"თუ ომით განისაზღვრება სტატუსის მინიჭება, ჩვენ ომი არ გვინდა", - საქართველოს პრემიერის გზავნილები
რა თქვა ღარიბაშვილმა მთავრობის სხდომაზე
“თუ ომით განისაზღვრება სტატუსის მინიჭება, ჩვენ ომი არ გვინდა. ჩვენ ვითხოვთ დამსახურებულ სტატუსს”, – განაცხადა საქართველოს პრემიერმა ირაკლი ღარიბაშვილმა მთავრობის სხდომაზე, რომელიც პირველად გაიმართა ევროპარლამენტის კრიტიკული რეზოლუციის შემდეგ.
კიდევ რა თქვა პრემიერმა ღარიბაშვილმა 13 ივნისს გამართულ მთავრობის სხდომაზე?
- “ჩალის ფასი”, “ფეიკი”, “ომში ჩათრევა” – ხელისუფლება ევროპარლამენტის რეზოლუციაზე
- ემუქრება თუ არა ივანიშვილს სანქციები და რას შეცვლის ეს ქვეყანაში?
- ევროპარლამენტმა მიიღო რეზოლუცია საქართველოს შესახებ. რა ვიცით ამ დროისთვის?
- სანქციები
პრემიერმა თქვა, რომ მთავრობას წინდახედულობა რომ არ გამოეჩინა და სანქციებს მიერთებოდა, ქვეყანაში ეკონომიკური ზრდა და ინვესტიციები არ იქნებოდა:
“რა იქნებოდა თუ ჩვენ ვინმეს დავუწესებდით ჩვენს ეკონომიკურ სანქციებს?! ეს რას ნიშნავდა, რომ უნდა შეგვეწყვიტა ვაჭრობა, ეკონომიკური ურთიერთობა რუსეთთან. მილიონი ჩვენი თანამოქალაქე ცხოვრობს რუსეთში, ვინმეს საერთოდ ახსენდება ეს ადამიანები როგორ შრომობენ, როგორ მოღვაწეობენ რუსეთში, მათ რა ბედი ელით?! აღარ ვსაუბრობ იმაზე, ოთხი მილიონი ადამიანი, ჩვენი მოქალაქე, რომელიც დღეს ჩვენს ქვეყანაში ცხოვრობს, იმათ რა ბედი ელით. რა მოხდებოდა მათ წინააღმდეგ”.
გაიხსენა რძის პროდუქტებისთვის რუსეთის ბაზრის გახსნის შესაძლებლობაც, “რომელზეც ათასი ცინიკური განცხადება გაკეთდა”:
“ევროკავშირი რუსეთს ყოველდღე უხდის მილიარდ დოლარს, ერთ მილიარდ დოლარს, ომის დაწყებიდან დღემდე რუსეთში შევიდა 90 მილიარდი დოლარი ამ ვაჭრობის შედეგად, რომელიც რუსეთს დღემდე აქვს ევროპასთან. ჩვენ რა ხდება?! არ გვაქვს ეროვნული ინტერესები? თუ ჩვენთან არ ცხოვრობენ ადამიანები?! თუ ქართველმა ხალხმა ისევ უნდა მოითმინოს, დაიჩაგროს, ომში ჩაებას, დავკარგოთ ტერიტორიები, სახელმწიფოებრიობა?!“
- ევროპარლამენტის რეზოლუცია
საქართველოს პრემიერმა თქვა, რომ ის აპროტესტებს საქართველოს შესახებ ევროპარლამენტის რეზოლუციას. მისი თქმით, ეს რეზოლუცია „ერთიანი ნაციონალური მოძრაობის” მოკავშირე პარტიამ მიიღო.
ღარიბაშვილმა გააკრიტიკა “უპასუხისმგებლო, მავნებელი ოპოზიციონერი პოლიტიკოსები”, რომლებიც “დადიან ევროპაში და ათას სისულელეს ავრცელებენ ჩვენი ქვეყნის წინააღმდეგ”:
“გამოვიდნენ და შეიცხადეს ყველამ, ამას როგორ ვიკადრებთ, თუმცა არ უკადრებიათ თუ რა?! გახსოვთ, როდესაც უვიზო რეჟიმზე ვმუშაობდით, პირდაპირ ეხვეწებოდნენ, მუხლისჩოქით დადიოდნენ ევროპაში, რომ საქართველოსთვის არ მიეცათ უვიზო რეჟიმი, ანუ ჩვენი ქვეყანა და ხალხი დაესაჯათ.
ახლა მოახერხეს ის, რა თქმა უნდა, ეს მხოლოდ ამათ არ გაუკეთებიათ, ამ საცოდავებს ამდენი არ შეუძლიათ, თუმცა ფაქტია, რომ როლი შეასრულეს და გამოიყენეს მათი განცხადებები. ეს საშინელებები, რაც ჩაწერეს რეზოლუციაში, მართლაც სამარცხვინო ბრალდებები, არის ამათი მიწოდებული ე.წ. ფაქტები და მტკიცებულებები”.
საქართველო პრემიერმა რეზოლუციას სამარცხვინო, ანტიქართული და ანტისახელმწიფოებრივი უწოდა.
“რატომ არ მოუწოდეს თავის პარტიას, რომ ასეთ სამარცხვინო, ანტისახელმწიფოებრივი და ანტიქართული რეზოლუცია არ მიეღოთ ევროპარლამენტში? ჩვენ კითხვები არ გვაქვს, ყველას ყველაფერი კარგად ესმის ეს რას ემსახურებოდა“.
- კანდიდატის სტატუსი
ირაკლი ღარიბაშვილმა განაცხადა, რომ ასოცირებულ ტრიოს შორის (საქართველო, მოლდოვა, უკრაინა), კანდიდატის სტატუსს ყველაზე მეტად საქართველო იმსახურებს. პრემიერის შეფასებით, საქართველო “ათი თავით უსწრებს უკრაინას და მოლდოვას ყველა მიმართულებით” და სხვათა შორის ბევრი მიმართულებით ევროკავშირის წევრ ქვეყნებსაც კი უსწრებს:
„იმ რეიტინგებს, რომელსაც ჩვენ გვიწერენ, ვინ ადგენს ამ რეიტინგებს, ხომ ვერ შემახსენებდით? ამ რეიტინგებს ადგენენ საერთაშორისო მაღალი რეპუტაციის მქონე ორგანიზაციები და აფასებენ ქვეყნის მიღწევებს“.
- საქართველოს საპატრიარქო არ აპირებს აღიაროს უკრაინის ეკლესიის ავტოკეფალია. ვის მხარესაა იგი ამ ომში?
- “უკრაინა ომს აგებს. ზელენსკიმ ომი ვერ აიცილა”. ვინ დგას საქართველოში რუსული პროპაგანდის უკან
- აბა ომი გინდათ?! – ვინ და რატომ აძლიერებს საქართველოში ომის ბუნებრივ შიშს? ექსპერტების შეფასებები
პრემიერს უკვირს, ამ რეიტინგების ფონზე, რატომ არსებობს განცდა, რომ ქვეყანაში არ არსებობს დამოუკიდებელი სასამართლო, პრობლემურია მედიის თავისუფლება:
„ევროპულ სახალხო პარტიას“ მინდა შევახსენო, რომ 2012 წლამდე მათი შვილობილი თუ პარტნიორი პარტიის მმართველობის დროს ქვეყანაში დემოკრატიის არავითარი ნიშან-წყალი არ არსებობდა, არც თავისუფალი მედია, ოპოზიციური პარტიები როგორი წნეხის ქვეშ იყვნენ.
რომ არ მოსულიყო ბიძინა ივანიშვილი ხელისუფლებაში, დღეს ქვეყანა აღარ გვექნებოდა, რადგან იქნებოდა ომში ჩართული. აქ მოაწყობდნენ მეორე მარიუპოლს. ვინ შეეწირებოდა ამ სიგიჟეს და სისულელეს? რაც გააკეთეს 2008 წელს – ჩვენ გვახსოვს მიწაზე გართხმული მთავარსარდალი, სამარცხვინო სახე აჩვენა მთელ მსოფლიოს. ვინ დაიღუპა და განადგურდა? დავკარგეთ ტერიტორიები, 100-ზე მეტი სოფელი და ათიათასობით დევნილი მივიღეთ ჩვენსავე ქვეყანაში. ეს არის უპასუხისმგებლო პოლიტიკის გაგრძელება, რომელიც მათ დაიწყეს“.
- ევროპასთან ინტეგრაცია
ღარიბაშვილმა თქვა, რომ თუ ვინმეს ბოლო 30 წლის განმავლობაში ევროპასთან ინტეგრაციის კუთხით რაიმე გაუკეთებია, ეს „ქართული ოცნებაა“. იქამდე კი “არაფერი ევროპული ქვეყანაში არ ხდებოდა, ეს იყო დიქტატორული რეჟიმის გამყარება ქვეყანაში“.
