"თუ კანონი ასე დარჩება, იქნება შეზღუდვები კონკრეტულ პირებზე და მათი ოჯახის წევრების მიმართ" - ო'ბრაიენი
ჯეიმს ო’ბრაიენი სანქციებზე
აშშ-ს სახელმწიფო მდივნის თანაშემწემ ევროპისა და ევრაზიის საკითხებში ჯეიმს ო’ბრაიენმა საქართველოს პრემიერ-მინისტრთან, საგარეო საქმეთა მინისტრთან, პრეზიდენტთან, პარლამენტის სპიკერთან, ოპოზიციასა და სამოქალაქო საზოგადოებასთან შეხვედრების შემდეგ ბრიფინგი გამართა. მან 14 მაისს დამტკიცებულ აგენტების შესახებ რუსულ კანონზე, მის ევროკავშირის სტანდარტებთან შეუსაბამობასა და შესაძლო სანქციებზე ისაუბრა.
ო’ბრაიენმა განაცხადა, რომ თუკი კანონი არ მოვა შესაბამისობაში ევროკავშირის ნორმებთან და ძირი გამოეთხრება დემოკრატიას, იქნება მშვიდობიანი დემონსტრანტების წინააღმდეგ ძალადობა, მაშინ ჩვენ ვიხილავთ ამერიკის შეერთებული შტატების მიერ დაწესებულ ფინანსურ, თუ სამოგზაურო შეზღუდვებს იმ პირებზე და მათი ოჯახის წევრებზე, რომლებიც პასუხისმგებლები იქნებიან ამ ქმედებებზე. ასევე ორი ქვეყნის ურთიერთობას საფრთხე შეექმნება.
- პარლამენტთან არბევენ და აკავებენ რუსული კანონის მოწინააღმდეგეებს. ადგილზე უპრეცენდენტო რაოდენობით პოლიციაა მობილიზებული
- პარლამენტმა მესამე, საბოლოო მოსმენით დაამტკიცა რუსული კანონი “აგენტების შესახებ”
- Freedom House-ი გმობს რეპრესიებს და ძალადობას მშვიდობიანი დემონსტრანტების მიმართ
ო’ბრაიენის თქმით, თუ დემონსტრაციები გაგრძელდება, ის უნდა იყოს მშვიდობიანი და ასევე, პასუხისგებაში უნდა მიეცნენ პირები, რომლებიც მშვიდობიანი დემონსტრანტების დაშინებაში იქნებიან ბრალდებულნი. უნდა შეწყდეს ამ პირების მიმართ აქციებზე, სახლებში თუ მათი ქონების საწინააღმდეგო ქმედებები, როგორც ეს იყო უკანასკნელი დღეების განმავლობაში.
მისი თქმით, თუ კანონი ევროკავშირის ნორმებთან შესაბამისობის გარეშე წავა წინ და აშშ-სა და სხვა პარტნიორების წინააღმდეგ მსგავსი რიტორიკა და ცილისწამება გაგრძელდება, ურთიერთობები საფრთხეში იქნება.
“რამდენიმე მაგალითს მოვიყვან: აშშ-ს გათვალისწინებული აქვს დაახლოებით 390 მილიონი დოლარის ოდენობის დახმარება, რომლის დახარჯვასაც საქართველოს ხელისუფლებასთან ერთად ვგეგმავთ. ნახევარი სამხედრო დახმარებაზე წავა; უხეშად რომ ვთქვათ, მესამედი ეკონომიკური განვითარების პროექტებზე და დანარჩენი ინსტიტუციების მშენებლობაზე, მათ შორის სამოქალაქო საზოგადოებისთვის, და ეს ყველაფერი უნდა კითხვის ნიშნის ქვეშ დადგება, თუ ახლა ჩვენ მოწინააღმდეგედ განგვიხილავთ და არა პარტნიორად. თუ კანონი ისე წავა წინ, რომ ევროკავშირის ნორმებთან შესაბამისობაში არ იქნება, მოხდება დამოკრატიისთვის ძირის გამოთხრა და ადგილი ექნება ძალადობას მშვიდობიანი მომიტინგეების მიმართ, მაშინ შეერთებული შტატების მხრიდან აუცილებლად იქნება შეზღუდვები, რაც გულისხმობს ფინანსურ და/ან სამოგზაურო შეზღუდვებს ამ ქმედებებზე პასუხისმგებელ პირებისა და მათი ოჯახების მიმართ”, – განაცხადა ობრაიენმა.
მისივე თქმით, აშშ-ს სურს, რომ საქართველოს ჰქონდეს განგრძობითი მშვიდობიანი გზა ევროკავშირისა და ნატოსკენ და რომ უცხოური დაფინანსების გამჭვირვალობის რეგულირებაში საქართველო უნდა იყოს შესაბამისობაში იმ სტანდარტებტან, რაც არის ევროკავშირსა და ტრანსატლანტიკურ საზოგადოებაში.
