Հայաստանում հակակոռուպցիոն անկախ մարմին է ստեղծվում

Հայաստանում որոշում է ընդունվել նոր հակակոռուպցիոն մարմնի ստեղծման վերաբերյալ, որը զբաղվելու է կոռուպցիայի կանխարգելման հարցերով: Հայաստանյան լրատվամիջոցներին այս մասին հայտնել է ՀՀ արդարադատության նախարարի տեղակալ Սուրեն Քրմոյանը:

«Օրենքի նախագիծը՝ հակակոռուպցիոն մարմին ստեղծելու վերաբերյալ արդեն իսկ մշակված է. այն դրված է լայն քննարկման: Մոտակա շաբաթների ընթացքում օրինագիծը կներկայացվի կառավարության հաստատմանը: Այն կլինի անկախ մարմին, որը զբաղվելու է կոռուպցիայի կանխարգելման հարցերով, բավականաչափ լայն լիազորությունների շրջանակներում»,- ընդգծել է Քրմոյանը:

Հարցը բուռն քննարկումների առարկա է դարձել ընդդիմության, հասարակական կազմակերպությունների, իշխանության համար:

Իշխող մեծամասնության պատգամավորներից Գևորգ Կոստանյանը, ով ՀՀ նախկին գլխավոր դատախազն է, չի տեսնում նոր մարմին ստեղծելու անհրաժեշտություն. «Մենք կարող ենք ստեղծել այդպիսի 10 մարմին, բայց դա չի նշանակում, որ այն կարող է նպաստել կոռուպցիայի դեմ պայքարի արդյունավետությանը»:

Խորհրդարանական ընդդիմադիր «Ելք» խմբակցության պատգամավոր, իրավապաշտպան Արտակ Զեյնալյանն էլ է այս առնչությամբ ասել, որ կողմնակից չէ փայլուն, հնչեղ անվանումներով լրացուցիչ մարմիններ ստեղծելուն. «Ես կողմնակից եմ, որ գործող մարմնին՝ կոռուպցիայի դեմ պայքարի խորհրդին համապատասխան լիազորություններ տրվեն, որպեսզի այն կարողանան իր գործառույթներն ամբողջովին իրականացնել»:

Միաժամանակ Հայաստանում Եվրամիության պատվիրակության ղեկավար, դեսպան Պյոտր Սվիտալսկին շեշտել է. «Եթե Հայաստանում կոռուպցիան չստանա արժանի պատասխան, ապա դժվար թե Եվրամիությունից հնարավոր լինի սպասել էական ներդրումներ Հայաստանի տնտեսությունում”:

Դեսպանի խոսքով՝ անցյալ տարի ԵՄ-ն Հայաստանի կառավարությունից ստացել է երաշխիքներ այլ որորտներում ևս երկկողմ համագործակցության խորացման պատրաստակամության մասին: