Սարսափելի հանցագործություն Բաքվում․ երիտասարդը սպանել է իր ընտանիքի հինգ անդամներին
Ադրբեջանում սպանվել է մեկ ընտանիքի հինգ անդամ
Բաքվում հրեշավոր սպանությունների շարք է իրականացվել։ Ընտանիքի հինգ անդամների սպանել են կացնահարելով։ Կասկածյալը նույն ընտանիքի 25-ամյա անդամն է։ Հանցագործությունը ցնցել է ողջ երկիրը։ Այս ողբերգական իրադարձությունը դարձել է լրատվամիջոցներում և սոցցանցերի ադրբեջանական հատվածում քննարկվող թիվ մեկ թեման։
- Ադրբեջանցի ակտիվիստներն ահազանգում են իրավապահների կողմից բռնության ենթարկվելու մասին
- Ինչո՞ւ է ինքնասպանությունը դառնում միակ լուծումը․ իրավիճակը Հայաստանում
- «Ծնողները լռում են»․ Հայաստանում տարեցների նկատմամբ բռնության մասին
Ինչպես հայտնում է Ադրբեջանի ՆԳՆ մամուլի ծառայությունը՝ փետրվարի 13-ին՝ մոտավորապես ժամը 16:30-ին, ոստիկանությունը տեղեկություն է ստացել Բաքվի Խաթայի շրջանում կացնահարելով սպանության մասին։ Միջադեպը տեղի է ունեցել գեներալ Շիխլինսկի փողոցի 29 հասցեում գտնվող տներից մեկում: Սպանվածներն են Ահմեդով Մեհման Ահմեդ օղլուն (ծնված 1972 թ.), Ահմեդովա Բիկե Բադալ գիզին (ծնված 1977 թ.) և Ահմեդով Մուհամմեդ Մեհման օղլուն (ծնված 2015 թ.):
Հաղորդվում է, որ ոստիկանները ընտանիքի անդամների սպանության կասկածանքով բերման են ենթարկել Ահմեդ Մեհման օղլու Ահմեդովին (ծնված 1999 թ.)։
Ահմեդ Ահմեդովի ձերբակալությունից հետո հայտնի է դարձել ևս երկու սպանության դեպքի մասին։ Պարզվել է, որ կասկածյալը, նախքան ծնողներին ու կրտսեր եղբորը սպանելը, գնացել է Սուրախանի թաղամասում բնակվող քրոջ մոտ։ Նա տանն է եղել իր երեխայի հետ։
Քննության տվյալներով՝ Ահմեդ Ահմեդովը կացնահարելով սպանել է իր քրոջը՝ Էլմիրա Մեհման գիզի Ահմեդովային (ծնված 1997թ.) և նրա 5-ամյա դստերը՝ Ուլվիային։ Հետո նա ուղևորվել է իր ծնողների տուն։
Փաստի հիման վրա Խաթայի շրջանի դատախազությունը քրեական գործ է հարուցել Քրեական օրենսգրքի 120.2.4 (դիտավորյալ սպանություն ծայրահեղ դաժանությամբ) և 120.2.7 (երկու և ավելի անձանց սպանություն) հոդվածներով։ Նախաքննությունը շարունակվում է։
Որդու կողմից սպանված կինը Խաթայի շրջանի թիվ 59 միջնակարգ դպրոցի դպրոցի տնօրենն էր։
Զոհերի հարևանները լրագրողներին պատմել են, որ Ահմեդովների ընտանիքը օրինակելի է եղել, և նրանք երբեք խնդիրներ չեն ունեցել։ Բայց, ըստ նրանց, ավագ որդին՝ Ահմեդ Ահմեդովը, հոգեկան խնդիրներ ուներ, և նա երկար ժամանակ ապրել և բուժում է ստացել Ռուսաստանում։ Իսկ Բաքու վերադառնալուց հետո ապրել է ծնողներից առանձին։
Ըստ հարևանների՝ ընտանիքը մեծ աջակցություն է ցուցաբերել Ահմեդ Ահմեդովին, հայրը նրան նույնիսկ մեքենա է գնել, որ տաքսի վարի և գումար աշխատի։
Հարևաններից մեկն էլ պատմել է, որ երբ Ահմեդ Ահմեդովը դեռ 15 տարեկան է եղել, դանակով վիրավորել է հասակակցին, սակայն հոգեկան խնդիրների պատճառով չի կրել պատիժը, ենթարկվել է հարկադիր բուժման։
Փաստաբան Փարվիզ Հաջիևը նշել է, որ եթե ապացուցվի, որ Ահմեդովը հոգեկան խնդիրներ ունի, նա անպատիժ կմնա.
«Եթե անձը հաշվառված է եղել հոգեբուժարանում, հոգեկան խնդիրներ է ունեցել, եթե համապատասխան փորձագետի եզրակացության արդյունքում պարզվել է, որ անձը հանցավոր արարքներ կատարելիս գտնվել է անմեղսունակ վիճակում, պատժի չի ենթարկվի: Կկիրառվեն բժշկական բնույթի պարտադիր միջոցներ»։
Բայց եթե Ահմեդ Ահմեդովը հոգեպես առողջ է, ապա նրան սպառնում է ցմահ ազատազրկում՝ առանց բողոքարկման իրավունքի։