პრემიერმა ჩამოთვალა ასოცირების ხელშეკრულება, უვიზო რეჟიმი, თავისუფალი ვაჭრობა, განაცხადის შეტანა 3 მარტს და თქვა, რომ:
“მთავარი, ჩვენმა პარტიამ კონსტიტუციაში ჩავწერეთ, რომ საგარეო პოლიტიკური კურსი არის ევროატლანტიკური. ეს მხოლოდ კი არ ჩავწერეთ ჩანაწერი ჩანაწერისთვის, არამედ ჩვენ რეალური, ხელშესახები შედეგები მოვუტანეთ ქვეყანას. დღეს გამოდიან და თუ არ მივიღებთ სტატუსს, ეს იქნება მთავრობის პასუხისმგებლობა. არცერთ შემთხვევაში მეგობრებო. მთავრობამ გააკეთა მაქსიმუმი, დანარჩენი რა თქმა უნდა, არის სამუშაო პროცესი.”
და კვლავ გაიმეორა, რომ თუ ვინმეს ეკუთვნის ევროკავშირის კანდიდატის სტატუსი, ეკუთვნის საქართველოს და შემდეგ უკვე უკრაინასა და მოლდოვას:
“რომ ამბობენ, უკრაინა ომშია და ამის გამო მას უნდა მიენიჭოს, უკაცრავად, თუ ომით განისაზღვრება სტატუსის მინიჭება, ჩვენ ომი არ გვინდა, მეგობრებო, ჩვენ ვითხოვთ დამსახურებულ სტატუსს! რომელიც ქართველმა ხალხმა დაიმსახურა თავისი 30-წლიანი ბრძოლით თავისუფლების გზაზე და ბოლო 9-წლიანი რეფორმებით. ჩვენ არაფერს არ ვითხოვთ დაუმსახურებელს, ჩვენ ვითხოვთ დამსახურებულ სტატუსს”.
- სახალხო დამცველი ნინო ლომჯარია
პრემიერმა გააკრიტიკა საქართველოს სახალხო დამცველი ნინო ლომჯარია, რომელმაც უარყოფითად შეაფასა ხელისუფლების წევრების განცხადებები რეზოლუციის მიღების შემდეგ:
“გამოდის სახალხო დამცველი ნინო ლომჯარია და საჯაროდ ამბობს, რომ ამას მირჩევნია, ბომბების ცეცხლი და წვა მივიღოთო. ქალბატონი ლომჯარია სააკაშვილის დროს ვის უნახავს? მაშინ სხვა პოზიციაზე მუშაობდა და ვინმეს გახსოვთ, რაიმე საჯაროდ დაეგმო – ადამიანების ტანჯვა, წამება, ბიზნესის დატერორება მკვლელობები“
მთავარი დამრეკეტებელი, კეზერაშვილი, ამ რეზოლუციაში ჩაწერეს. ერთი მილიარდი დოლარის ბრუნვა ჰქონდა მის კომპანიას, საიდან მეგობრებო? ძარცვისგან, ბიზნესის რეკეტისგან. მედია თავისუფლება რომ არის ქვეყანაში, ვინმეს რამე კითხვა აქვს ევროპაში და ამერიკაში“.
- “ნაციონალური მოძრაობა”
მთავრობის სხდომაზე პრემიერმა არაერთხელ ახსენა “ერთიანი ნაციონალური მოძრაობა”. მათ მეხუთე კოლონას უწოდებდა.
ღარიბაშვილმა თქვა, რომ ისინი ყველა გზებით ცდილობენ ქვეყანაში გადატრიალების მოწყობას. პატიმარი პრეზიდენტი მიხეილ სააკაშვილი კი “კონტრაბანდულ საქონლად” მოიხსენია:
“მას შემდეგ, რაც დაწყებული კონტრაბანდული საქონლის შემოგზავნით და აქ რევოლუციის მოწყობა უნდოდათ, არ გამოუვიდათ და აღმოჩნდა ციხეში. შემდეგ გახსოვთ, რომ ჩამოიყვანეს ერთ-ერთი ცნობილი რევოლუციონერი, რევოლუციის დამფინანსებელი და იდეოლოგი ბატონი აკერმანი. ის საჯაროდ ჩამოვიდა, რომ მოემზადებინა ჩვენი დესტრუქციული მეხუთე კოლონა, რომ მოეწყოთ მშვიდობიანი რევოლუცია, მშვიდობიანი გადატრიალება ქვეყანაში. ამ კაცს რა მოუვიდა შემდეგ ეს ცალკე თემაა. მოკვდა ის კაცი. პატრონი მოუკვდათ ე.ი. ამ დესტრუქციულ ძალებს“.
