რეზოლუცია რუსეთის გარეშე: ქართული ოცნება და ოპოზიცია უკრაინის მხარდამჭერ ტექსტზე ვერ შეთანხმდა
უკრაინის მხარდამჭერი რეზოლუცია
დღეს მმართველი პარტიის წარმომადგენლებსა და ოპოზიციონერ დეპუტატებს შორის, უკრაინის მხარდასაჭერი რეზოლუციის შედგენის მიზნით, შეხვედრა გაიმართა, თუმცა ის უშედეგოდ დასრულდა – დეპუტატები რეზოლუციის ტექსტზე ვერ შეთანხმდნენ. ამის მიზეზი კი გახდა ის, რომ “ქართული ოცნების” მიერ შედგენილ ტექსტში რუსეთი არსადაა ნახსენები.
ოპოზიციონერების თქმით, სადავოა ტექსტის ფორმულირება რუსეთისა და NATO-ს შესახებ, და ასევე, ტექსტის სათაურიც.
“ერთიანი ნაციონალური მოძრაობის” ლიდერი, ხატია დეკანოიძე ამბობს, რომ ოპოზიციას და ხელისუფლებას პარტიული განსხვავებები უნდა დაევიწყებინა და ერთიანი სახელმწიფოებრივი პოზიცია წარედგინათ:
“ვიმუშავეთ ბევრი, წარვადგინეთ ჩვენი მოსაზრებები, მაგრამ დილას შენთანხმებული ვერსიიდან საერთოდ გაქრა “რუსეთის ფედერაცია”. ჩვენი ფრაქცია ამ რეზოლუციის თანაინიციატორი ვერ იქნება, მაგრამ კომიტეტზე ჩვენს შენიშვნებს წარვადგენთ.”
მმართველ პარტიის ერთ-ერთი ლიდერის, მამუკა მდინარაძის განმარტებით, მათი შედგენილი უკრაინის მხარდამჭერი რეზოლუციის ტექსტი, სადაც რუსეთი ნახსენები არაა, “პოპულისტური და პროვოკაციული რიტორიკისგან დაცლილია”.
“ეს არის ის საკითხი, სადაც პირველ რიგში, უნდა გამოვდიოდეთ ეროვნული ინტერესებიდან, ჩვენი მეგობარი უკრაინელი ხალხის ინტერესებიდან, მათი უფლებების დაცვის ინტერესებიდან, მათი სუვერენიტეტისა და ტერიტორიული მთლიანობის დაცვის ინტერესებიდან, აქედან გამომდინარე, უნდა იყოს შეჯერებული“, – ამბობს მდინარაძე და აღნიშნავს, რომ რომ ტექსტს მხოლოდ “ქართული ოცნების” ფრაქცია დააინიცირებს.
● მოსკოვს „მოთმინება ამოეწურა“: როგორ მოიქცევა დასავლეთი უკრაინასთან და საქართველოსთან?
● პოლიტიკური კრიზისი და პრორუსული განწყობები. როგორ ხედავენ საქართველოს უკრაინელი ჟურნალისტები
● სერგეი ლავროვი: საქართველოს NATO-ში ძალით შეყვანას ცდილობენ
რა წერია რეზოლუციაში
რეზოლუციის ტექსტის მიხედვით, საქართველოს პარლამენტი – ეყრდნობა რა საქართველოს კონსტიტუციას, კანონმდებლობასა და საერთაშორისო ხელშეკრულებებს, გამოხატავს ღრმა შეშფოთებას უკრაინაში შესაძლო სამხედრო ესკალაციის გამო და გმობს ყოველგვარ განზრახვას, რომელიც სუვერენული სახელმწიფოს სუვერენიტეტისა და ტერიტორიული მთლიანობის წინააღმდეგ შეიძლება იყოს მიმართული, რაც ახალ საფრთხეს უქმნის არა მხოლოდ უკრაინის, არამედ რეგიონულ მშვიდობასა და უსაფრთხოებას:
“[მთავრობა] აცხადებს, რომ ჩრდილოატლანტიკურ ალიანსში გაწევრიანება არის სახელმწიფოს სუვერენული უფლება და სამხედრო-პოლიტიკური ინსტრუმენტებით ამ უფლების შეზღუდვის ყოველგვარი მცდელობა კატეგორიულად მიუღებელია. მიიჩნევს, რომ უკრაინაში ომის არდაშვება უნდა იყოს საერთაშორისო თანამეგობრობის უმთავრესი საზრუნავი.“
ტექსტში ხაზგასმულია, რომ საქართველოს პარლამენტი სოლიდარობას უცხადებს მეგობარ უკრაინელ ხალხს, რომელსაც ყოველგვარი შესაძლო სამხედრო ესკალაციით მძიმე ზიანი შეიძლება მიადგეს.
“ყოველივე ზემოაღნიშნულის გათვალისწინებით, საქართველოს პარლამენტი მოუწოდებს საქართველოს მთავრობას, დიპლომატიური ინსტრუმენტების გამოყენებითა და სტრატეგიულ პარტნიორებთან მჭიდრო კოორდინაციით, განაგრძოს თავისი წვლილის შეტანა უკრაინაში ომის არდაშვებაში.” – წერია რეზოლუციის ტექსტში.
● „არანაირი ნატო!“ – როგორ ჩაიარა მოლაპარაკებებმა რუსეთსა და აშშ-ს შორის
● „მსოფლიომ დემოკრატია გადაიყვარა და დიქტატურისკენ გადაიხარა“ – რუსი ნობელიანტის სიტყვა
უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა კირილ ბუდანოვმა 2021 წლის 21 ნოემბერს განაცხადა, რომ რუსეთი 2022 წლის იანვარ-თებერვალში უკრაინის აღმოსავლეთსა და სამხრეთზე შესაძლო თავდასხმისთვის ემზადებოდა. დაზვერვის მონაცემებით, უკრაინის საზღვრებთან 92 ათასი რუსი სამხედროა განლაგებული.
რუსეთის პრეზიდენტის პრესმდივანმა დიმიტრი პესკოვმა უკრაინაზე თავდასხმის საფრთხის შესახებ ინფორმაციას ხელოვნურად შექმნილი ისტერია უწოდა. მისი ვარაუდით, სწორედ კიევს სურს საომარი მოქმედებების დაწყება ოკუპირებული ტერიტორიების გასათავისუფლებლად.
თუმცა, უკვე 18 დეკემბერს მოსკოვმა რიტორიკა შეცვალა. საგარეო საქმეთა მინისტრის მოადგილე ალექსანდრ გრუშკომ განაცხადა, რომ თუ დასავლეთი სერიოზულად არ მიიღებს მოსკოვის მიერ შეთავაზებულ „უსაფრთხოების გარანტიებს“, რომლებიც ითვალისწინებს უარს უკრაინის ნატო-ში შესვლაზე, მაშინ რუსეთი „სამხედრო-ტექნიკურ ალტერნატივას“ გამოიყენებს.
რუსულ-ამერიკული მოლაპარაკებები უსაფრთხოების საკითხებზე პირველად 10 იანვარს, ჟენევაში გაიმართა, თუმცა ექსპერტების საერთო მოსაზრებით, მნიშვნელოვანი გარღვევა არ მომხდარა.
