შვიდი სცენარი იმისა, თუ რა დასკვნამდე შეიძლება მივიდეს გამოძიება აშშ-ის საპრეზიდენტო არჩევნებში რუსეთის ჩარევასთან დაკავშირებით " />

შეიძლება თუ არა, რომ აშშ-ის პრეზიდენტი რუსეთის აგენტი აღმოჩნდეს?

შვიდი სცენარი იმისა, თუ რა დასკვნამდე შეიძლება მივიდეს გამოძიება აშშ-ის საპრეზიდენტო არჩევნებში რუსეთის ჩარევასთან დაკავშირებით

აშშ-ის საელჩოს შენობა მოსკოვში, ხედი მის მოპირდაპირე მხარეს განთავსებული ამერიკული მაღაზიიდან, 2017 წელი, REUTERS/ტატიანა მაკეევა

ამერიკის შეერთებული შტატების 2016 წლის საპრეზიდენტო არჩევნებში რუსეთის შესაძლო ჩარევასთან დაკავშირებით უკვე არსებობს გამოძიების შუალედური შედეგები.

გამოძიება 2017 წლის 17 მაისს დაიწყო, როდესაც აშშ-ის კონგრესმა მხარი დაუჭირა ამ საკითხს. დაინიშნა სპეციალური პროკურორი – გამოძიების ფედერალური ბიუროს ყოფილი დირექტორი რობერტ მიულერი.

მაშინვე, ამერიკულმა გამოცემამ Lawfare საკუთარ მკითხველს აშშ-ის პრეზიდენტ დონალდ ტრამპის რუსეთის ხელისუფლებასთან შეთქმულების თაობაზე შვიდი შესაძლო სცენარი შესთავაზა – მოვლენათა შემთხვევითი განვითარებიდან დაწყებული, შპიონაჟით დამთავრებული.

• ტრამპის მრჩეველმა აზერბაიჯანში ბევრს იმედი გაუცრუა

• უკრაინა და რუსეთი: მტრები თუ სავაჭრო პარტნიორები?

• სტალინი, პუტინი, პუშკინი – რუსების გმირები

ახლა, ერთი წლის შემდეგ, მეორე ამერიკულმა გამოცემამ – Wired – გააანალიზა ინფორმაცია, რომელიც ამ დროისთვის საგამოძიებო ჯგუფმა გაასაჯაროვა და შვიდ სცენარს საკუთარი დასკვნები დაუპირისპირა.

WIRED-ის დასკვნით: გამოძიებამ უკვე უარი თქვა პირველ ოთხ შესაძლო სცენარზე და ახლა დისკუსია მეხუთე სცენარის დონეზე მიმდინარეობს.

შვიდი სცენარი

№1 – საუბარია მოვლენებისა და შემთხვევების გასაოცარ დამთხვევაზე

№2 – ტრამპი გარშემორტყმულია რუსოფილებით

№3 – რუსული სპეცსამსახურების ოპერაცია იყო, მაგრამ არ იყო მიმართული კონკრეტულად ტრამპისაკენ

№4 – რუსული დაზვერვა აქტიურად ცდილობდა, გავლენა მოეხდინა აშშ-ის საპრეზიდენტო არჩევნებზე, მაგრამ ტრამპმა ამის შესახებ არ იცოდა

№5 – რუსული დაზვერვა აქტიურად ცდილობდა, გავლენა მოეხდინა აშშ-ის საპრეზიდენტო არჩევნებზე; და ტრამპმა ან იცოდა ამის შესახებ, ან აუცილებლად უნდა სცოდნოდა

№6 – რუსეთს ტრამპის მაკომპრომეტირებელი მასალები აქვს

№7 – აშშ-ის მოქმედი პრეზიდენტი – რუსეთის აგენტია

დღევანდელი გამოძიება უკვე ნომერ №5 და №6 ვარიანტებს შორის აკეთებს არჩევანს

Wired-ში გამოქვეყნებული პუბლიკაციის ავტორები გვახსენებენ, რომ ამჟამად, აშშ-ის მოქმედი პრეზიდენტი ფიგურირებს არა ერთ, არამედ ორ სისხლის სამართლის გამოძიების საქმეში.

ამერიკის საპრეზიდენტო არჩევნებში რუსეთის ჩარევის საქმე.