„საქართველოს სურვილია ევროკავშირისკენ და ნატო-სკენ სწრაფვა, შესაბამისად, არსებობს გარკვეული წესები, სტანდარტები, რომლებიც ამ ორგანიზაციებს გააჩნია. აღნიშნული კანონი უნდა იყოს ამ წესებთან და სტანდარტებთან შესაბამისობაში“, – აღნიშნა ო’ბრაიენმა და იმედი გამოთქვა, რომ იხილავს ამ საკითხის ისეთ განხილვას, რაც შეესაბამება ევროკავშირის მოთხოვნებს.
ივანიშვილის მიმართ სანქციები არ არსებობს და ფაქტი, რომ ასეთი გავლენიანი ადამიანი არასწორად ინფორმირებულია, გასაოცარია
ო’ბრაიენი გამოეხმაურა პრემიერ-მინისტრ ირაკლი კობახიძის განცხადებასაც, რომ ივანიშვილმა მასთან შეხვედრაზე უარი თქვა, რადგან ის დე ფაქტო სანქციების ქვეშაა. აშშ-ს სახელმწიფო მდივნის თანაშემწის თქმით, ამ ეტაპზე ბიძინა ივანიშვილის მიმართ სანქციები არ არსებობს და “ის ფაქტი, რომ მსგავსი გავლენიანი ინდივიდი ამ დონეზე არასწორად ინფორმირებულია, შოკისმომგვრელი და იმედგასაცრუებელია”.
როგორც ობრაიენმა განაცხადა, პრემიერის მიერ დასახელებული მიზეზი ნიშნავს “ინდივიდუალური ინტერესების ქვეყნის იმ კონსტიტუციურ ვალდებულებაზე მაღლა დაყენებას, რომელიც ქვეყნის მჭიდრო თანამშრომლობას გულისხმობს საერთაშორისო პარტნიორებთან, ევროკავშირსა და ნატოში გაწევრიანების საკითხთან დაკავშირებით”.
ო’ბრაიენმა დასძინა, რომ კანონის შესახებ მსჯელობა ფართო საუბრის მცირე ნაწილია. უფრო ფართო საუბარი ეხებოდა “ქართული ოცნების” ლიდერების კომენტარებს, რომ არსებობს “გლობალური ომის პარტია”, რომ საქართველომ უნდა გადაუხვიოს იმ პირობებს, რომლებიც ამ “გლობალური ომის პარტიისთვის” აქვს მიცემული და რომ დასავლეთის მხრიდან არსებობს შეთქმულება “ქართული ოცნების” თანამდებობიდან გადაყენებასთან დაკავშირებით – მიუხედავად ჩვენი 12 წლიანი მყარი თანამშრომლობისა. “ეს არის არარეალური, არასწორი. ესაა სრულად არასწორი გაგება საერთაშორისო თანამეგობრობის ურთიერთობისა საქართველოსთან მიმართებაში”.
„ჩემი ვიზიტის მთავარი მიზანი გახლავთ ის, რომ ჩვენ ამერიკა და ამერიკელები ვაფასებთ საქართველოსთან ჩვენ ურთიერთობას და ჩვენს სტრატეგიულ პარტნიორობას. ბოლო პერიოდში გაკეთებული განცხადებების შედეგად, ჩვენ გვაინტერესებდა ეს სტრატეგიული თანამშრომლობა და ურთიერთობა გაზიარებულია თუ არა საქართველოს მიერ. მოგეხსენებათ, ჩვენი სტრატეგიული პარტნიორობა მრავალ წელს ითვლის და 1992 წლიდან მოყოლებული, საქართველოს გვერდით ვდგავართ. განვახორციელეთ ინვესტიცია, დახმარება 6 მილიარდი დოლარის ოდენობით. ეს შეეხებოდა ბევრ სხვადასხვა მიმართულებას, ქვეყნის განვითარებას, თავდაცვას, ხელისუფლების სხვადასხვა შტოების განვითარებას და ა.შ. 30 წელზე მეტია, ამერიკა ძალიან ძლიერი პარტნიორია საქართველოსი და ჩვენ იმედი გვაქვს, რომ ამას გავაგრძელებთ“, – განაცხადა ო’ბრაიენმა.
მან ისაუბრა საქართველოს გადაწყვეტილების მნიშვნელობაზე ევროკავშირთან და ტრანსატლანტიკურ გაერთიანებასთან – “ძალიან ვამაყობ, რომ ვედექით და ვდგავართ საქართველოს გვერდით, მათ შორის კანდიდატის სტატუსის მინიჭებასთან დაკავშირებით და ვამაყობთ, რომ გავაგრძელოთ ეს მხარდაჭერა და დახმარება საქართველოს მომავალ გზაზე”.
„ამ რაღაცებს იმიტომ არ ვამბობ, რომ მსურს ეს მოხდეს, არამედ მსურს, რომ საქართველოს ჰქონდეს განგრძობითი მშვიდობიანი გზა ევროკავშირისა და ნატოსკენ. იმედი გვაქვს, რომ ამ გზაზე კვლავ დაიწყება დღეს სიარული და თუ ასე არ მოხდება, მაშინ აღნიშნულ საკითხებს ძალიან სწრაფად გადავხედავთ”, – აცხადებს ის.
