Ակտիվիստն իրեն շղթայել է Ադրբեջանի դեսպանատան ցանկապատին. միանձնյա ակցիա Բեռլինում

Բողոքի ակցիա Բեռլինում՝ ի պաշտպանություն Թոֆիկ Յաղուբլուի

Ադրբեջանցի Նաթիկ Մամեդովը Բեռլինում միանձնյա բողոքի ակցիա է իրականացրել՝ իրեն շղթայելով Ադրբեջանի դեսպանատան ցանկապատին: Այդ կերպ նա ուշադրություն է հրավիրել ազատազրկման մեջ գտնվող ադրբեջանցի քաղաքական գործիչ Թոֆիկ Յաղուբլուի գործի վրա:

Նաթիկ Մամեդովը Գերմանիայում է ապրում ավելի քան 20 տարի, Գերմանիայի Ստորին Սաքսոնիայում ձախերի երիտասարդական կազմակերպության վարչության անդամ է:

«Որպես Ադրբեջանի քաղաքացի՝ ես իմ պարտքն եմ համարում աջակցել Թոֆիկ Յաղուբլուի պայքարին: Ես հասկանում եմ, որ հնարավոր է՝ այս ակցիայից հետո այլևս չկարողանամ մեկնել Ադրբեջան: Բայց Թոֆիկը գիտակցաբար է ռիսկի դիմում և պատրաստ է մահանալ իր համոզմունքների համար: Մի՞թե այն, ինչ անում ենք մենք, կարելի է համեմատել դրա հետ»,- ասում է Նաթիկը:

Նա պատմում է իր բողոքի ակցիայի խորհրդանշական լինելու մասին. «Շղթան խորհրդանշում է Ադրբեջանի քաղաքական բանտարկյալներին: Սա նշանակում է, որ բանտարկյալների ձեռքերը շղթայված են, նրանք զրկված են ազատությունից»:

Նաթիկ Մամեդովը նշում է, որ Ադրբեջանի իշխանություններն անտեսում են Թոֆիկ Յաղուբլուի հացադուլը։

«Եթե այսպես շարունակվի, նրան բանտից դուրս կբերեն մահացած։ Ահա թե ինչու եմ ես ազատություն պահանջում։ Ազատություն Թոֆիկ Յաղուբլուին։ Նա պետք է ազատ արձակվի ավելի քան 350 այլ քաղբանտարկյալների հետ միասին։ Կեցցե՛ ազատությունը»:

Բողոքի ակցիան ավարտվել է առանց ոստիկանության միջամտության։ Աշխատանքային ժամն ավարտված է եղել, տեղում դեսպանատան աշխատակիցներ չեն եղել։

Կոչ Ալիևին. «Ազատե՛ք «Աշխատանքային սեղանի» ակտիվիստներին»

Խնդրագիրն ուղղված է «Աշխատանքային սեղան» արհմիությունների կոնֆեդերացիային աջակցելուն։ Կառույցի չորս անդամներ ձերբակալված են։

Թոֆիկ Յաղուբլուի մասին

Յաղուբլուն առաջին անգամ ձերբակալվել է 1998 թվականի սեպտեմբերի 12-ին Բաքվի Շատրվանների հրապարակում ընդդիմության հանրահավաքի ժամանակ՝ նախագահական ընտրությունների նախաշեմին: Ստացել է պայմանական ժամկետ՝ երկու տարի: Շարունակել է պնդել, որ մեղադրանքները կեղծված էին քաղաքական պատվերով:

2013 թվականին Յաղուբլուն ձերբակալվել է Ադրբեջանի Իսմայիլիի շրջանում տեղի ունեցած բողոքի ցույցերի հետ կապված: Նրան մեղադրել են հասարակական կարգը խախտող գործողությունների կազմակերպման/ակտիվ մասնակցության և իշխանության ներկայացուցչին դիմադրելու մեջ:

2014 թվականի մարտի 17-ին նա դատապարտվել է ազատազրկման հինգ տարի ժամկետով: Այս ձերբակալությունը խիստ քննադատության է արժանացել միջազգային հանրության կողմից, այդ թվում՝ ԱՄՆ-ի և Եվրամիության:

Նրա կալանքի տվյալ ժամանակահատվածում մահացել է նրա դուստրը՝ Նարգիզը:

2016 թվականի մարտին Յաղուբլուն համաներմամբ ազատ է արձակվել: Սակայն արդեն 2020 թվականի մարտին նրան կրկին ձերբակալել են՝ խուլիգանության մեղադրանքով: Ինքը՝ ընդդիմադիրը, ինչպես նաև տեղական և միջազգային իրավապաշտպան կազմակերպությունները գործը շինծու են բնորոշել:

Այդ ժամանակ դատարանը նրան դատապարտել է ազատազրկման 4 տարի 3 ամսով: Ի նշան բողոքի՝ նա հայտարարել է «ցմահ հացադուլ»: Հացադուլի 16-րդ օրը ազատ է արձակվել, սակայն գտնվել է տնային կալանքի տակ:

Հետևեք մեզ — Facebook | Youtube | Telegram

Բողոքի ակցիա Բեռլինում՝ ի պաշտպանություն Թոֆիկ Յաղուբլուի