Հայաստանի գործող և ապագա ղեկավարների միջև հակադրություն չկա

ՀՀ Նախագահ Սերժ Սարգսյանը հերքում է հայաստանյան լրատվամիջոցներում տարածված լուրերը, թե իր և վարչապետ Կարեն Կարապետյանի հարաբերությունները լարված են:

«Պարբերաբար հրապարակվող լուրերը իբր գոյություն ունեցող հակասությունների, հակամարտության մասին՝ մտացածին են»,- ասել է նախագահը՝ նշելով, թե իրենք գիտեն «ովքեր են այդ բեմադրության հեղինակները, ինչպիսին են նրանց ցանկությունները»:

Հայաստանում մամուլը տևական ժամանակ գրում է այն մասին, որ 2018թ.-ից հետո Կարեն Կարապետյանը չի շարունակի պաշտոնավարել որպես վարչապետ, և այդ պաշտոնը կզբաղեցնի այդ պահին իր լիազորությունները ավարտող Սերժ Սարգսյանը:

Իսկ վարչապետի պաշտոնը, համաձայն 2015 թ. ընդունված սահմանադրական փոփոխությումների, Հայաստանում կստանա առաջնային մանդատ:

Սերժ Սարգսյանը լրագրողների հետ ճեպազրույցում այսօր հայտարարել է, որ ՀՀ վարչապետ Կարեն Կարապետյանը հրաժարական տալու որևէ պատճառ չունի: Նա նշել է, որ թե՛ երկրում, թե՛ Հայաստանի հանրապետական կուսակցությունում, որը ղեկավարվում է իր կողմից, առողջ աշխատանքային մթնոլորտ է: