«Զելենսկու մասին երբեք վատ չեմ արտահայտվել»․ Վրաստանի վարչապետ
Կոբախիձեն՝ Ուկրաինայի հետ հարաբերությունների մասին
Վրաստանի վարչապետ Իրակլի Կոբախիձեն հայտարարել է, որ Թբիլիսին պատրաստ է «անել ամեն ինչ» Ուկրաինայի հետ հարաբերությունները հնարավորինս վերականգնելու համար՝ չնայած երկու երկրների միջև կուտակված խնդիրներին։
Վարչապետը նշել է, որ երբեք անձամբ չի հիշատակել Ուկրաինայի նախագահ Վոլոդիմիր Զելենսկուն բացասական համատեքստում, քանի որ Ուկրաինան բարեկամ երկիր է, որը գտնվում է պատերազմական իրավիճակում։
«Ես անձամբ երբեք չեմ հիշատակել Զելենսկուն բացասական համատեքստում, և դրա համար կա մեկ պարզ պատճառ. նա այն երկրի նախագահն է, որը ներկա պահին պատերազմական իրավիճակում է, և այդ երկիրը մեր բարեկամն է։ Հետևաբար, ես միշտ զգույշ եմ եղել իմ խոսքերում, մասնավորապես՝ Զելենսկու վերաբերյալ»,- ասել է Կոբախիձեն։
Նրա խոսքով՝ Վրաստանն ու Ուկրաինան միավորում է պատմությունը, ինչը հիմք է ստեղծում նրանց միջև համագործակցության բարելավման համար։ Նա պնդել է, որ վրացական կողմը պատրաստ է ձեռնարկել «բոլոր խելամիտ քայլերը»՝ ինչպես երկրների, այնպես էլ իշխանությունների միջև հարաբերությունները վերականգնելու համար։
Կոբախիձեն նաև իր համերաշխությունն է հայտնել ուկրաինացի ժողովրդին և ընդգծել, որ Վրաստանը լիովին աջակցում է Ուկրաինային և հետաքրքրված է բարեկամական հարաբերությունների պահպանմամբ։
Ըստ Կոբախիձեի՝ Զելենսկու հետ իր վերջին հանդիպումը տեղի է ունեցել բարեկամական մթնոլորտում և հիմնականում կենտրոնացած է եղել ապագայի վրա՝ չնայած այն հանգամանքին, որ երկու երկրների միջև առկա խնդիրները մնում են չլուծված։ Նա հիշատակել է մի քանի վիճելի հարցեր, այդ թվում՝ նախկին պաշտոնյաների և դիվանագիտական որոշումների հետ կապված, սակայն նկատել է, որ ինքը և Զելենսկին հանդիպման ժամանակ չեն խորացել այդ թեմաների մեջ։
Վրաստանի և Ուկրաինայի առաջնորդները հանդիպել էին Երևանում մայիսի 4-ին՝ Եվրոպական քաղաքական համայնքի գագաթնաժողովի շրջանակում։ Վրաստանի կառավարության փոխանցմամբ՝ հանդիպումը տեղի էր ունեցել ուկրաինական կողմի նախաձեռնությամբ։
Հանդիպումից հետո Վոլոդիմիր Զելենսկին սոցցանցերում գրել էր, որ Վրաստանի և Ուկրաինայի միջև մնում են չլուծված հարցեր, սակայն երկխոսությունը կարևոր է բոլոր մակարդակներում, և համագործակցությունը կշարունակվի։
Հետևեք մեզ — Facebook | Youtube
Կոբախիձեն՝ Ուկրաինայի հետ հարաբերությունների մասին
