին:
Սուշչենկոյի պաշտպանությունն, իր հերթին, հայտարարում էր, որ Մոսկվայում են ապրում լրագրողի ազգականներն ու ընկերները, իսկ վերջին անգամ նա Մոսկվա էր ժամանել իր զարմիկին տեսակցելու նպատակով:
