Ադրբեջանում ձերբակալվել է պաշտպանության նախկին նախարարը
Ձերբակալվել է պաշտպանության նախկին նախարար Ռագիմ Գազիևը։ Հաղորդվում է, որ նախկին նախարարը սոցցանցերում իրականությանը չհամապատասխանող տեղեկություններ է տարածել հայ–ադրբեջանական սահմանին երրորդ օրը շարունակվող մարտերի մասին։
Ինչպես հաղորդում է Անվտանգության պետական ծառայությունը, հիմնարար կասկածներ կան, որ նա գործողություններ է կատարել, որոնք ուղղված են Ադրբեջանի Հանրապետության պաշտպանունակության թուլացմանը, մարդկանց անկարգությունների և պետական իշխանության բռնազավթման կոչ անելով՝ սադրանք է կատարել։
Պաշտպանության նախկին նախարարը ձերբակալվել է Ադրբեջանի Քրեական օրենսգրքի 281 (պետության դեմ հանրային կոչեր) և 282 (սադրանք) հոդվածներով առաջադրված մեղադրանքներով։
Ռագիմ Գազիևը երկրի պաշտպանության նախարարի պաշտոնն էր զբաղեցնում Ադրբեջանի ժողովրդական ճակատի կառավարման տարիներին՝ 1992-93 թթ–ին։ Նրա նախարար լինելու տարիները հիշվել են ճակատում տված տարածքային մեծ կորուստներով։
- Տեսանյութ Ադրբեջանի սահմանից 800 մետր հեռավորության վրա գտնվող հայկական գյուղից
- Կյանքը Հայաստան-Ադրբեջան սահմանին՝ խորհրդային տարիներից մինչ օրս
Նախկին նախարարի կալանքը սոցցանցերում բուռն քննարկումների պատճառ է դարձել։
Մի քանի մեկնաբանություն․
«Նա մերոնց հազարներով զոհաբերել է Ղարաբաղում…»։
«Լավ են արել։ Նրան այն ժամանակ ցմահ էին դատապարտել, պետք չէր ազատ արձակել։ Սխալներն ուղղելու ժամանակն է։ Դեռևս ոչինչ պարզ չէ։
«Հնարավոր է, որ Ռագիմը ճիշտ տեղեկություններ է հաղորդել։ Նրան խանգարեցին»։
«Ադրբեջանը Ռագիմ Գազիևից օգուտ չուներ, երբ նա նախարար էր, հիմա ի՞նչ ասենք»։
«Նրան պետք էր ձերբակալել։ Վաղուց էր պետք ձերբակալել։ Այն ժամանակ հողեր կորցնելու հարցում նրա մեղքը մեծ էր։ Իսկ հիմա նա մարդկանց սադրանքի բացահայտ կոչ է անում»։
