სომხეთის მეორე პრეზიდენტს ახალი ბრალი წაუყენეს - დიდი ოდენობით ქრთამის აღება

სომხეთის საგანგებო საგამოძიებო სამსახურმა ქვეყნის მეორე პრეზიდენტს, რობერტ კოჩარიანს ახალი ბრალი წაუყენა – ახლა მას  განსაკუთრებით დიდი ოდენობის ქრთამის აღება ედება ბრალად.

კონკრეტულად რაში ედება კოჩარიანს ბრალი

სავარაუდო ქრთამის აღებასთან დაკავშირებით რობერტ კოჩარიანისადმი წაყენებული ახალი ბრლადება  სილვა ამბარცუმიანის განცხადებას უკავშირდება.

მეწარმე სილვა ამბარცუმიანმა გასული წლის ნოემბერში განაცხადა, რომ სომხეთის ექს-პრეზიდენტმა რობერტ კოჩარიანმა და სერჟ სარგსიანმა მისგან დიდი ოდენობის ქრთამი აიღეს. ეს კოჩარიანის პრეზიდენტობის პერიოდში ხდებოდა. იმ დროს სერჟ სარგსიანი პრემიერ-მინისტრი იყო.

• სასამართლომ სომხეთის ექს-პრეზიდენტის, რობერტ კოჩარიანის დაპატიმრების გადაწყვეტილება მიიღო

• სომხეთის ექს-პრეზიდენტი რობერტ კოჩარიანი პატიმრობის შემდეგ პოლიტიკაში ბრუნდება

• სომხეთში ქვეყნის ყოფილი პრეზიდენტი რობერტ კოჩარიანი პატიმრობიდან გაათავისუფლეს 

 „არაბებთან გარიგება გავაფორმე, და რათა ჩემთვის ხელი არ შეეშალათ, ქვეყნის პრეზიდენტ რობერტ კოჩრიანსაც გადავუხადე და პრემიერ-მინისტრ სერჟ სარგსიანსაც“, – განაცხადა მაშინ პრეს-კონფერენციაზე ამბარცუმიანმა.

მისი თქმით, საუბარი ეხებოდა არაბი შეიჰისთვის სამთომომპოვებელი კომპანიის აქციების 100%-ის მიყიდვას. გარიგების თანხა 40 მილიონ დოლარს შეადგენდა.

რას ამბობენ ადვოკატები

რობერტ კოჩარიანის ადვოკატმა რუბენ სააკიანმა JAMnews-ს განუცხადა, რომ ექს-პრეზიდენტი ამ საქმეში საკუთარ ბრალს არ აღიარებს და მიიჩნევს, რომ მას პოლიტიკური კონტექსტი ახლავს:

 „კოჩარიანი ბრალს არ აღიარებს, რადგან ეს აბსურდია. ჩვენ დილეტანტებთან ვმუშაობთ, რადგან ისინი ქვეყნის ხელმძღვანელობის პოლიტიკურ ნებას ასრულებენ. რაზე უნდა ვილაპარაკოთ? აქ იურისპუდენციაზე საუბარიც კი არ შეიძლება. და სილვა ამბარცუმიანის საქმეც ამ ნაწილიდანაა“.

რუბენ სააკიანმა ასევე განაცხადა, რომ სილვა ამბარცუმიანის საქმე „1 მარტის“ საქმესთან ერთად ერთსა და იმავე წარმოებაშია გაერთიანებული. კოჩარიანის ადვოკატმა ამასთან დაკავშირებით უკვე გამოხატა დაეჭვება.

 „საერთოდ გაუგებარია, თუ რა საერთო აქვს ამ საქმეს „1 მარტის“ საქმესთან, საიმისოდ, რომ [ბრალის წაყენება] იმავე საქმის ფარგლებში მოხდეს“, – განაცხადა ექს-პრეზიდენტის ადვოკატმა არამ ორბელიანმა.

 „1 მარტის“ საქმე და კოჩარიანის დაპატიმრების წინა ისტორია

კოჩარიანი, „1 მარტის“ საქმის გამო, 2018 წლის დეკემბრიდან უკვე პატიმრობაში იმყოფება. საუბარია 2008 წლის მოვლენებზე. მაშინ, საპრეზიდენტო არჩევნების შემდეგ სომხეთის პირველი პრეზიდენტის ლევონ ტერ-პეტროსიანის მომხრეების აქციები მიმდინარეობდა. ისინი მის გამარჯვებაში დარწმუნებულები იყვნენ და არჩევნების შედეგების გადახედვას მოითხოვდნენ. ცენტრალურმა საარჩევნო კომისიამ კი, კენჭისყრის შედეგების მიხედვით, გამარჯვებულად სერჟ სარგსიანი გამოაცხადა.

