Գործ ունենք համավարակի երկրորդ ալիքի հետ․ Հայաստանի վարչապետ

Մայիսի 27-ի դրությամբ Հայաստանում կորոնավիրուսով վարակվածների թիվն ավելացել է 372-ով և հասել 7 774-ի։ Բուժվածների թիվն ավելացել է 35-ով, նրանց ընդհանուր թիվը կազմում է 3 255: Շարունակում են բուժում ստանալ 4 377 մարդ:

Կորոնավիրուսից մահվան ևս յոթ դեպք է արձանագրվել։ Մահացածների ընդհանուր թիվը հասավ 98-ի։

Մահվան դեպքերի վերաբերյալ Առողջապահության նախարարությունից հայտնում են, որ պացիենտները եղել են 85 (կին), 78 (կին), 69 (կին), 60 (կին), 76 (տղամարդ), 66 (կին) և 56 (տղամարդ) տարեկան: Վերջինից բացի, մնացած բոլորն ունեցել են ուղեկցող քրոնիկ հիվանդություններ: 

• Հայաստանում կորոնավիրուսն առանց ախտանիշների տանող հիվանդները պարզապես կմեկուսացվեն տներում
• Քաղաքական գործիչները՝ կորոնավիրուսի մասին։ Ինչո՞ւ է Հայաստանը վարակվածների թվով առաջատարը տարածաշրջանում

Հայաստանում հաստատվել է կորոնավիրուսի համաճարակի բավականին ծանր իրավիճակ: «Գործ ունենք համավարակի երկրորդ ալիքի հետ», — ասել է վարչապետ Նիոկլ Փաշինյանը։ Նա կրկին շեշտել է, որ պարետատան հաստատած կանոններն արդյունավետ են, խնդիրը դրանց պահպանելու մեջ է․

Այս կանոնների պահպանման դեպքում մեր համաճարակային իրավիճակը ոչ միայն կբարելավվի, այլև կձգտի 0-ի․․․ Մեր գործիքակազմի մեջ այսօր կորոնավիրուսի դեմ պայքարի հիմնական խնդիրը մնում է այս կանոնների պահպանումը և մեծ հաշվով հանրային վարքագծի փոփոխությունը, որը համարժեք կլինի համաճարակային իրավիճակին։ Դեռեւս 1 ամիս առաջ մենք հրապարակել ենք մեր ռազմավարությունը համավարակի հետ կապված՝ ասելով, որ մեր խնդիրն է սովորել ապրել կորոնավիրուսի համավարակին զուգահեռ։

Վարչապետը հայտնել է նաև, որ մայիսի 26-ից իրավիճակը հսկելու նպատակով Հայաստանում իրականացվելու են խիստ «ռեյդեր»:

Ինչ վերաբերում է տնտեսական սահմանափակումներին, ապա փոխվարչապետ, պարետ Տիգրան Ավինյանի խոսքով, դրանք մոտ ժամանակներում չեն սպասվում, սակայն կարանտինային ռեժիմի սահմանումը չի բացառվում «որոշակի սցենարի դեպքում»։