- 20 ივნისს დაგეგმილი აქცია
საქართველოს პრემიერი შეეხო 20 ივნისს დაგეგმილ აქციას “წინ ევროპისკენ”. ეს აქცია თბილისში აქტივისტების მიერაა დაგეგმილი და კანდიდატის სტატუსის მოლოდინს ეხება.
ღარიბაშვილმა თქვა, რომ ამ აქციის უკანაც “ერთიანი ნაციონალური მოძრაობა”დგას:
“ვინ ითხოვს ამ აქციას? ვინ ატარებს? შემთხვევით ის ძალა ხომ არა, რომელიც აქ ადამიანებს კლავდა, აუპატიურებდა, აწამებდა, და ქვეყნის ტერიტორიებს მოღალატეობრივად ურიგებდა ოკუპანტ ქვეყანას? და ომის შემდეგ რომელმაც ჩააბარა ყველა სტრატეგიული ობიექტი რუსეთს. და ცალმხრივად გაუხსნა შემდეგ უვიზო რეჟიმი და ეს ბოროტი, მასხარა სააკაშვილი ხვდებოდა საზღვარზე რუსეთის მოქალაქეებს”.
ღარიბაშვილმა აქციას პროვოკაცია უწოდა და თქვა, რომ “მთავრობა კანონით მინიჭებული უფლებით და ძალით დაიცავს მოქალაქეების მშვიდობას და ქვეყნის სტაბილურობას”.
- ბორჯომის საქმე
მთავრობის სხდომაზე საქართველოს პრემიერმა ისაუბრა კომპანია “ბორჯომის” პრობლემებზე. ბოლო ორი კვირაა “ბორჯომის” თანამშრომლები საპროტესტო აქციებს მართავენ. კომპანიაში პრობლემები მას შემდეგ დაიწყო, რაც მისი რუსი მფლობელები სანქცირებული რუსი ბიზნესმენების ნუსხაში აღმოჩნდნენ.
პრემიერმა თქვა, კომპანია “ბორჯომის” აქციების მფლობელი სახელმწიფო გახდება. მან აღნიშნა, რომ ეს უსასყიდლო გარიგებაა, რომელიც საერთაშორისო სამართლის ნორმების სრული დაცვით გაფორმდა:
“ჩვენი სახელმწიფო გახდება “ბორჯომის” ქარხნის, ჩვენი ეროვნული სიმდიდრის, სიამაყის თანამფლობელი და ყველა ის პრობლემა, რომელიც “ბორჯომს” და მის თანამშრომლებს ჰქონდათ შექმნილი ოპერირებაში, მართვაში, ფუნქციონირებაში ზოგადად, ყველა ეს პრობლემა მოხსნილი იქნება”.
ღარიბაშვილმა თქვა, რომ მალე თანამშრომლების ყველა პრობლემა მოგვარდება და ჯანდაცვისა და ეკონომიკის მინისტრებს დაავალა, ჩაერთონ პროცესებში:
“არც ერთი არ დარჩება სიმართლის გარეშე. არც ერთი მოქალაქე, არც ერთი თანამშრომელი ჩვენი “ბორჯომის”, ჩვენი ეროვნული სიმდიდრის არ დაიჩაგრება. მე ვიცი, რომ გარკვეული კითხვები არსებობდა, ამ ყველა კითხვას უნდა გაეცეს პასუხი“.
ამავე სხდომაზე პრემიერმა ისაუბრა უპრეცედენტო ეკონომიკურ ზრდაზე, ლარის კურსის გამყარებაზე, განაცხადა, რომ 650 დევნილ ოჯახს საკუთრებაში გადაეცემათ ბინები.
ეს იყო მთავრობის პირველი ოფიციალური სხდომა მას შემდეგ, რაც 9 ივნისს ევროპარლამენტის კრიტიკული რეზოლუცია გასაჯაროვდა. რეზოლუციას ხელისუფლების მკვეთრად უარყოფითი განცხადებები მოჰყვა.
