„უსაფრთხო და ძლიერი საქართველოსთვის“-„შაბათის მარში“ თბილისში. ვიდეო ბლოგების სერიიდან „პროტესტი საქართველოში“
შაბათის მარში უსაფრთხო და ძლიერი საქართველოსთვის
“უსაფრთხო და ძლიერი საქართველოსთვის”-ეს არის 1 აგვისტოს გამართული ტრადიციული “შაბათის მარშის” მთავარი გზავნილი.
პროტესტი საქართველოში. ყველა ვიდეო მარშის მონაწილეებმა მსვლელობის დაწყებამდე, წუთიერი დუმილით, პატივი მიაგეს ვერაზე მოკლულ ახალგაზრდას, რომელიც დღეს 18 წლის გახდებოდა.
უწყვეტი პროტესტის 612-ე დღეს ასობით ადამიანი კვლავ შეიკრიბა ავლაბრის მოედანზე. რუსთაველის გამზირზე მიმდინარე სამუშაოების გამო, უკვე მეორე შაბათია, მარში შეცვლილი მარშრუტით, ავლაბრის მეტროდან პარლამენტის მიმართულებით იმართება.
თითქმის ორი წელია საქართველოში უწყვეტი საპროტესტო აქციები მიმდინარეობს. აქციის მონაწილეები ყოველ საღამოს იკრიბებიან ქვეყნის დედაქალაქში, თბილისსა და საქართველოს რამდენიმე პატარა ქალაქში.
აქციების მიმდინარეობისას ათობით ადამიანი დააკავეს. ბევრ მათგანს სისხლის სამართლის ბრალდება წაუყენეს და პატიმრობა მიუსაჯეს. პირველად, დამოუკიდებელი საქართველოს ისტორიაში, გვყავს 150-მდე სინდისის პატიმარი, მათ შორის ქალები. დაპატიმრებულია გამოცემების “ბათუმელებისა” და “ნეტგაზეთის” დამფუძნებელი, მზია ამაღლობელი. მას ორწლიანი პატიმრობა აქვს მისჯილი პოლიციელისთვის სილის გაწვნის ფაქტზე.
აქციის მონაწილეები ითხოვენ გათავისუფლდეს ყველა პოლიტიკური პატიმარი, დაინიშნოს ახალი საპარლამენტო არჩევნები და გაუქმდეს ყველა ის ანტიდემოკრატიული კანონი, რაც ბოლო ორ წელიწადში მიიღო “ქართულმა ოცნებამ”.
პროტესტის ჩასახშობად, “ქართული ოცნება” სულ უფრო ამკაცრებს რეპრესიებს სამოქალაქო საზოგადოებისა და მედიის წინააღმდეგ. თუმცა, უწყვეტი პროტესტი, სხვადასხვა ფორმით, დღემდე გრძელდება.
