Հայաստանում նոր թղթադրամներ են դրվում շրաջանառության մեջ
Հայկական դրամի 25–ամյակի կապակցությամբ Կենտրոնական բանկը որոշել է 2018 թ.–ից շրջանառության մեջ դնել նոր տեսքով դրամներ: Դա երրորդ սերնդի կոմպոզիտային թղթադրամներ են, որոնք բաղկացած են թղթից ու պոլիմերից (պլաստիկից): Նոր թղթադրամները նախորդներից տարբերվում են ոչ միայն որակով, այլև՝ նկարազարդումներով:
Նոր 1000 դրամանոց թղթադրամների վրա կպատկերվի գրող, բանաստեղծ Պարույր Սևակը, 5000-անոցի վրա 20-րդ դարի ամերիկյան գրականության ականավոր ներկայացուցիչներից, ազգությամբ հայ Վիլյամ Սարոյանը, 10 000 դրամի վրա՝ կոմպոզիտոր, երգահան Կոմիտասը, 20 000 դրամի վրա՝ նկարիչ Հովհաննես Այվազովսկին, 50 000-անոց թղթադրամների վրա Հայոց Եկեղեցու առաջին կաթողիկոս Սուրբ Գրիգոր Լուսավորիչը:
Համացանցում բուռն քննարկում է սկսվել: Ֆեյսբուքյան շատ օգտատերեր անգամ թղթադրամների սեփական զավեշտալի տարբերակներն են առաջարկում: Հիմնականում քննարկվում է՝ քննադատվում կամ ողջունվում նոր թղթադրամների վրա պատկերված հայ նշանավոր գործիչների ընտրությունը և դիզայնը:
Ներկայացնում ենք ֆեյսբուքյան օգտատերերից մի քանիսի գրառումները.
«Ազգային արժույթը չպիտի նման լինի ցիգանի դեյրայի»,
«Այս աժիոտաժը ու համազգային դիզայներական շարժումը լրիվ անհիմն են: Վառ գույները կմշակվեն, կբերվեն ավելի հանգիստ, ոչ կոնտրաստային տեսքի ու ամեն ինչ կընկնի իր տեղը»,
«Ընտրական 5000 և 10 000 դրամ կաշառքների տեսքը կփոխվի…»:
Կենտրոնական բանկը զգուշացրել է, որ նոր թղթադրամների ներդրումը որևէ խնդիր չի առաջացնի ո′չ բնակչության, ո′չ բիզնեսի շրջանում։ Նոր փողերի ներդրման գործընթացը կընթանա սահուն, այն չի նախատեսում թղթադրամների առգրավում։ Գործող դրամները կմնան շրջանառության մեջ անժամկետ և կդադարեն գոյություն ունենալ միայն մաշվածության հետևանքով: Չի փոխվելու նաև դրանց անվանական արժեքը: Այսինքն՝ 1000 դրամանոց նոր թղթադրամը կունենա նույնպիսի արժեք, որքան նախկինը, պարզապես կլինի այլ նկարազարդմամբ:
