«Պարտավոր ենք դեմ կանգնել ագրեսիային և աջակցել ՀՀ-ին»․ Կիպրոսի ԱԳ նախարար
Կիպրոսի ԱԳ նախարարը Երևանում
«Հարկադրանքի և ուժի կիրառումը չեն կարող լինել երկխոսության և վեճերի խաղաղ կարգավորման այլընտրանք»,- այսօր Երևանում հայտարարել է Կիպրոսի արտաքին գործերի նախարարը։ Կոնստանտինոս Կոմբոսը Հայաստանում է երկօրյա պաշտոնական այցով։
Վերահաստատել է Նիկոսիայի դիրքորոշումը, այն է՝ երկրների ինքնիշխանությունն ու տարածքային ամբողջականությունը պետք է հարգվեն միջազգային իրավունքին և ՄԱԿ-ի կանոնադրությանը համապատասխան։ Շեշտել է՝ «մենք՝ իբրև միջազգային համայնք, պարտավոր ենք դեմ կանգնել ագրեսիային և աջակցել ՀՀ-ին թե քաղաքական տեսանկյունից, թե նյութապես»։
Հատկանշական է, որ շաբաթվա սկզբին էլ Երևանում էր Հունաստանի պաշտպանության նախարարը, ով հայտարարել էր, որ Հայաստան-Հունաստան-Կիպրոս գործակցությունը հաջողված է։
Արարատ Միրզոյանն ու Կոնստանտինոս Կոմբոսը նախ առանձնազրույց են ունեցել, այնուհետև պատվիրակությունների ընդլայնված կազմով հանդիպում անցկացրել։ Հայաստանի ԱԳՆ փոխանցմամբ՝ նախարարները նաև ստորագրել են ՀՀ և Կիպրոսի Հանրապետության արտաքին գործերի նախարարությունների միջև համագործակցության վերաբերյալ փոխըմբռնման հուշագիր:
Դիվանագիտական ներկայացուցչություններ կբացվեն
«Որոշում ունենք մոտ ապագայում դիվանագիտական ներկայացուցչություն բացել Կիպրոսում։ Մենք ջանք չենք խնայի, որ դա արվի հենց այս տարի»,- հայտնել է Հայաստանի արտգործնախարարը։
Արարատ Միրզոյանը վստահ է՝ մայրաքաղաքներում ամենալուրջ դիվանագիտական, պաշտոնական ներկայությունը կկարողանա խրախուսել և նպաստել հարաբերությունների էլ ավելի ամրապնդմանը։
Կիպրոսի արտաքին գործերի նախարար Կոնստանտինոս Կոմբոսը, իր հերթին, հայտարարել է, որ 2024 թ․-ին Երևանում կբացվի Կիպրոսի դիվանագիտական ներկայացուցչություն։
Կիպրոսը կշարունակի լինել «հավատարիմ ընկեր և ամուր հենարան»
Հայաստանի արտգործնախարարի համոզմամբ՝ Կիպրոսի աջակցությունը զգալի է նաև «Հայաստան-ԵՄ հարաբերությունների հարթության վրա»։ Կիպրոսի ԱԳ նախարարի խոսքով՝ աջակցում են Եվրամիության հետ Երևանի հարաբերությունների խորացմանը, այդ թվում՝ ՀՀ-ում ԵՄ դիտորդների թվի ավելացման տեսքով։
«Կիպրոսը համակարգված և անխոնջ կաշխատի ԵՄ-ՀՀ ինստիտուցիոնալ երկխոսության ամրապնդման ուղղությամբ։ Վճռականորեն կաջակցենք տնտեսական և քաղաքական միջոցներով, որոնք Հայաստանը կմոտեցնեն ԵՄ-ին՝ միևնույն ժամանակ խթանելով բարեփոխումների օրակարգը»,- շեշտել է Կոմբոսը։
Վստահեցրել է՝ Կիպրոսը կշարունակի ՀՀ համար լինել «հավատարիմ ընկեր, վստահելի գործընկեր և ամուր հենարան»։
«Հարաբերությունները գերազանց մակարդակի վրա են»
Կիպրոսի արտաքին գործերի նախարարը արձանագրել է՝ Երևան է եկել «հաստատելու երկկողմ հարաբերությունների գերազանց մակարդակը»։ Կոնստանտինոս Կոմբոսի դիտարկմամբ՝ իր այցը երկու գերատեսչությունների հաճախակի շփումների և տարբեր հարթակներում ունեցած բազմաթիվ հանդիպումների «բնական արդյունքն ու շարունակությունն է»։
«Երևանում եմ վերահաստատելու մեր պատրաստակամությունն ու կամեցողությունն՝ էլ ավելի խորացնելու համագործակցությունը մեր ժողովուրդների միջև։ Սա մեր համատեղ պարտավորությունն է»։
Կիպրոսի արտգործնախարարի համոզմամբ՝ դա հիմնված է խորը արմատներ ունեցող պատմամշակութային կապերի վրա, որոնք մշակվել են նախկին սերունդների կողմից։ Կարծում է՝ ամեն ինչ պետք է անել այն էլ ավելի բարելավելու համար։
Կոմբոսի գնահատմամբ՝ ինչպես Հայաստանի, այնպես էլ Կիպրոսի ժողովուրդներն առերեսվում ու դիմակայում են գոյաբանական սպառնալիքների․
«Մենք ունենք ընդհանուր պատմություն. պատմություն, որտեղ կա հետապնդում, հալածանք, տեղահանում։ Ագրեսիայի ու բռնության զոհեր ենք, և այս ամենում մենք տառապել ենք և շարունակում ենք դիմակայել։ Մենք դիմակայում ենք գոյաբանական սպառնալիքների, մեր երկու ժողովուրդներն էլ վերապրողներ են: Մենք շարունակում ենք աշխատել այս սպառնալիքները վերացնելու ուղղությամբ»։
«Երկկողմ օրակարգը բավականին հարուստ է»
Հայաստանի արտաքին քաղաքական գերատեսչության ղեկավարի համոզմամբ՝ երկու երկրների միջև հարաբերությունները հիմնված են եղբայրության, ջերմ հարաբերությունների, փոխըմբռնման, համերաշխության երկարամյա պատմության վրա։ Ասում է՝ այդ կապերն ամրապնդում են նաև բարձր և բարձրագույն մակարդակի շփումները։
«Հայաստանը Կիպրոսի հետ ունի բավականին հարուստ երկկողմ օրակարգ։ Մենք նաև համերաշխ և գործընկերային հարաբերություններ ենք վայելում միջազգային տարբեր ձևաչափերում և հարթակներում»,- շեշտել է Միրզոյանը։
Նա լրագրողներին հայտնել է, որ Կիպրոսի գործընկերոջ հետ հանդիպման ընթացքում նրան շնորհակալություն է հայտնել գործադիր և օրենսդիր իշխանության մակարդակով «բոլոր զգայուն հարցերում, մասնավորապես՝ Հայաստանի տարածքային ամբողջականության հետ կապված հարցերում աջակցության համար»։
«Երախտիքի խոսք եմ հայտնել նաև Լեռնային Ղարաբաղից փախստականներին ցուցաբերված օգնության համար։ 30 հոգի հնարավորություն ունեցան նաև ապաքինվել Կիպրոսում»,- նկատել է նախարարը։
Հետևեք մեզ — Facebook | Youtube | Telegram
Կիպրոսի ԱԳ նախարարը Երևանում
