ლავროვმა ერევანში განაცხადა, რომ ყარაბაღის სამშვიდობო პროცესი გაიყინება

რუსეთის საგარეო საქმეთა მინისტრი სერგეი ლავროვი, რომელიც სომხეთში ორდღიანი ვიზიტით იმყოფებოდა, ჟურნალისტებთან შეხვედრისას ძირითადად მთიანი ყარაბაღის პრობლემის დარეგულირებაზე ლაპარაკობდა.

„ყარაბაღის კონფლიქტის დასარეგულირებლად ყველა კომპონენტი არსებობს. ისინი იმ მრავალრიცხოვან დოკუმენტებშია ჩადებული, რომლებიც 2007, 2009, 2011 წლებიდან გადაეცა ეუთოს გენერალურ მდივანს და შენახულია ეუთოს მინსკის ჯგუფის თანათავმჯდომარეების წინადადებების სახით. მთელი ეს კრებული მოლაპარაკებების მაგიდაზე დევს.

ეს კომპონენტები ერთ პაკეტში შედის, და ძალიან რთულია მათგან ერთ-ერთის, ორის ან სამის აღება და მათი საფუძვლად შეთავაზება, რადგან ასეთ შემთხვევაში, ამოვარდება სხვა, დამბალანსებელი კომპონენტები და იმ შედეგს ვერ მივიღებთ, რის მიღებასაც სინამდვილეში ვაპირებთ“, – განაცხადა რუსეთის საგარეო საქმეთა სამინისტროს ხელმძღვანელმა.

სერგეი ლავროვი დადებითად აფასებს იმ ფაქტს, რომ ორივე პრეზიდენტმა – სომხეთისაც და აზერბაიჯანისაც – ახლახან მათ შორის ჟენევაში გამართული შეხვედრა შეაფასეს როგორც მათი ქვეყნებისთვის სასარგებლო მოვლენა:

„მაგრამ ძალიან მნიშვნელოვანია, რომ ეს დადებითი განწყობა არსებითად დაგვეხმაროს დარეგულირების საქმეში წინსვლისთვის. თანათავმჯდომარეები ამაზე მუშაობენ. ამ დღეებში აზებაიჯანისა და სომხეთის საგარეო საქმეთა მინისტრები მოსკოვში თანათავმჯდომარეებს შეხვდნენ.

„ამერიკელ და ფრანგ კოლეგებთან ერთად გავაანალიზებთ, თუ რომელ წერტილში ვიმყოფებით, და დარეგულირებისთვის აუცილებელ აქტიურ ძალისხმევას მივმართავთ. ყარაბაღის შესახებ მოლაპარაკებებში განსაკუთრებული ოპტიმიზმის მოლოდინი არ არსებობს. სამწუხაროდ, მოლაპარაკებების მთელი გამოცდილება იმაზე მეტყველებს, რომ პრობლემა რთულია და მოლაპარაკებები სწრაფად არ დასრულდება“.

სომხემა ანალიტიკოსებმა ლავროვის მესიჯების შესახებ უკვე გააკეთეს კომენტარები;

 „სინამდვილეში, რუსეთის საგარეო საქმეთა მინისტრი იმას აცხადებს, რომ ყარაბაღის სამშვიდობო პროცესი გაიყინება, ან იმას, რომ ეს გაყინვის პროცესი მინიმუმ იწყება, რის გაკეთებაც სურთ ვაშინგტონს, მოსკოვსა და პარიზს. წინააღმდეგ შემთხვევაში, რუსეთის საგარეო საქმეთა მინისტრი შეშფოთებას გამოთქვამდა იმის გამო, მხარეები ძალიან ნელა მიიწევენ წინ, დარეგულირების პროცესი ჭიანურდება, რაც დაძაბულობის ალბათობას ზრდის“, –  წერს  ვებგვერდი 1in.am -ის ანალიტიკოსი არამ ამატუნი.

პოლიტოლოგი მანველ სარგსიანი მიიჩნევს, რომ ლავროვის განცხადებებში ახალი არაფერია. მისი აზრით, მხარეებს კონფლიქტის მოგვარება რომ სურდეთ, მხოლოდ განცხადებებით  არ დაკმაყოფილდებოდნენ. ამავდორულად აზერბაიჯანიც, სომხეთიც და ეუთოს მინსკის ჯგუფის თანათავმჯდომარე ქვეყნებიც მოლაპარაკებების პროცესს დიალოგის წარმართვის სივრცედ და თავიანთი პოლიტიკური იმიჯისა და წონის ასამაღლებლად იყენებენ.

რუსეთის საგარეო საქმეთა მინისტრი ერევანში ბაქოდან ჩავიდა, სადაც ასევე ორდღიანი ოფიციალური ვიზიტით იმყოფებოდა.

რეგიონში ვიზიტის წინ ლავროვმა განაცხადა, რომ ვიზიტის მიზანი – აზერბაიჯანთან და სომხეთთან დიპლომატიური კავშირის დამყარების 25-ე წლისთავია.

სომხეთის პრეზიდენტმა სერჟ სარგსიანმა დიპლომატიური ურთიერთობების იუბილის თაობაზე განაცხადა:

„დღეს რუსეთსა და სომხეთს შორის არსებული ურთერთობა მართლაც მოკავშირულ ურთიერთობად შეიძლება დახასიათდეს. მე სრულიად ვიზიარებ ამ აზრს, რადგან ყველა დონეზე მოლაპარაკებები პოლიტიკური დიალოგის მაღალი დონით, საგარეო პოლიტიკის ფართო კოორდინაციით, საერთაშორისო სივრცეში ნაყოფიერი თანამშრომლობით, ეკონომიკის, სამხედრო და ჰუმანიტარულ სფეროებში საუკეთესო ურთერთობებით გამოირჩევა“.

სერგეი ლავროვმა და ედვარდ ნალბანდიანმა ეროვნულ გალერეაში გახსნეს ისტორიული ფოტოების და დოკუმენტების გამოფენა – სახელწოდებით „სომხეთი- რუსეთი: საუკუნეობით გამოცდილი მეგობრობა“.