დემონსტრაციის დაშლის დროს  საბრძოლო იარაღი გამოიყენეს, რის შედეგადაც 10 ადამიანი დაიღუპა. იმ მომენტისთვის ქვეყნის პრეზიდენტი ჯერ კიდევ რობერტ კოჩარიანი იყო. ცენტრალური საარჩევნო კომისიის მონაცემების მიხედვით არჩეულ სერჟ სარგისანს უფლებამოსილების აღსრულება ჯერ დაწყებული არ ჰქონდა. ამიტომ, ახლა დემონსტრაციის მკაცრად დარბევა და საკონსტიტუციო წყობის დამხობა ბრალად კოჩარიანს ედება.

გამოძიება „1 მარტის“ საქმეზე სომხეთის „ხავერდოვან“ რევოლუციამდე ერთი ადგილიდან არ დაძრულა.  ახალმა მთავრობამ კი, რევოლუციის ლიდერ ნიკოლ ფაშინიანის მეთაურობით, ამ საქმეს ხელი მაშინვე მოჰკიდა.

საბოლოოდ 2018 წლის ივლისში რობერტ კოჩარიანს 2008 წლის 1 მარტის მოვლენებთან დაკავშირებით საკონსტიტუციო წყობის დამხობისთვის ბრალი უკვე წაუყენეს.

28 ივლისს ის „1 მარტის“ საქმეზე პირველად დააპატიმრეს. თუმცა, ორ კვირაში ის გაათავისუფლეს, სააპელაციო სასამართლომ მანამდე პირველი ინსტანციის სასამართლოს მიერ მიღებული მისი დაკავების გადაწყვეტილება უკანონოდ მიიჩნია. გათავისუფლების საფუძვლად იქცა კონსტიტუციის ის მუხლი, რომელიც რობერტ კოჩარიანის, როგორც ყოფილი პრეზიდენტის, ხელშეუხებლობას ეხებოდა.

შემდეგ, 15 ნოემბერს საკასაციო სასამართლომ ეს საქმე ახალი გამოძიების ჩასატარებლად სააპელაციო სასამართლოს  გადასცა.

7 დეკემბერს სააპელაციო სასამართლომ ექს-პრეზიდენტის ხელმეორედ დაპატიმრების გადაწყვეტილება მიიღო.

ამ დღის შემდეგ სომხეთის მეორე პრეზიდენტი ციხეში იმყოფება. ექს-პრეზიდენტის ადვოკატების მრავალრიცხოვანმა გასაჩივრებამ და შუამდგომლობამ შედეგი არ გამოიღო.

რობერტ კოჩარიანი მისთვის წაყენებულ ბრალდებებს არ აღიარებს, და აცხადებს, რომ სომხეთის ახლანდელი ხელისუფლება მისთვის სამაგიეროს გადახდას ცდილობს.

რატომ მიიჩნევს კოჩარიანი მის დაპატიმრებას პოლიტიკურ დაკვეთად

სომხეთის ახლანდელი პრემიერ-მინისტრი ნიკოლ ფაშინიანი 2008 წლის საპრეზიდენტო არჩევნების დროს  პრეზიდენტობის კანდიდატ ლევონ ტერ-პეტროსიანის ინტერესებს წარმოადგენდა. ის აქტიურად მონაწილეობდა საპროტესტო აქციებში, რომლებიც არჩევნების შედეგების გამოცხადების შემდეგ დაიწყო. 1 მარტის ტრაგიკული მოვლენების შემდეგ ოპოზიციური მოღვაწე, მასობრივი არეულობების მოწყობის ბრალდების გამო, წელიწადითა და ოთხი თვით იატაკქვეშეთში გაუჩინარდა.

2010 წლის 1 ივლისს ფაშინიანი ნებაყოფლობით გამოცხადდა პროკურატურაში, ის დააკავეს და შვიდი წლით თავისუფლების აღკვეთა მიუსაჯეს. ერთი წლისა და 11 თვის შემდეგ მას სომხეთის დამოუკიდებლობის 20 წლისთავისადმი მიძღვნილი ამნისტია შეეხო. უფლებადამცველებს მიაჩნიათ, რომ ხელისუფლება, საერთაშორისო სტრუქტურების ზეწოლის გამო, იძულებული გახდა, რომ ასეთი ნაბიჯი გადაედგა.