Մոլդովայում ընտրություններում հաղթել է նախագահ Մայա Սանդուի եվրոպամետ կուսակցությունը
Մոլդովայում ընտրություններում հաղթել է Մայա Սանդուի եվրոպամետ կուսակցությունը
Մոլդովայում կիրակի՝ հուլիսի 11-ին կայացած արտահերթ խորհրդարանական ընտրություններում առավելագույն ձայն է ստացել եվրոպամետ «Գործողություն և համերաշխություն» կուսակցությունը, որը սատարում է գործող նախագահ Մայա Սանդուին։
Ընդհանուր առմամբ, Մոլդովայի ընտրություններին մասնակցում էր 20 կուսակցություն, երկու դաշինք և մեկ անկախ թեկնածու։ Ինչպես հաղորում է News Maker մոլդովական պարբերականը, ձայների 99,53%-ի հաշվարկից հետո «Գործողություն և համերաշխություն» (PAS) կուսակցությունը ստացել է 52,51% ձայն, ինչը նրան թույլ կտա խորհրդարանական մեծամասնություն ձևավորել։
- Քաղաքական ճգնաժամ Մոլդովայում․ նախագահը ցրել է խորհրդարանը
- Մայա Սանդու՝ Մոլդովայի նոր նախագահը․ ի՞նչ սպասել
Նախագահական կուսակցությունից զատ՝ խորհրդարան է անցել նաև Սոցիալիստների կուսակցության ու Կոմունիստների կուսակցության դաշինքը, որը գլխավորում է նախկին նախագահ, ռուսամետ քաղաքական գործիչ Իգոր Դոդոնը։ Դաշինքը ստացել է 27,37% ձայն։
Օրենսդիր մարմին է անցել նաև «Շոր» պահպանողական կուսակցությունը՝ 5,78% ձայն։
Արտահերթ ընտրություններ են նշանակվել այն բանից հետո, երբ Մոլդովայի նախագահ Մայա Սանդուն հայտարարել է խորհրդարանը ցրելու մասին։ Պատճառը քաղաքական ճգնաժամն էր և նախկին նախագահ Իգոր Դոդոնին սատարող խորհրդարանական մեծամասնության հետ նախագահի դիմակայությունը։
Եվրոպամետ քաղաքական գործիչ, 46-ամյա Մայա Սանդուն 2020 թ-ի նոյեմբերին կայացած ընտրություններում հաղթել էր այն ժամանակվա նախագահ Իգոր Դոդոնին։
Սակայն նախկին խորհրդարանում մեծամասնությունը պատկանում էր Դոդոնի Սոցիալիստական կուսակցությանն ու «Շոր» կուսակցության նրա դաշնակիցներին։