პორნომსახიობ სტორმი დენიელსისთვის ფულის უკანონოდ გადახდის საქმე, რათა მას არ გაეხმაურებინა ინფორმაცია დონალდ ტრამპთან რომანის შესახებ.

პირველი საქმე სპეციალურ პროკურორს, რობერტ მიულერს მიჰყავს, მეორე – ნიუ-იორკის პროკურორს.

იმ ბრალდებების გაანალიზების შემდეგ, რომელიც ამ ორი საქმის ფარგლებში უკვე წარუდგინეს დონალდ ტრამპის წინასაარჩევნო შტაბის ხელმძღვანელს, პოლ მანაფორტსა და მის პირად იურისტს, მაიკლ კოენს, გამოცემა საშიშ დასკვნამდე მიდის: ახლა არჩევანის გაკეთება უწევთ №5 и №6 ვარიანტებს შორის.

რაც ნიშნავს: რუსული დაზვერვა აქტიურად ჩაერია აშშ-ის საპრეზიდენტო არჩევნებში და ტრამპმა ან იცოდა ამის შესახებ, ან უნდა სცოდნოდა. ან კიდევ, რუსულ მხარეს დონალდ ტრამპის მაკომპრომენტირებელი მასალები გააჩნია.

როგორ აირჩიეს ტრამპი – Wired-ის ვერსია

Wired-ის პუბლიკაციის ავტორები თვლიან, რომ 2016 წლის ზაფხულიდან მოყოლებული, რუსულმა დაზვერვამ არაერთი ნაბიჯი გადადგა იმის შესამოწმებლად, შეიძლებოდა თუ არა „ტრამპთან საქმის დაჭერა“.

ამისათვის იყენებდნენ მისი ოჯახის წევრებს – სიძეს, ჯარედ კუშნერსა და შვილს, დონალდ ტრამპ უმცროსს, მის ადვოკატს, მაიკლ კოენს, წინასაარჩევნო შტაბის თანამშრომელს, ჯორჯ პაპადოპულოსსა და პრეზიდენტის მომავალ ეროვნული უსაფრთხოების მრჩეველს, მაიკლ ფლინს.

ისინი არა მხოლოდ აქტიურად პასუხობდნენ მოსკოვის წინადადებებს, არამედ, თვითონაც იყვნენ ინიციატორები ყველა სახის კონტაქტებისა და მოლაპარაკებების. მათ შორის, აქტიურად განიხილავდნენ ტრამპის კომპანიის სამშენებლო პროექტებს რუსეთის დედაქალაქში.

ეს პროექტი არ განხორციელდა, მაგრამ მასთან დაკავშირებით მოლაპარაკებები მიმდინარეობდა საპრეზიდენტო კამპანიის დროს და ტრამპის პრეზიდენტად არჩევის შემდეგაც.

ტრამპმა არაერთხელ უარყო თავისი ბიზნესინტერესების არსებობა რუსეთში, რუსეთმა კი იცოდა, რომ ეს ტყუილი იყო, რაც თავისთავად აძლევდა მათ ხელში აშშ-ის პრეზიდენტის შანტაჟის ინსტრუმენტს, – წერს Wired-ი.

გამოცემა ასევე იხსენებს უამრავ ინფორმაციას იმის შესახებ, რომ რუსეთის ხელისუფლების ხელში სხვა მაკომპრომეტირებელი მასალებიცაა, რომლებიც მოპოვებულია ტრამპის რუსეთში მოგზაურობის დროს.

ყველაზე აშკარა – ყველაზე სავარაუდოა?

Wired-ი ამტკიცებს, რომ ყველაზე აშკარა სცენარი, ყოველთვის ყველაზე სავარაუდოა.

და ის მდგომარეობს იმაში, რომ ტრამპის ბიზნესკონტრაქტები რუსეთის ხელისუფლებასთან, გადაიზარდა შეთქმულებაში საპრეზიდენტო არჩევნებზე.

გამოცემამ ექსპერტიზისთვის წამყვან ამერიკელ ანალიტიკოსს, ჯეფრი ტობინს მიმართა. აი, მისი დასკვნა:

„მნიშვნელოვანია შევაფასოთ ის, რომ დონალდ ტრამპი მოლაპარაკებებს აწარმოებდა რუსეთთან და, ამავდროულად, გვთავაზობდა პოლიტიკის შეცვლას ამ ქვეყნის მიმართ“.


ასევე წაიკითხეთ